Read kumam Esekeri 37 Bible Online

Esekeri 37 - kumam bible

Esekeri 37

¹Twer ka Rwot oko bino i koma di tipo mere oko tera di eko ciba i dier aditot kopong kede cogere.

²En eko tela mamano gi; cogere koudo opepetun kanono oudo tot twatwal, doko oudo kituo twatwal.

³En eko penya be, “Wot ka dano, cogere gi twero bedo kuo bobo?” Ango ako dwoko be, “Rwot Rubanga, in ingeo.”

⁴En eko waco na be, “Wace cogere go be: wun cogere kotuo, winyunu kop kame Rwot tie waco ne wu.

⁵Rwot tie waco ne wu be: ango abino keto ne wu wei di ikounu bino bedo kuo bobo.

⁶Abino keto ne wu amorito akodo cogere, di ako keto ne wu ringo me kom, di ako umo wu kede delkom, di ako keto ne wu wei, di ikounu bino bedo kuo bobo. Di do ikounu bino ngeno be ango en Rwot.”

⁷Ango ako murao bala kame oudo Rwot ociko na. Kakame oudo atie yamo kede, ako winyo gikame timere gogol gogol. Cogere oudo tie dudupun iwangere gi!

⁸Ako neno di amorito ororopo gi, di ringo me kom oko umo gi, di delkom oko umo gi. Do oudo likame kitie kede wei i kom gi.

⁹Di Rubanga oko waco na be, “Murao; wac ne yamo me wei be ango Rwot Rubanga atie waco ne be: wok ki bad ongwon dedede, di iko kuto wei amio kuo i kom jo kame oudo koneko nogi, tetekeny kibed kuo bobo.”

¹⁰Ango ako murao bala kame oudo eciko na, di yamo me wei oko donyo i kom gi, di kiko bedo kuo, di kiko cungo. Oudo gin jo atot twatwal.

¹¹Di Rubanga oko waco na be, “Wot ka dano, jo me Isirael cal bala cogere nogi. Gin kiwaco be kituo gongogong, doko kili kede gen moro me anyim.

¹²Pi manono, murao, wac negi be ango Rwot Rubanga atie waco be: ango abino yabo atesin wu, Okwe wun jo na. Abino woto wu di ako dwoko wu i lobo me Isirael.

¹³Ibinunu ngeno be ango en Rwot, wun jo na, ka ango ayabo atesin wu di ako woto wu ooko.

¹⁴Tipo nango bino mino wu wei di ikounu bedo kuo, di ango ako bino keto wu i lobo wu amako wu, di wun ikounu bino ngeno be ango en Rwot. Ango en acikere timo manoni, doko abino time da, ango Rwot en awaco.”

¹⁵Rwot bobo oko yamo keda be,

¹⁶“Wot ka dano, kwany ebela di iko wandiko i kore be, ‘Ajakanut me Yuda’. Bobo iko kwanyo ebela ace di iko wandiko i kore be, ‘Ajakanut me Isirael’.

¹⁷Iko mako ibelai are nogo di wi gi oriamakin, tetekeny kineno bala ebela acel.

¹⁸Ka jo ni oko penyi pi waco negi dwong mere,

¹⁹wac negi be ango Rwot Rubanga atie waco be: ango ayapuno kwanyo ebela acungo pi Isirael di ako ribe i kom ebela acungo pi Yuda, di gin kiko bino doko ebela acel kame ango atie mako i cinga.

²⁰“Mak ibelai are nogo i cingi di iko mino jo nen gi.

²¹Di iko waco negi be ango Rwot atie waco be abino kwanyo jo me Isirael ki diere me atekerin kame gin kioto iye, di ako coko gi ki adulion dedede di ako dwoko gi i lobo gi amako gi.

²²Abino mino gi kibedo ateker acel i lobo nono, i wi mori me Isirael. Kibino bedo kede abaka acel kame pugo gin dedede. Likame doko kibino bedo atekerin are, doko da likame kibino pokere pi bedo ajakanuto are.

²³Likame doko kibino munaun kede tim me woro caljwogi, amoto kede jamini gi ace kame ango adagi, arabo kede dub gi. Ango abino lako gi ki yote dedede kame kitieko poto kede tenge kibuta, di ako bino lonyo gi. Di do gin kiko bino bedo jo na, di ango ako bedo Rubanga gi.

²⁴Abaka acal bala bin ngatic na Daudi en kabino bedo abaka gi; gin dedede kibino bedo tie kede ngakwat acel. Gin kibino donyo lubo iswilia na di kigwoko cik na.

²⁵Gin kibino donyo bedo i lobo kame bin amio ngatic na Yakobo, lobo kame joakwari gi obedo iye. Gin kibino bedo kunono atwal, kiton ikwae gi, kiton ikwae me ikwae gi. Abaka kame cal bala bin Daudi en kame bino bedo ngapug gi atwal.

²⁶Ango abino timo kede gin isikan me mulem; en ebino bedo isikan kame bedo nakanaka. Ango abino mino gi winyo di kiko nyai, di ako bino cibo tempulo na i diere gi pi bedo iye nakanaka.

²⁷Ango abino bedo kunono kede gin; ango abino bedo Rubanga gi di gin kiko bedo jo na.

²⁸Kame ango acibo tempulo na pi bedo kuno i diere gi nakanaka, di do atekerin ko bino ngeno be ango Rwot ayero Isirael pi bedo jo na.”