Read kumam Esekeri 40 Bible Online

Esekeri 40 - kumam bible

Esekeri 40

¹Manono oudo obedo ceng me tomon i agege me mwaka, i mwaka me ot are kiwie kany kame wan obedo kede obukui bala mabus, doko da manono oudo obedo mwaka me tomon kiwie ongwon ingei dudubo bomba me Yerusalem; i ceng nono kikokome twer ka Rwot oko bino i koma di eko tera karamoro.

²Ako neno gianyuta ka Rubanga; i gianyuta nono en etera i lobo me Isirael di eko ciba i wi moru abor. Ako neno gedo kame oudo cal bala bomba i bad tetu piny me wi moru nono.

³Kakame en eko tera kede kunono, ango ako neno di icuo moro tie cungo, di kome meny bala nyonyo buronsi. En oudo etie mako i cinge tol kede magada me pimo boro, di etie cungo i ekeko me erute.

⁴Icuo nono oko waco na be, “Wot ka dano, ngici kiber, doko da cik yiti kiber, di iko keto tam ni i kom gikame ango abino nyuto ni, pien in kokeli kan me wek ango anyut ni gi nogo. Poore iwac ne jo me Isirael gi dedede kame ibino neno.”

⁵Ako neno tempulo di apama oluke ki ooko. Icuo nono oko kwanyo magada mere me pim, kame boro mere oudo tie mita adek, di eko pimo apama. Apama nono boro mere malo oudo tie mita adek, doko da bimirir mere oudo tie mita adek.

⁶En eko ot i erute kame oudo neno bad tetu kide. En eko yito malo i wi apama di eko pimo ekeko me erute; oudo etie mita adek dwogo piny i lobo.

⁷Yai ki ekeko me erute donyo i yie oudo obedo kabeo alac, kame tie iye agolai adek i bad tetucel, kede doko agolai adek i bad tetu ocelu, gin oudo kibedo agolai me jodar. Buli agola acelacel oudo laco mere ki bad dedede kede boro me apama mere rorom, bad dedede oudo tie mita adek. Apama kame oudo poko buli agola acel kede ocelu oudo bimirir mere tie mita are kede dul. Kalamo agolai nogo oudo doko tie iye yongayo alac kame boro mere tie mita adek, kame oudo donyo i agola alac me kadonyo, kame neeno kede tempulo.

⁸En eko pimo agola nono eko udo boro mere tie mita ongwon. En oudo etie i ajikini me kabeo me erute i yie. Apama mere koudo neeno kede tempulo oudo bimirir mere tie mita acel.

⁹

¹⁰(Agolai me jodar kame oudo tie i erute oudo rorom, doko apama kame oudo poko gi da bimirir gi rorom.)

¹¹Di en eko pimo laco me ekeko me erute, eko ude etie mita kany, do kabeo kame oudo kato kiye oudo tie mita kanyape kede dul.

¹²I nyim agola acelacel me jodar oudo tie iye apama moro acecek kame boro mere malo tie sentimita ot kany, kede bimirir mere da kamanono. (Agolai nogo oudo tie mita adek ki bad dedede.)

¹³Di eko pimo boro kame yai ki apama me ngei agola acel, ngolo kabeo tuno i apama me ngei agola ocelu, eko ude etie mita tomon kiwie are kede dul.

¹⁴Agola alac me kadonyo, kame oudo tie i ajikini oudo laco mere tie mita tomon.[4]

¹⁵Boro me kabeo i erute, cako ki apama me ooko me ekeko me donyo, tuno i apama me ooko me ekeko me agola alac me kadonyo oudo tie mita ot are kiwie kany.

¹⁶Dirisan atitino oudo tie i kor apamai me ngei agolai nogo, kede i kor apamai kame poko agolai. Oudo kogoro cal me tugere i kom apamai me yie, kame riere i lak kabeo.

