Read kumam Esekeri 31 Bible Online

Esekeri 31 - kumam bible

Esekeri 31

¹I ceng me agege me duwe me adek me mwaka me tomon kiwie acel me wan bedo i lobo me obukui, Rwot oko waco na be,

²“Wot ka dano, wac ne Parao abaka me Misiri kede ne jo mege dedede kaman: atwero tin poro dwongo ni kede nyo?

³Kotwero pore kede Asiria, yat seda me Lebanon, en etie kede ajange koyarere di oduko, di kiboco malo, gin kituno i idoun.

⁴Pii mie kuo, pii me dud lobo omie edongo bor malo. Pii nono oudo nyonyongo kakame yat nono tie dongo iye, di isamai mege ko beno i kom yen apat da me abum.

⁵Manono bin oko mino yat nono odongo bor malo, kalamo yen apat dedede me abum. Atenin mege oko cwe di kiko doko bocoboco, pi pii atot kame oudo tie i kome.

⁶Winy dedede me obar oko gero ude gi i atenin mege. Leini dedede me obar oko nywalo idwe gi i dud tipo mere; atekerin dedede adongodongo oko bedo i dud tipo mere.

⁷Yat nono oudo cil twatwal, oudo etie kede atenin abocoboco, pien aliasin mege oudo odonyo piny tuno i pii atot.

⁸Yen seda me poto na oudo likame kotwero poro kede gi, akadi yen pir da oudo likame atenin gi rom kede mege. Likame tie yat moro me epone moro kame aten mege oudo kotwero poro kede magonogo. Likame tie yat moro i poto na kame oudo kotwero poro cilo mere kede manono.

⁹Ango atime di ecil di epong kede ajange. Yen dedede me Eden oudo mito bedo bala en, gin yen kame oudo tie i poto na.

¹⁰“Aso, nan ango Rwot Rubanga atie waco kaman: pi kite kame en edongo kede paka tuno i idoun, di do cunye oko pong kede ewaka pi boro mere,

¹¹nan ango atieko dage; abino mine i cing ngapug me atekerin apat. En ebino timo ne yat nono gikame poore ne pi raco mere.

¹²Jo kobedo atekerin ager me kumbor bino tonge piny di kiko weke. Ajange mege kede aten mege kotuturun bino popoto i wi mori kede i aditoto dedede me lobo nono. Atekerin dedede kame oudo tie bedo i dude bino yai tenge.

¹³Winy bino gedo i kore kopoto piny, di leini me obar ko donyo bedo i ajange mege.

¹⁴Manoni bino timere tetekeny kur bobo yat moro dong bor bala manono, arabo emi wie tun i idoun, akadi bed bala etie kede twon pii i dude piny. Gin dedede miero kitoi bala jo, di kiko ot i lobo me jo oto karacel kede jo kame tie ot kunono.”

¹⁵Rwot Rubanga tie waco be, “I ceng kame yat nono bino ot kede i kabedo me jo oto, abino mino pii me dud lobo ume bala gianena me koke. Abino mino icileta amol wok ki dud lobo jiko molo pii wok ooko. Abino kelo colo i wi mori me Lebanon bala gianyuta me cwercuny, di yen me abum mege ko tuo pi manono.

¹⁶Kame ango acwae i kabedo me jo oto, poto mere kunono bino mino kom atekerin miel. Yen dedede me Eden, kede yen me Lebanon abeco kalamo, gin yen kame oudo tie kede pii atot, yen kame nataman otieko ot i piny atie i dud lobo, yen nogo cuny gi bino bedo yom pi poto me yat nono.

¹⁷Gin kibino ot kede en i kabedo me jo oto pi ribakin kede jo kotieko to, en karacel kede jo koudo gange. Di oko bino sarakino jo kame oudo bedo i tipo mere i diere me atekerin apat.

¹⁸“Yat noni en abaka me Misiri kede jo mege. Kiton yen me Eden da oudo likame kotwero pooro kede deyo kede dwongo mere. Do nan ebino ot piny i kabedo me jo oto bala yen me Eden da, di eko ribakin kede jo kalikame wora kede jo kame koneko i yi. Ango Rwot Rubanga en awaco.”