Read kumam Esekeri 20 Bible Online

Esekeri 20 - kumam bible

Esekeri 20

¹I buto duwe tomon i duwe me kany i mwaka me kanyaare me wan bedo obukui, jodongo mogo me Isirael oko bino buta pi mito ngeno mit ka Rwot. Gin kibino di kiko bedo piny i nyima.

²Rwot oko yamo keda.

³En ewaco na be, “Wace jodongo me Isirael nogi be ango Rwot Rubanga atie waco kaman: pinyo komio wun ibinunu penyo tam kibuta? Ango akwongere be likame abino yei ne wun penya kop moro. Ango Rwot Rubanga atieko waco.

⁴“Wot ka dano, benyo, in itieko iikere pi ngolo kop ne gin? Aso, poore imi gin kingei gikareco kame joakwari gi bin obedo timo.

⁵Wac negi gikame ango atie waco. I ceng kame ango bin ayero kede jo Isirael, ango anyutere but gi i lobo me Misiri, di ako lairo but gi be ango Rwot en kame abedo Rubanga gin.

⁶Cenge nono ango ako lairo but gi be abino kwanyo gi ki lobo me Misiri di ako tero gi i lobo kame ango ayero negi, lobo amio, lobo kame ber kalamo lobere dedede.

⁷Ango ako waco negi be ngat acelacel poore lwom tenge caljwogi mere, di likame kiko munaun kede rubangan me Misiri, pien ango en abedo Rwot Rubanga gin.

⁸Do gin kiko jemo na di kiko dagi winyo kop na; likame bin tie ngatamoro kikom gi akadi acel kame oko uco caljwogi mere arabo weko rubangan me Misiri. Di do ango ako tamo be koto abwoto lilo na i kom gi di ako mino gi alola i lobo me Misiri.

⁹Do ango likame ako timo kamanono pi nyinga, tetekeny kur akel acae i nyinga i nyim atekerin kame gin bin kibedo i diere gi; pien ango oudo atieko waco ne jo Isirael i nyim gin be abino kwanyo gi ki Misiri.

¹⁰“Aso, ango bin ako kwanyo gi ki Misiri di ako tero gi i wi tim.

¹¹Ango ako mino gin cik na, kede ako mino gin kingeo iswilia na, gikame mio jo dedede kame lubo gi bedo kuo.

¹²Medo i wi manono, ango ako mino gin gwoko Sabato na bala gianena me winyere nango kede gin, tetekeny gin kibed yutuno be ango Rwot en kame amio gin kibedo jokacil.

¹³Do jo Isirael oko jemo na i wi tim. Gin kiko turo iswilia na di kiko dagi lubo cik na, gikame mio jo dedede kame lubo gi bedo kuo. Gin kiko pwoko Sabato na atwal atwala. Di do ango ako bedo kede tam be koto abwoto lilo na i kom gi i wi tim kunono di ako muducaro gi atwal.

¹⁴Do ango likame ako timo kamanono pi nyinga, tetekeny kur akel acae i nyinga, i nyim atekerin kame bin oneno di ango akwanyo jo Isirael ki Misiri.

¹⁵Aso, ango bin ako kwongere i wi tim kunono be likame abino tero gi i lobo kame ango oudo amio gi, lobo amio, kame ber kalamo lobere dedede.

¹⁶Ango awaco manono pien gin oudo kidagi lubo cik na, doko kituturo iswilia na, kede kipwoko Sabato na; pien cuny gi oudo tie i kom caljwogi.

¹⁷“Do ango ako neno gi kede cuny me kisa, di likame ako neko gi i wi tim kunono.

¹⁸Ango ako kwenyaro idwe gi kaman: kur ilubunu iswilia kame joakwari wu oketo arabo itok gi, doko da kur ipwokerenu kede woro caljwogi gin.

¹⁹Ango en Rwot Rubanga wu. Poore ilubunu iswilia na, kede poore igwokerenu di ikounu timo gikame cik na mito.

²⁰Poore imiunu Sabato na bed cil, tetekeny kibed gianena kame tie i dierediere nango kede wu, gianena kame bino bedo pono wi wu be ango en Rwot Rubanga wu.

²¹“Do lwak nono da oko jemo na. Gin likame kilubo iswilia na, akadi cik na da likame kigwoko, iswilia kede cik kame mio jo dedede kame lubo gi bedo kuo. Gin kipwoko Sabato na. Ango ako tamo be koto abwoto lilo na i kom gi di ako mino gi alola i wi tim.

²²Do ango likame ako timo kamanono pi nyinga, tetekeny kur akel lewic i nyinga i nyim atekerin, jo kame bin oneno di ango akwanyo jo me Isirael ki Misiri.

²³Aso ango ako kwongere but gi i wi tim be abino sasaro gi i diere me atekerin apat, i pinye dedede.

²⁴Ango atimo manono pien gin kidagi timo gikame cik na mito, kituturo iswilia na, kipwoko Sabato na, kede cuny gi obedo maro caljwogi kame joakwari gi bin woro.

²⁵“Di do ango bin ako mino gin iswilia kalikame beco kede cik kalikame twero mino gi kibedo kuo.

²⁶Ango amio gin kimunaun ken gi kede giayala gi. Ango ajalo gi kimio idwe gi kao bala giayala awanga but caljwogi, tetekeny akel ne gi lworo atek, di gin kiko ngeno be ango en Rwot.