¹⁷Di eko tera tuno i diakal me ooko. Diakal me ooko oudo tie kede agolai ot adek kame oudo kogero i kom apama me ajikini me ooko ki yie; nyim gi piny oudo kotoro di tek kede kide

¹⁸rimaro diakal dedede. Diakal me ooko noni oudo tie pipiny kalamo diakal me yie.

¹⁹Erute ace oudo tie kakotingere malo adonyo i diakal me yie. En eko pimo boro kame yai ki apama me yie me erute me ooko, tuno i apama me ooko me erute nono, di boro mere oko bedo mita ot kany.

²⁰En eko pimo erute me bad tetu malo kame donyo i diakal aoko.

²¹Agolai adek kame tie i bad tetuni kede adek i bad tetuca me kabeo, apamai kame poko gi, kede agola alac me kadonyo i yie, gin dedede oudo kirorom kede me erute me bad tetu kide. Boro me kabeo i erute nono dedede oudo tie mita ot are kiwie kany, kede laco mere oudo tie mita tomon kiwie are kede dul.

²²Agola alac me kadonyo, dirisan mege, kede cal me tugere kame kogoro i kor apama oudo cal acala kede me erute me bad tetu kide. Kayito iye oudo kogero iye kakame konyono me yito enyiriri kanyaare ot malo, di agola mere alac me kadonyo tie i bad me yie kakame neeno kede diakal.

²³Ka ingolo diakal wok ki erute me bad tetu malo noni, oudo ituno bobo i erute ace kame donyo i diakal me yie, bala kame oudo tie i bad tetu kide. En eko pimo dierediere me erute me ooko kede erute me yie nono, di boro mere oko bedo mita ot kany.

²⁴Di eko tera i bad tetu piny, di ako bobo neno erute ace. En eko pimo apamai me yie kede agola alac me kadonyo, gida kiko bedo rom aroma kede me irutei ace.

²⁵Dirisan oudo tie i agolai me kadonyo noni bala kame oudo tie kede i apat da. Boro me kadonyo nono oudo tie mita ot are kiwie kany, kede laco mere oudo tie mita tomon kiwie are kede dul.

²⁶Kayito iye oudo kogero iye kakame konyono me yito enyiriri kanyaare ot malo i ekeko, di agola mere alac me kadonyo tie i bad me yie kakame neeno kede diakal. Oudo kogoro cal me tugere i apamai mege me yie kame riere i lak kabeo.

²⁷I bad tetu noni da, oudo tie iye erute ace kame donyo i diakal me yie. En eko pimo dierediere me erute me ooko kede erute me yie nono, di boro mere oko bedo mita ot kany.

²⁸Icuo nono oko tera i diakal me yie di obeo ki erute me bad tetu piny. En eko pimo erute me bad tetu piny nono, eko bedo rom aroma kede irutei apat da.

²⁹Agolai mege me jodar, agola mere alac me kadonyo, apamai mege me yie oudo rom aroma kede me irutei apat. Dirisan oudo tie i yie rimaro, kede da i agola mere alac me kadonyo. Boro mere dedede oudo tie mita ot are kiwie kany, kede laco mere oudo tie mita tomon kiwie are kede dul.

³⁰

³¹Agola mere me kadonyo oudo neno diakal aoko, di kogoro cal me tugere i kor apamai mege ariere i lak kabeo tuni tuni. Kayito iye oudo kogero iye kakame konyono me yito enyiriri kanyauni ot malo i ekeko.

³²Icuo nono oko tera i diakal me yie di obeo ki erute me bad tetu kide. En eko pimo erute me bad tetu kide nono, eko bedo rom aroma kede irutei apat da.

³³Agolai mege me jodar, agola mere alac me kadonyo, apamai mege me yie oudo rom aroma kede me irutei apat da. Oudo dirisan tie i yie rimaro, kede da i agola alac me kadonyo. Boro mere dedede oudo tie mita ot are kiwie kany, kede laco mere oudo tie mita tomon kiwie are kede dul.

