Read kumam Esekeri 27 Bible Online

Esekeri 27 - kumam bible

Esekeri 27

¹Rwot oko waco na be,

²“Aso nan in wot ka dano, poore iwer wer me koko Taya,

³en bomba kame cungo i dog nam di etimo cato wil kede lobere ace atie i dog name. Wac ne be ango Rwot Rubanga atie waco kaman: Okwe Taya, in iwaco be, ‘Ango acil twatwal.’

⁴Ikor nin tie i yi name; jo kogeri ogeri di icil twatwal bala emeri.

⁵Kitio kede yen pir me moru me Kerimon me timo ibaon me geri, kede kiko tic kede yen seda me Lebanon me timo ipirin me tweno egoe kame yamo koli kede.

⁶Kitio kede yen oak me Basan me timo pole me kwang; kiko timo dier ot ni kede yen pain me Sipuro, di oko tubuso en kede lak liec.

⁷Igoen kame yamo koli kede obedo igoen me Misiri kame kotubuso kuno, omio jo neni ki kakabor di kiko ngeni, doko da igoen ebululu kede akwakwar me Sipuro en kame galao dier ot ni ki malo.

⁸Jo kame kwangi kede pole oudo owok ki bomban me Sidon kede Arabad; jodiru me Semer en oudo obedo jo kame kwangi.

⁹Jo kame in itie kede gi kame tic gi guro emeri oudo obedo joadongo me Gebal, kede jo ace me kunono kame tie kede diru i tic nono; tic gi oudo mwomwono kakatwolo. Jo dedede kame beo ki nam oudo bino cato wil i dukini nin.

¹⁰“Isirikalen me Pasia, Lidia kede Libiya oudo obedo isirikalen nin, jo yi nin atek. Oudo kilieliero ibukui kede icoron atek me gagao wic kakame isirikalen nin bedo iye; gin oudo kikelo ni deyo.

¹¹Isirikalen kowok ki Arabad kede Kelek oudo daro apama me cel ni rimaro; cuo me Gamad oudo daro ude ni aboco malo me kino piny. Gin oudo kilieliero ibukui i kor apama me cel ni rimaro; oudo kimio neni cil adikinicel.

¹²“Jocat wil me Tarusi oudo bino seso jamini kobedo twon abar nin kede nyonyo siliba, ayon, tin, kede led.

¹³In oudo itimo cato wil kede Yaban, Tubal, kede Mesek; gin oudo kikelo nin ipasoi kede jamini kame kotimo kede nyonyo buronsi pi seso gi kede jamini nin.

¹⁴Bet Togarama oudo kelo nin asigiran me tic, asigiran me yi, kede pundan pi seso gi kede jamini nin.

¹⁵Jo me Rodes oudo timo kede in cato wil. Lobere atot me dog name oudo obedo atalen nin. Oudo gin kitio kede lak liece kede yat eboni me seso jamini nin.

¹⁶Jo me Siria oudo timo cato wil kede in pi twon jamini kame in oudo itie kede; oudo gin kikelo nin kide ameny me wel kame kolwongo be emeradi, igoen akwakwar, igoen kame kotubuso kuno, igoen aliamaliam, kide kame kodepo yi name kame nying gi korala, kede kide ameny me wel kame nying gi Rubis.

¹⁷Lobere me Yuda kede Isirael oudo timo kede in cato wil; gin oudo kikelo engano apwot, kal, mokic, mo me olibeti, kede jamini amio cam ngwe ikukuny.

¹⁸Damasiko oudo kelo ni bwini kowok ki Kelebon kede yer atar me romini pi wilo kede gi twon jamini ni atot koudo obedo abar ni me egere dedede.

¹⁹Bedan kede Yaban atie Usal oudo timo kede in cato wil; oudo gin kikelo nin nyonyo ayon, kede jamini amio cam ngwe ikukuny pi seso gi kede jamini nin.

²⁰Dedan oudo kelo igoen me abeno pi seso kede jamini nin.

²¹Imuarabun kede jopug me Kedar oudo kelo idwe romini, imerekekin kede diegi pi wilo gi kede jamini nin.

²²Jocat wil me Seba kede Rama oudo kelo gikame mio cam ngwe kur me epone dedede, kede kide ameny me wel me epone apapat, kede saabu, di kiko seso gi kede jamini nin.

²³Bomban me Aran, Kanek, Eden, jocat wil me Seba, bomban me Asur kede Kilimad oudo timo kede in tic me cato wil.

²⁴Gin oudo kicato ni igoen me wel, igoen ebululu ebululu kede kame kotubuso kuno, kede launi kame kopeto i dier ude kame kolilingo di kokuo gi kiber kede ausi atek.

²⁵Imerin me Tarusi oudo yeo jamini nin me cato wil.

²⁶Aso, in oudo ical bala emeri atie i dier nam kame kopongo iye jame. Yamo me bad tetu kide oko tuturo in i dier nam.

²⁷Abar ni, jamini ni, jamini ni me cato wil, jo kame tie ot kedi kede jo kame kwangi, jo kame guro ibaon ni kede jocat wil kame tie ot kedi, jo yi kame tie ot kedi, kede jo dedede kame in itie kede gi, gin dedede kiko lwiny i dier nam i ceng kame in idudubun kede.

²⁸Koko me jo kame oudo tie kwangi oko yayango dog nam ooko.

²⁹“Nan do jo oko wok ki imerin, jokwang dedede kame mako pole. Jokwang dedede me imerin tie cungo ooko i edoket,

³⁰di kikoki kitek kede dwan amalo. Kikikiro apua i wi gi di kibebelo i buru.

³¹Gin kikiso yer wi gi piri, di kiko ngapo ipukoi, kikoki kede wangcuny.

³²Kiwero wer me koki be, ‘Ngai kame kotwero tirano kede Taya, Taya kame nataman obuto oling i dud nam?

³³Jamini nin ongolo name di kiko cobo mit me atekerin atot. Abakai me wi lobo oudo abar pi twon lonyo nin.

³⁴Nan do in itie ituturun i nam, ilwiny i dud pii piny; jamini ni me cato wil kede jo kame tio i komi otieko lwiny kedi.’

³⁵“Jo dedede kame bedo ooko i dog nam kom gi oto pi in; lworo atek omako abakai gi, wang gi ococolo pi lworo.

³⁶Jocat wil me atekerin uro aura; ajikini nin obedo rac twatwal; itieko ot atwal.”