Read kumam Esekeri 41 Bible Online

Esekeri 41 - kumam bible

Esekeri 41

¹Alubo mere icuo nono oko tera i agola me diere me tempulo, en Kabedo Kacil. En eko pimo kakame kodonyo kede iye, oudo boro mere tie mita adek

²kede laco mere mita kany, di bimirir me apama mere i bad tetuni kede tetuca tie mita are kede dul. Boro mere oudo tie mita ot are kede laco mere mita tomon.

³Di eko ot i agola me yie kalamo, di eko pimo kadonyo iye; oudo boro mere tie mita acel kede laco mere mita adek, di bimirir me apama mere i bad tetuni kede tetuca tie mita adek kede dul.

⁴En eko pimo agola nono, eko bedo mita tomon ki bad dedede. Agola nono oudo tie anyim me agola me diere. En eko waco na be, “Man en Kabedo Kacil Kalamo.”

⁵En eko pimo bimirir me apama me tempulo, eko bedo mita adek. I kom apama noni i yie oudo kogero iye agolai rimaro yi tempulo, kame laco gi oudo tie mita are.

⁶Agolai nogi oudo tie goropan adek ot malo, di dier ot acelacel tie kede agolai ot adek. Apama me ooko me tempulo me dier ot acelacel oudo titidi kalamo me dier ot atie piny mere, tetekeny agolai nogo karuno cungo i wi apama abongo ridakino gi iye.

⁷Pi manono, kame oudo ineno apama me tempulo ki ooko, oudo ineno bala bimirir mere rorom paka tuno i wie malo. Ingei agolai nogo i ooko oudo kogero iye kayito are alac, tetekeny dano oudo twero yai ki ude me piny tuno i goropa me diere paka tuno i me malo.

⁸Apama me ngei agolai nogo oudo bimirir gi tie mita are kede dul. Ekeko oudo tie acel adonyo i agolai kame tie i bad tetu malo me tempulo, kede acel kame donyo i agolai me bad tetu piny. Tie oudo kakame kotoro atek kame laco mere tie mita are kede dul rimaro tempulo; boro mere malo oudo tie mita adek yai ki wi lobo, en oudo koribe eporere kede acakini me apama me agolai i kom apama me tempulo. Kakatwolo atie i dierediere me apama me ngei agolai me tempulo kede agolai me josaseredoti atie i diakal oudo boro mere romo mita tomon.

¹²I ajikini me kakatwolo i bad tetu tim me tempulo oudo tie iye gedo kame boro mere tie mita ot ongwon kiwie kany, kede laco mere mita ot adek. Apama mere rimaro bimirir mere oudo tie mita are kede dul.

¹³Icuo nono oko pimo boro me tempulo, eko bedo mita ot kany. Cako ki apama me ngei tempulo, ngolo kakatwolo tuno i apama me ngei ot kame tie i bad tetu tim me tempulo oudo da tie mita ot kany.

¹⁴Boro me nyim tempulo i bad tetu kide, ribo kiton kakatwolo kodong i ngete tetuni kede tetuca, oudo da tie mita ot kany.

¹⁵En eko pimo boro me tempulo i bad tetu tim, ribo kiton kakatwolo me ngete tetuni kede tetuca, manono da oko bedo mita ot kany. Agola me kadonyo i tempulo, Kabedo Kacil, kede Kabedo Kacil Kalamo

¹⁶oudo konamo iye ibaon paka tuno i dog dirisan. Dirisan nogo oudo kotwero cego.

¹⁷Apama me yi tempulo rimaro lung paka tuno malo kalamo wi ikekon oudo oumere kede cal kame kogoro iye.

¹⁸Magonogo oudo obedo cal me tugere kede cerubim, buli cal me tugo i dierediere me cal are me cerubim. Buli cerubim oudo tie kede nyime are:

¹⁹Nyime tetucel koudo obedo cal me nyim dano oudo neno cal me tugo me bad tetucel, doko nyime tetucel da koudo obedo cal me nyim engu oudo neno cal me tugo me bad tetu ocelu. Oudo etie kamanoni rimaro apama me yi tempulo lung,

²⁰cako ki dier ot piny tuno malo kalamo wi ikekon.

²¹Purem me ekeko adonyo i Kabedo Kacil oudo rorom ki bad dedede. I nyim ekeko kame donyo i Kabedo Kacil oudo tie iye gimoro acal bala

²²alutari me ebao. Oudo boro mere malo tie mita acel kede dul, kede laco mere oudo tie mita acel. Ipirin mege me isondana, dude piny kede ngete oudo kotimo kede ibaon. En eko waco na be, “Man en emesa acungo i nyim Rwot.”

²³Ikekon kame donyo i Kabedo Kacil kede i Kabedo Kacil Kalamo, acelacel oudo opokere tien are.

²⁴Gin oudo kibedo ikekon kame yabere ki diere di kiko dole.

²⁵Oudo kogoro cal me tugere kede cerubim i kom ikekon da, bala kame oudo kotimo i kor apamai. Oudo konanamo ibaon piny ooko i nyim agola me kadonyo i tempulo.

²⁶Apamai me agola nono oudo tie kede dirisan, doko oudo cal me tugere tie iye.