²⁷“Pi mano, wot ka dano, wac ne jo Isirael gikame ango Rwot Rubanga atie waco negi. Manoni bobo en kite kame joakwari gi bin onywara kede, i yore me gin bedo li kede genere buta.

²⁸I kare kame bin ango atieko tero gi kede i lobo kame ango oudo akwongere pi mino gin, gin kiko lokere wango cunya i yore me mino giayala gi i kabedo moroni kenekene kame gin bin kineno iye emukura moro, arabo yat moro, oudo kitero kagonogo giayala gi angwe kur, kede giayala amata.

²⁹Ango bin ako penyo gi kaman: kabedere nyo igonogo kame wun iotunu iye? Kabedere nogo bin oko donyo lwongo be ‘Kabedere Kimukurur Malo’[2] tuno tin.

³⁰Pi mano, in nataman wace jo Isirael gikame ango Rwot Rubanga atie waco: pinyo kame mio miero wun imeedenu pwokere kede dub kame joakwari wu bin otimo di ikounu parao lubo caljwogi gi?

³¹Tuno tin wun pwodi ipwokerenu kede woro caljwogi wu, di imiunu gi giamia kede di imiunu gi idwe wu bala giayala awanga. Okwe wun jo me Isirael, benyo, kom pwodi wun itamunu be ibinunu meede bino penyo tam kibuta? Ango Rwot Rubanga akuo akwongere be likame abino yei ne wu penyo kop moro kibuta.

³²Wun itiekunu moko tam wu be imitunu donyo timo gikame atekerin apat timo. Iwacunu be imitunu bedo cal bala jo me pinye icegun, di ikounu donyo woro yen kede kide. Do manono likame bino timere akadi acel.

³³“Ango Rwot Rubanga akwongere be ateteni kede gero na ango abino pugo wu kede twer na kede teko na.

³⁴Ango abino kwanyo wu ki atekerin icegun di acoko wu ki pinye apapat kakame isasarunu iye. Abino kwanyo wu kede twer kede teko na, kede lilo atek.

³⁵Ango abino tero wu i wi tim me atekerin, di ako riamo kede wu kunono wang i wang, di ako ngolo kop i komu.

³⁶Ango abino ngolo kop i komu bala kame riki atimo ne joakwari wu i wi tim me Sinai.” Rwot Rubanga en owaco.

³⁷“Ango abino dino wu tetek lubo iswilia me isikan na.

³⁸Abino kwanyo tenge jojemo kame tie i diere wu, kede jo kame turo cik na. Ango abino kwanyo gi ki lobo kame nataman gin kitie bedo iye bala jokumbor, do gin likame kibino dok i lobo me Isirael. Di do wun ikounu bino ngeno be ango en Rwot.”

³⁹Rwot Rubanga oko waco be, “Aso wun jo Isirael, ka idagunu winyo kop na, cako nataman otunu do itimunu tic ne caljwogi wu. Do i cen mere likame abino yei ne wu pwoko nyinga i yore me wun mino giamia wu but gi.

⁴⁰Pien i wi moru na kacil, moru me Isirael abor malo, wun dedede jo Isirael ibinunu wora i kunono. Ango abino gamo wu i kunono, di ako mito ne wu kelo na jamini wu, giamia abeco kame iyerunu ayera, kede giamia wu dedede kacil.

⁴¹Ingei ango kwanyo wu ki atekerin me pinye kame kosasaro wu iye di ako coko wu karacel, ango abino yei gamo wu bala gikame ngwe kur kame yomo cunya; di ango ako bino nyutere i diere wu i nyim atekerin be ango en Rubanga kacil.

⁴²I kare kame ango abino dwoko wu kede i lobo me Isirael, lobo kame ango bin akwongere pire pi mino joakwari wu, di do wun ikounu bino ngeno be ango en Rwot.

⁴³I kunono wun ibinunu yutuno yote areco me kuo wu kede tim areco dedede kame wun bin imunaununu kede; di wun ikounu bino bedo kede keco cuny i komu kenu pi gikareco dedede kame oudo ibedunu timo.

⁴⁴Wun ibinunu ngeno be ango en Rwot Rubanga, i kare kame ango abino tic kede wu di likame aparo pi yote wu areco, arabo tim wu kodubere, do pi mino nyinga wor.” Rwot Rubanga en owaco.

⁴⁵Rwot oko yamo keda.

⁴⁶En ewaco be, “Wot ka dano, lok nyimi nen bad tetu piny. Yam kop kalikame ber i kome, doko murao kop i kom abum me bad tetu piny kunono.

⁴⁷Wac ne abum nono me bad tetu piny ewiny kop kame ango Rwot Rubanga atie waco: neningo, ango atie cwinyo mac i komi, en ebino wango yen dedede, anumu kede kotuo. Mac nono likame bino nekere. En ebino calar yai ki bad tetu piny di eko nyai ot tetu malo. En ebino reno nyim jo dedede.

⁴⁸Jo dedede bino neno be ango, Rwot en kame acwinye, doko likame enekere.”

⁴⁹Di do ango ako waco be, “Okwe Rwot Rubanga, nen jo dedede tie yamo i koma be, ‘Mam en ngat kame maro yamo agole?’ ”