Read kumam Esekeri 35 Bible Online

Esekeri 35 - kumam bible

Esekeri 35

¹Rwot oko waco na be,

²“Wot ka dano, ronkino jo me Edom

³di iwaco negi be ango Rwot atie waco kaman: Edom in itieko doko ngakwor na; ango abino mini alola di ako mini kabedo atie nono di kony mere li.

⁴Abino mino bomban ni doko atukito me ude kopopoto, di iko doko lobo kodong nono, di in iko bino ngeno be ango en Rwot.

⁵“Anakacia wun ibedunu jokwor me Isirael, doko ikounu jalo koneneko gi i kare kame peko opoto negi kede, en kare kame oudo kitie udo kede alola me ajikini.

⁶Pi manono, nan ango akwongere be, ateteni ango Rubanga akuo abino kelo nek i komu; wun oudo ibedunu onyo remo, nan kobino onyo remo wuda.

⁷Ango abino mino lobo me Edom kony mere doko li, di ako bino neneko jo aoto kiye.

⁸Abino umo wi mori mege kede liele; kom jo kame koneneko bino pongo wi imukuran kede aditoto.

⁹Abino mini in Edom idong abongo jo pi kare lung, di bomban ni ko bino dong nono. Di do in iko bino ngeno be ango en Rwot.

¹⁰“In iwaco be atekerin are me Yuda kede Isirael karacel kede lobere gi obedo megi, doko da be in ibino gamo gi akadi bed bala ango Rwot abedo Rubanga gi.

¹¹Pi manono, nan ango akwongere be, ateteni ibinunu niang keda, ango Rwot Rubanga akuo, pi gero, nyeko, kede adagadaga kame itienu kede i kom jo na.

¹²Ibinunu ngeno be ango Rwot atieko winyo kope me anywar kame ibedunu waco i kom mori me Isirael, di iwacunu be kitieko dong nono, be kotieko mino gi butu.

¹³Doko da wun ibedunu tingere na di iwacunu kope areco atot i koma; ango atieko winyo gi.

¹⁴“Abino mini idong nono di wi lobo lung ko bino lelo iye.

¹⁵Bala kame in ilelo kede kakame kodudubo kede lobo ka jo me Isirael, pien oudo edong nono, pi manono ibino niang keda. Mori me Seir, lobo me Edom bino dong nono. Di do jo dedede ko bino ngeno be ango en Rwot.”