Read kumam Esekeri 26 Bible Online

Esekeri 26 - kumam bible

Esekeri 26

¹I ceng me agege me duwe, i mwaka me tomon kiwie acel kame oudo otie kede i lobo me obukui bala mabus, Rwot oko waco na be,

²“Wot ka dano, jo me Taya tie lelo pien kobwono Yerusalem. Gin kitie ikuk be, ‘Yerusalem otieko poto; manono oyabo ne wa yongayo, wada obino doko tek, piento en etieko doko ameje.’

³“Pi manono, ango Rwot Rubanga atie waco be, ‘Taya, ango nan atieko doko ngakwor ni; abino mino atekerin kobedo jokwor ni core i komi bala kame pii me ebuka me nam core kede.

⁴Gin kibino rereto apama kame koluki kede, di kiko rereto kiton gedo aboco malo da. Taya, ango abino kiso tenge lobo nin di lela kakatek kenekene en ako bino dong,

⁵kakame jocik bino donyo yararo iye bwoini gi, ango Rwot en awaco. Jo me atekerin bino yaki

⁶di kiko neneko jo kame bedo i bomban atino ace apat kame in ipugo. Manono bino mino ingeo be ango en Rwot.’ ”

⁷Rwot waco be, “Ango abino cwano Abaka Nebukadunesa me Babilon ot suro Taya, en abaka atek kalamo abakai dedede; en ebino bino kede asigiran, cabalan kede isirikalen atek me tien.

⁸Jo kame bedo i bomban atino ace kame in ipugo kobino neneko gi. En ebino luko jo ni kede apama atek agengo gi bwot, di eko mukuro lobo me yito i wi apama koluki.

⁹En ebino mino isirikalen mege cik di gin kiko rereto apama ni me cel kede ikongio, doko di kiko tuturo kede lilime ude ni aboco malo me kino piny.

¹⁰Asigiran mege bino dunyo apua kame bino umi pukupuk, pien udo asigiran nogo tot. Mor me tien isirikalen kede cabalan mege bino yayango apama ni, kakame gin kitie donyo kede ki erute i bomba kame kotieko dudubo.

¹¹Isirikalen mege kame yi ki ngei asigiran bino neneko jo i dier yote ni di ipirin ni atek ko bino popoto piny.

¹²Gin kibino yako abar ni kede jamini ni me cato wil. Gin kibino rereto apama ni me cel di kiko dudubo ude ni abeco. Gin kibino kwanyo kide kede ibaon kede angidingidin me ude ni di kiko bwoto gi i nam.

¹³Abino jiko were ni; koko me arigirigi likame doko bino winyere.

¹⁴Abino mini idong lela kenekene, kakame jocik yararo iye bwoini gi. Likame doko kobino medo geri. Ango Rwot atieko waco.

¹⁵“Jo abedo iyapi kede nam kom gi bino miel kame kotie tuturo in, kakame kibino winyo kede ngururo me jo kame kowanakino i esawa kame nek tie timere kede.

¹⁶Di do jopug dedede kame joe gi tio i yi name adongo ko bino wok tenge ki komini gi me pug. Kibino gonyo ikanson gi me ajakanuto kede igoen kame kotubuso kuno di kiko donyo bedo piny di kom gi miel amiela. Kom gi bino to pi gi kotimere ne in.

¹⁷Kibino kok koko me pari di kiwaco be, ‘Kotieko dudubo in bomba kame lem ingere i dog nam; jo ni oudo pugo nam adwong, di kionyo lworo i kom jo dedede kame bedo tenge me dog nam.

¹⁸Nan do i ceng kame kodudubo in kede jo dedede kame bedo i dog nam kom gi tie miel amiela; cal kame kodudubo in kede mio lworo mako gi.’

¹⁹“Abino mini idoko ameje, bala bomba kame jo li iye. Abino umi kede pii atut bala me nam adwong.

²⁰Abino cwani i kabedo me jo oto pi ot bedo kede jo ariki sek kede bomban me asonya kame bin kodudubo. Pi manono likame doko jo bino bedo i yi in, doko da likame in ibino bedo i lobo me jo akuo.

²¹Abino mini ijik i yore aneno rac adikinicel. Jo bino moni do likame kibino sobolo udi; ango Rwot atieko waco.”