³⁴Agola mere alac me kadonyo oudo neno diakal aoko, di kogoro cal me tugere i kor apamai mege ariere i lak kabeo tuni tuni. Kayito iye oudo kogero iye kakame konyono me yito enyiriri kanyauni ot malo i ekeko.

³⁵Icuo nono oko tera i erute me bad tetu malo. En eko pimo erute nono, eko bedo rom aroma kede irutei apat da.

³⁶Agolai mege me jodar, agola mere alac me kadonyo, apamai mege me yie oudo rom aroma kede me irutei apat da. Oudo dirisan tie iye rimaro. Boro mere dedede oudo tie mita ot are kiwie kany, kede laco mere oudo tie mita tomon kiwie are kede dul.

³⁷Agola mere alac me kadonyo oudo neno diakal aoko, di kogoro cal me tugere i kor apamai mege ariere i lak kabeo tuni tuni. Kayito iye oudo kogero iye kakame konyono me yito enyiriri kanyauni ot malo i ekeko.

³⁸I diakal aoko oudo tie iye agola moro kame koropo i kom erute me yie me bad tetu malo. Ekeko mere oudo tie i agola alac me kadonyo, kame oudo neeno kede diakal. Kanono oudo kolwoko kiye ringo me leini kame komio bala giayala awanga alutu.

³⁹I agola alac me kadonyo nono oudo tie iye imesai ongwon, are i bad tetuni kede bobo are i bad tetuca. Imesai nogo en kame oudo kongolo iye leini me giayala awanga, giayala me kwanyo dub kede giayala me timo cul.

⁴⁰Oudo imesai ongwon ace tie i diakal nono, are i bad tetucel kede are i bad tetu ocelu me kayito i agola alac me kadonyo me erute nono.

⁴¹Gin dedede oudo kitie imesai kanyauni kame kongolo iye giayala, ongwon i yie kede ongwon ooko i diakal i nget ekeko me erute.

⁴²Oudo doko da tie imesai ace ongwon kobedo kide kame kopao me temuno giayala kame kowango alutu. Oudo boco gi malo tie sentimita ot kany, di wi gi i bad dedede tie sentimita ot kanyaare kiwie kany. Jamini dedede kame oudo kotio kede gi me neko leini me giayala oudo koketo i wi imesai nogo.

⁴³Oudo koguro ibaon atitino kame laco gi oudo tie milimita ot kanyaare kiwie kany i kor apama nono rimaro i yi ot. Ringo koudo obedo giayala oudo koketo i wi imesai nogo.

⁴⁴Di eko tera i diakal me yie, kakame oudo tie iye agolai are kame oudo twolo paka i diakal nono. Acel oudo tie i nget erute me bad tetu malo di doge neno bad tetu piny, kede acel oudo tie i nget erute me bad tetu piny di doge neno bad tetu malo.

⁴⁵En eko waco na be agola kame nyime oudo neno bad tetu piny oudo obedo me ka josaseredoti kame tio i tempulo,

⁴⁶kede agola kame nyime oudo neno bad tetu malo oudo obedo me ka josaseredoti kame oudo tio i alutari. Josaseredoti nogo dedede oudo obedo ikwae ka Sadoki, pien gin kenekene kikom ikwae ka Lebi en kame koyei negi noko Rwot pi timo ne tic.

⁴⁷Icuo nono oko pimo diakal me yie eko bedo mita ot kany ki bad dedede. Tempulo oudo tie i bad tetu tim, di alutari tie i nyime.

⁴⁸Di eko tera i agola me kadonyo i tempulo. En eko pimo ekeko mere eko udo laco mere tie mita kanyaare kede boro mere mita are kede dul, di bimirir me apama mere tie mita acel kede dul i bad tuni tuni.

⁴⁹Kayito i agola me kadonyo i tempulo nono oudo kogero iye enyiriri me jo nyono me yito; oudo laco mere tie mita tomon kede boro mere mita kanyape. Oudo tie i doge kanono ipirin are i bad tetuni kede i bad tetuca.