Read kumam Esekeri 44 Bible Online

Esekeri 44 - kumam bible

Esekeri 44

¹Di icuo nono oko dwoka i erute me ooko me bad tetu kide me tempulo. Oudo erute nono ocegere

²di Rwot oko waco na be, “Erute noni bino dong di ecegere, likame kobino yabe. Likame tie ngatamoro kame bino donyo kiye, piento ango Rwot Rubanga me Isirael atieko donyo kiye; pi manono en epoore dong di ecegere.

³Kenekene ngapug me Isirael, piento en ebedo ngapug, en kame karuno ot bedo kunono di eko camo cam kacil i nyima. En miero edonyi ki agola alac me kadonyo atie i bad me yie, di eko dok da di ebeo ki kanono.”

⁴Icuo nono oko tera i nyim tempulo di obeo ki erute me bad tetu malo. Ango aneno yi tempulo ka Rwot di opong kede rieny me deyo mere, di ango ako poto ariebacuny.

⁵Rwot oko waco na be, “Wot ka dano, ngii kiber, doko da cik yiti i kom gi dedede kame ango abino waco ni amakere kede iswilia me tempulo na. Niangi kiber i kom jo kame poore donyo i tempulo kede jo kalikame poore donyo iye.

⁶“Wac ne jojemo me Isirael go be ango Rwot Rubanga atie waco kaman: wun jo me Isirael poore ijikunu tice kingorijij kame ibedunu timo.

⁷Wun ibedunu gamo i tempulo na jokumbor kalikame kokepo kede kalikame winya; igamunu gi i tempulo na i esawa kame kotie mina kede giayala me kakamio kede me remo. Pi manono wun itiekunu turo isikan na kede wu pi tice wu kingorijij kame ibedunu timo.

⁸Wun likame igwokunu cik amako giamia kacil i tempulo na, do ilunyunu keto tic nono i cing jokumbor.

⁹“Ango Rwot Rubanga atie waco kaman: likame tie ngakumbor moro kalikame kokepo kede kalikame winya, kame bino donyo i tempulo na. Manoni ribo kiton jokumbor kame bedo i diere me jo Isirael.”

¹⁰Rwot oko waco na be, “Jolebi mogo oparao tenge kibuta di kiko donyo woro caljwogi karacel kede jo ace me Isirael. Ango atie mino gi alola pi manono.

¹¹Gin kibino bedo jotic me tempulo, jo kame daro irutei mege kede kame timo tic i yie. Gin kitwero neko leini kame jo okelo bala giayala, kede da timo tic me konyo jo atie i tempulo wora.

¹²Do pi kite kame gin kiko telo kede tic kakame jo me Isirael oudo tie kede woro caljwogi, di kiko mino jo me Isirael odonyo i dub, ango Rwot Rubanga akwongere be kibino udo alola.

¹³Likame gin kibino noka pi timo na tic bala josaseredoti, akadi noko giamia kacil kame komio buta, gin giamia kacil kalamo; do miero gin kiyei lewic kede alola pi tim kingorijij kame gin kitimo.

¹⁴Do ango atie mino tice me tempulo i cing gi, pi timo tice atek me ruom apiny dedede kame kopoore timo iye.”

¹⁵Rwot Rubanga oko waco be, “Josaseredoti Jolebi kobedo ikwae ka Sadoki oudo oko timo tic i tempulo na kede genere kakame jo me Isirael oparao kede kibuta. Pi manono nan gin en kame kibino noka pi timo na tic; gin kibino donyo yalo na kakamio kede remo me giayala.

¹⁶Gin en kame kibino donyo i tempulo na, di kiko yalo giayala i alutari na, kede telo tic me wora i tempulo.

¹⁷Ka gin kitie donyo ki erute adonyo i diakal me yie me tempulo, gin kipoore ngapo igoen atar liamaliam. Likame gin kipoore ngapo gimoro kame kotimo kede yer ka kitie tic i diakal me yie amoto i yi tempulo.

¹⁸Igoen kame kidodolo i wi gi kede ipalen gi me yie da poore bedo igoen atar liamaliam; doko da likame kibino tweno pier gi pi gengo kwok mako gi i esawa me tic.

¹⁹Kame gin kitie ot i diakal aoko but jo, gin kibino gonyo igoen kame oudo kitie tic kede i yi tempulo di kiko weko gi i agolai kacil. Di do gin kiko ngapo igoen apat, tetekeny kur ngatamoro mak egoe kacil di eko udo peko.

²⁰Likame gin kibino lielo wi gi, doko da likame kibino yei ne yer wi gi bedo bocoboco kalamo; gin kibino bedo nyaro yer wi gi jik i rom amitere.

²¹Likame tie ngasaseredoti moro kame poore mato bwini kame etie donyo i diakal me yie me tempulo.

²²Likame gin kibino nyomere kede mon kobedo apuserun, arabo mon kopokere kede cwog gi; kenekene gin kibino nyomere kede anyira me ateker me Isirael kalikame pwodi ongeo cuo, arabo kede apuserun koudo obedo mon me josaseredoti.

²³Gin kibino pwonyo jo na apokapoka atie i diere me gikacil kede jamini apat, di kiko nyuto negi epone me poko gikame opwokere kede kalikame opwokere.

²⁴Kame jo tie kede atwomutwomun, gin kibino bedo bala jongolkop, di kiko ngolo kop di lubere kede iswilia na. Gin kibino donyo lubo iswilia na dedede amako ceng adongo kame kotieko moko me edini, doko da kibino gwoko ceng Sabato bedo cil.

²⁵Likame ngatamoro kibut gi bino munao kome i yore me ot i nget dano oto, kwanyo di dano nono obedo nganywal mere, atin mere, amoto omi mere arabo ami mere kalikame konyomo.

²⁶Kame en epwokere i yore nono di do ingei manono en eko doko dano kolony, en epoore daro pi ceng kanyaare

²⁷di eko ot i diakal me yie me tempulo pi mino giayala mere me kwanyo dub; ango Rwot en awaco.

²⁸“Ango en atie bala iner me josaseredoti; likame gin kibino udo iner me lobo moro i Isirael; ango en girgi amako gi.

²⁹Gin kibino camo giamia me alos, giayala me kwanyo dub, kede giayala me timo cul; doko da gin kibino tero gi dedede kame kopoko tenge pirango i Isirael.

³⁰Josaseredoti bino tero kakaber kalamo me kodere dedede acako cek, kede me giamia buta me egere dedede. Kame jo otedo mugati, kipoore mino josaseredoti mugati acako cek, di ango ako bino mino winyo i miere gi.

³¹Josaseredoti likame bino camo winyo moro arabo le moro oto kene, arabo kame le moro en oneko.”