Read kumam Esekeri 39 Bible Online

Esekeri 39 - kumam bible

Esekeri 39

¹Rwot Rubanga oko waco be, “Wot ka dano, bunano Gog di iwaco ne be ango Rwot Rubanga atie waco be: ango atieko doko ngakwor ni, in Gog, ngapug adwong me Mesek kede Tubal!

²Abino loki iwire di ako koli anyim kwanyi ki kakawiriwir i bad tetu malo, di ako teri tuno i mori me Isirael.

³Abino dipo paka reto ki cingi tetu ngodal yat kokude me emal, di tongini me emal ko popoto ki cingi tetu cam.

⁴In kede isirikalen ni kede jo dedede kame tie kedi ibinunu popoto i wi mori me Isirael. Abino mino komu but winy me egere dedede acamo ringo kede leini me obar pi gin camo.

⁵Ibinunu popoto di liele wu ko moore obar; ango Rwot Rubanga en awaco.

⁶Abino cwinyo mac i lobo me Magog kede i dog name kakame jo bedo iye abongo alola moro, di gin kiko bino ngeno be ango en Rwot.

⁷Ango abino mino jo na me Isirael ngea, di likame ako yei be bobo pwok nyinga kacil, di atekerin kobino ngeno be ango en Rwot, Ngat Kacil me Isirael.

⁸“Ceng kame ango atie waco kop i kome nono ateteni tie tuno; gi nogi bino timere!

⁹Jo kame bedo i bomban me Isirael bino ot coko jamini me yi kame koweko di kiko moko kede gi mac. Gin kibino moko mac kede ibukui, yen kede tongini me imalia, tongini kede akutai, mac nono bino twero liel pi mwakini kanyaare abongo to.

¹⁰Gin likame doko kibino donyo ot mwodo yen ki obar, pien gin kibino do donyo moko mac kede jamini me yi. Gin kibino yako jo kame oudo oyako gida, ango Rwot Rubanga en awaco.”

¹¹Rwot owaco be, “I ceng nono ango abino mino Gog kabedo me yiko jo i Isirael, i Aditot me Jo Aoto, katie i bad tetu kide me Nam Oto. Kanono en kame kobino yiko iye Gog kede Isirikalen mege. Limbo nono bino cego ne jo aoto yongayo pien udo edwong. Kobino donyo lwongo aditot nono be Aditot me Isirikalen ka Gog.

¹²Ebino tero ne jo me Isirael dwete kanyaare pi yiko gi, tetekeny lobo dong di cil.

¹³Jo dedede kame bedo i lobo nono bino yiko gi, di manono ko bino kelo negi wor i ceng kame ango abino nyuto kede deyo na; ango Rwot Rubanga en awaco.

¹⁴Ingei dwete kanyaare nogo, gin kibino bobo yero jo mogo di kiko cwano gi mamano lobo gi dedede pi mono kede pi yiko kom jo mogo apwodi odong, tetekeny lobo dong di cil; manoni bino tero negi dwete kanyaare.

¹⁵Kakame jomoc tie mamano kede lobo nono, ngatamoroni kame bino udo cogo me dano bino sipo gianena moro kare, tetekeny jo kame kunyo ates yike i Aditot me Isirikalen ka Gog.

¹⁶(Bomba bino bedo i ngete kanono kame kolwongo kede nying Isirikalen nogo.) Iepone nono gin kibino mino lobo gi dong cil.”

¹⁷Rwot Rubanga oko waco na be, “Wot ka dano, lwong winy me egere dedede, kede leini dedede me obar pi bino ki kabedere dedede di kiko cokere camo ebaga me giayala kame ango atie iiko negi. En ebino bedo ebaga adwong twatwal i wi mori me Isirael, kakame gin kibino camo kiye ringo di kiko mato remo.

¹⁸Gin kibino camo ringo me jo yi atek, di kiko mato remo me jopug me wi lobo, gin dedede jo kame kobino neko gi bala romini, diegi, kede twonin kocwe me Basan.

¹⁹I ebaga me giayala kame ango atie iiko, gin kibino camo kakamio tuno romo gi, di kiko mato remo tuno mer kede.

²⁰I emesa na gin kibino cam paka cam romo gi; kibino camo asigiran, jo kame ringo kede asigiran, jo yi atek kede isirikalen me epone dedede; ango Rwot Rubanga en awaco.”

²¹Rwot owaco be, “Abino nyuto ne atekerin deyo na; atekerin dedede bino neno alola kame lubere kede kop kame ango angolo, kede cinga koketo lito i kom gi.

²²Cako i ceng nono ot anyim jo me Isirael bino ngeno be ango en Rwot Rubanga gi.

²³Doko atekerin da bino ngeno be oudo komako jo me Isirael di oko tero gi obukui pi dub gi, pien gin likame kibedo jo agenere buta. Ango ako lokere tenge kibut gi di ako jalo gi i cing jokwor gi, di gin kiko donyo neko gi.

²⁴Ango atero gi i yore kame poore kede pwokere gi kede dub gi, manono en komio ango alokere tenge kibut gi.”

²⁵Rwot Rubanga waco be, “Do nan ango abino dwoko ne ikwae ka Yakobo bero kame oudo kitie iye sek; abino bedo kede kisa i kom jo dedede me Isirael. Abino bedo kede nyeko i nyinga kacil pi gwoke.

²⁶Kame gin do kiko donyo bedo i lobo gi kede anapakin abongo ngatamoro amio gi lworo, gin wi gi do bino wil kede lewic kabin omako gi, kede tim kalikame nyuto genere kame gin kibedo tie kede buta.

²⁷Ango abino dwoko jo na kibut atekerin apat, abino coko gi ki lobere ka jokwor gi, di manono ko bino nyuto ne atekerin atot be ango abedo ngat kacil.

²⁸Di jo na ko bino ngeno be ango en Rwot Rubanga gi, pien oudo amio komako gi di oko tero gi obukui, do nan ako coko gi di ako dwoko gi i lobo gi, abongo weko moro kikom gi dong cen.

²⁹Likame doko ango abino lokere tenge kibut gi, pien ango abino keto tipo na i kom gin jo me Isirael, ango Rwot en awaco.”