Read kumam Esekeri 25 Bible Online

Esekeri 25 - kumam bible

Esekeri 25

¹Rwot oko yamo keda.

²En ewaco be, “Wot ka dano, lok nyimi nen tetu piny me jo Amon di iko murao kop arac i kom gi.

³Wac negi kiwiny kop kame ango Rwot Rubanga atie waco kaman: wun oudo ilelunu pi neno di komunao kabedo na kacil, kede pi neno di lobo me Isirael odong nono, kede pi neno di kotero jo me Yuda obukui.

⁴Pi mano, ango atie mino wu i cing jo kame wok ki bad tetu kide di gin kiko mano lobo wu doko mergi. Gin kibino gero kimere gi i lobo wu di kiko donyo bedo i diere wu. Gin kibino camo anyakini, kede kiko mato cak kobedo megu.

⁵Ango abino mino bomba me Raba doko kakame aguraguran camo iye, kede ako mino Amon doko awi me romini. Di wun ikounu bino ngeno be ango en Rwot.

⁶“Manoni en kop kame Rwot Rubanga tie waco: wun oudo ibapunu cingu di isosomunu pi ilel, di icaunu jo Isirael.

⁷Pi mano, ango ayaro mino wu i cing atekerin apat di gin kiko bino yako wu. Ango abino mino ateker wu doko li kikom atekerin. Ango abino mino itounu i pinye kame itienu iye; abino muducaro wu. Di wun ikounu bino ngeno be ango en Rwot.”

⁸Rwot Rubanga waco be, “Pien jo Moab otieko waco be jo me Yuda cal bala jo me atekerin apat dedede,

⁹ango abino mino kosuro bomban kame gagao ikor me Moab, bomban mege acil me Bet Jesimot, Baal Meon, kede Kiriataim.

¹⁰Ango abino mino atekerin me bad tetu kide mao Moab karacel kede Amon di kiko doko mergi. Iepone nono wi atekerin bino wil kede Amon atwal.

¹¹Ango abino mino jo Moab alola, di gin kiko bino ngeno be ango en Rwot.”

¹²Rwot Rubanga waco be, “Jo me Edom oko timo onyanga kede gero arac i kom jo me Yuda, omio onyanga nono oko kelo i wi gi raco kalikame tiek.

¹³Pi mano, ango Rwot Rubanga, abino mino Edom alola. Abino neko jo kede leini dedede kame tie kunono di ako mine edong nono. Kobino neko gi kede epima cako ki Teman tuno Dedan.

¹⁴Jo na me Isirael en kame bino timo onyanga na i kom jo Edom. Gin kibino timo can i kom jo Edom di lubere kede gero na kede lilo na. Di jo Edom ko bino ngeno kite kame onyanga na rac kede.” Rwot Rubanga en owaco.

¹⁵Rwot Rubanga waco be, “Jo Pilistia oko timo onyanga kede gero arac i kom jo kame gin kibedo dingere kede gi pi kare kalac, di kiko muducaro gi kede gero atek.

¹⁶Pi mano, ango Rwot Rubanga atie waco be abino mino jo Pilistia alola; abino neko jo Keret di ako muducaro jo apat dedede kame bedo i dog nam adwong.

¹⁷Ango abino timo onyanga atek i kom gi di amio gi alola kede lilo. Di gin kiko bino ngeno be ango en Rwot, i kare kame ango abino timo kede onyanga i kom gi.”