Read kumam Esekeri 24 Bible Online

Esekeri 24 - kumam bible

Esekeri 24

¹I buto duwe tomon me duwe me tomon i mwaka me kanyangon me wan bedo obukui, Rwot oko yamo keda.

²En ewaco be, “Wot ka dano, wandiko buto duwe me ceng katin, pien tin noni en kame abaka me Babilon ocako luko kede Yerusalem.

³Di iko tatamo ne jojemo nogo agole kame ango Rwot Rubanga amio gi kaman: Ketunu agulu nyonyo i keno onyunu pii pong iye.

⁴Ketunu ringo aber kame kongongolo iye, ringo me amuro kede me akwata; pongunu yie da kede ringo acogocogo.

⁵Kwanyunu oromo aber kame koyero ayera; napunu yen i dud agulu nyonyo nono, cwakunu ringo kame kongongolo me oromo nono, tedunu cogere mege da.”

⁶Pi mano, Rwot Rubanga tie waco kaman: “Itie i can in bomba me jonek! In ical bala agulu nyonyo kame nyal omako yie, agulu nyonyo kalikame kokikiso yie. Kokwanyo ringo kame tie iye acelacel tuno tieko gin dedede.

⁷Pien remo me jo kame koonyo i bomba pwodi tie iye, likame oudo koonyo remo nono piny i lobo kakame koto asinge oume iye, do koonye i wi lela kakatek.

⁸Ango aweko remo nono kunono, kabedo kalikame kokaruno ume kiye, tetekeny etwaruno lilo na di ako timo onyanga.”

⁹Pi mano, Rwot Rubanga tie waco kaman: “Itie i can in bomba me jonek! Ango kikoma en abino kumemo yen.

¹⁰Medunu yen! Mokunu mac! Cwakunu ringo nono kiber paka cwe mere tiek! Nyalunu iye jamini kame mie ebedo ikukuny! Wekunu cogere mege wangi!

¹¹Aso do ketunu agulu me nyonyo buronsi nono kalikame gimoro tie i yie i mac, di ikounu weke edop paka bokere bubu. Nyal kame tie i yie cengemogo bino wang di yie ko were edoko cil.

¹²Ango abedo cane nono, nyal nin mac likame kwanyo. Abino uci i mac kede nyal ni.

¹³Yerusalem, bed bala ango atamo lonyi ki tim ni me caro kame neno rac, do in pwodi iko dong di ipwokere kamanono. In likame bobo ibino doko cil tuno di ango atieko lilo na i komi.

¹⁴Ango Rwot Rubanga en awaco. Kare bino tuno kame ango abino timo kede gi noni. Ango likame abino loko tam na arabo weko dub nin aweka amoto bedo kede cuny me kisa i komi. Ango abino mini alola di lubere kede yote me kuo ni, kede pi gikame in itimo.” Rwot Rubanga en owaco.

¹⁵Rwot oko yamo keda.

¹⁶En ewaco be, “Wot ka dano, ango ayaro kwanyo kuo me ngat kame in imaro kitek; do in likame miero ibed kede iturur arabo ikoki, akadi binyo pigewangi.

¹⁷Diny eliling. Kur itim pwola me koko ngat oto. Kur ikwany egoe ni me bono wic tenge arabo amukai ni ki tieni. Kur ium nyimi pi nyuto iturur arabo icam cam me jo atururo pi dano oto.”

¹⁸Aso, ango ako yamo kede jo odiko, di otieno dako na to. Oru mere odiko ango ako timo bala kame oudo ociko na.

¹⁹Jo oko waco na be, “Wac ne wan dwong kop omio in itie timere kamano?”

²⁰Ango ako waco negi be, “Rwot owaco na

²¹be awace wun jo me Isirael kaman: ango abino munao kabedo na kacil, kateko wu kame iwakerenu kede, kabedo kame wun inenunu yomo cunyu nono, kede kame cunyu maro. Di idwe wu awobe kede anyira kame iwekunu odong cen oko bino neko gi kede epima.

²²Di wun ikounu bino timo gikame ango atimo nono. Likame ibinunu umo nyimu arabo camo cam me jo atururo pi dano oto.

²³Likame ibinunu kwanyo tenge igoen wu me bono wic arabo ot abongo amukai i tien wu, amoto tururo arabo koko. Do dub wu bino mino ijonyunu, di dano acelacel ko donyo cur but ngawote.

²⁴Di Esekeri ko bedo anen but wu; ibinunu timo gi dedede bala kame en etieko timo. I kare kame gi noni bino timere kede, wun ibinunu ngeno be ango en Rwot Rubanga.”

²⁵Rwot oko waco be, “Wot ka dano, ango abino kwanyo kateko gi tenge kibut gi, gikame gin kiwakere kede nono kede kame yomo cuny gi, gikame gin kineno yomo cuny gi nono kede kame cuny gi maro. Abino kwanyo da tenge awobe kede anyira gi.

²⁶I ceng kame ango abino timo kede gi noni, ngat kobwot kiye bino kelo ni rwonge mere.

²⁷Cenge nono in ibino karuno cako yamo bobo, di in iko bino yamo kede ngat kobwot nono. Iepone noni in ibino bedo anen but jo, di gin kiko bino ngeno be ango en Rwot.”