Read kumam Esekeri 46 Bible Online

Esekeri 46 - kumam bible

Esekeri 46

¹Rwot Rubanga waco be, “Erute me bad tetu kide adonyo i diakal me yie bino dong di ocegere pi ceng kanyape kame jo timo iye tice, do kobino donyo yabe i ceng Sabato kede i ceng me Ebaga me Por Duwe.

²Ngat atie i pug bino wok ki diakal aoko di eko donyo i agola me kabeo atie i erute me yie, di eko cungo i nget ipirin me erute, di ngasaseredoti tie mino giayala awanga kede giayala me nywak. Ngapug nono bino dong luro wie i erute kanono pi wora di eko bobo dok ooko, do likame kobino cego erute nono paka tuno otieno.

³I ceng Sabato acelacel kede i ceng me Ebaga me Por Duwe, jo dedede poore luro wi gi piny i nyim erute nono pi wora.

⁴“I ceng Sabato ngapug bino kelo idwe romini kanyape kalikame tie kede peko moro i kom gi, kede emerekek acel kalikame tie kede peko moro i kome, pi yalo gi buta bala giayala awanga.

⁵Giayala me alos kame upere kede emerekek bino bedo kilo kanyangon, do atin romo acelacel bino upere kede alos kame cunye owinyo kwanyo. Epoore da mino mo me olibeti lita adek kame bino upere kede buli kilo kanyangon me alos.

⁶I ceng me Ebaga me Por Duwe en ebino kwanyo giayala me etobait, idwe romini kanyape, kede emerekek acel, gin dedede di likame kitie kede peko moro i kom gi.

⁷Buli twon acelacel kede emerekek en ebino yalo gi kede kilo kanyangon me alos; do atin romo acelacel bino upere kede alos kame cunye owinyo kwanyo. Epoore da mino mo me olibeti lita adek kame bino upere kede buli kilo kanyangon me alos.

⁸Kame ngapug tie donyo, en ebino donyo ki agola me kabeo me erute, doko ka etie wok da ebino dok elubo kanono.

⁹“Kame jo obino pi wora i ceng adwong moro me ebaga, jo kame bino donyo ki erute me bad tetu malo poore wok ooko ki erute me bad tetu piny; doko da jo kame bino donyo ki erute me bad tetu piny poore wok ooko ki erute me bad tetu malo. Likame dano moro poore wok ooko di ebeo ki erute kame edonyo kede i yie, do epoore pororo ki erute kame pimere kede manono.

¹⁰Ngapug bino donyo karacel kede jo kame jo tie donyo, doko da ebino wok karacel kede jo kame jo tie wok.

¹¹I ceng adongo dedede kede i ceng me ibagai kobino yalo buli twon arabo emerekek kede kilo kanyangon me alos. Do atin romo acelacel bino upere kede alos kame cuny dano acelacel owinyo kwanyo. Epoore da mino mo me olibeti lita adek kame bino upere kede buli kilo kanyangon me alos.”

¹²“Kame ngat atie i pug mito mino giayala buta i mit mere kene, cengemogo giayala awanga amoto giayala me nywak, kobino yabo ne erute me bad tetu kide adonyo i diakal me yie. En eko bino mino giayala mere bala kame etimo kede i ceng Sabato, di oko bino bobo cego ekeko me erute ka en etieko wok ooko.”

¹³Rwot waco be, “Ceng acelacel ipoore kwanyo atin romo me mwaka acel kame kobino mina bala giayala awanga; likame epoore bedo tie kede peko moro i kome. Kopoore timo giayala noni ceng dedede.

¹⁴Doko da odiko acelacel kopoore mino giayala me kilo are me alos, karacel kede lita acel me mo me olibeti me nyonge. Iswil amako giayala noni buta bino cungo pi kare dedede.

¹⁵Atin romo, giamia me alos, kede mo me olibeti kobino bedo kwanyo buli odiko acelacel pi bedo giayala awanga buta kalikame keng.”

¹⁶Rwot Rubanga waco be, “Ka ngat atie i pug omio lobo mere moro but wode moro bala mic, lobo nono bino doko me ka wode nono kede ikwae mege atwal.

¹⁷Do ka ngat atie i pug omio lobo mere moro but ngatic mere moro, lobo nono bino doko me ka ngatic nono tuno i mwaka me dwoko jamini but wegi, di oko bino dwoke but ngapug. Lobo nono obedo mere, awobe mege kenekene en kame karuno tere me atwal.

¹⁸Ngat atie i pug likame poore riamo jo ki lobere gi di en eko tero gi; en ebino mino awobe mege lobo ki meren amake, tetekeny kur emai jo lobere gi.”

¹⁹Di icuo nono oko tera obeo ki kadonyo moro koudo tie i nget erute di oko tuno i agolai kame nyim gi neno bad tetu malo, magonogo obedo agolai kacil me josaseredoti. En eko nyuto na karamoro koudo tie i bad tetu tim me agolai nogo

²⁰di eko waco na be, “Mano en kakame josaseredoti bino donyo tedo kiye ringo me giayala me kwanyo dub, arabo me giayala me timo cul, amoto giayala me alos. Etie kamanono tetekeny kur ter gimoro kobedo gikacil i diakal aoko di cengemogo jo ko udo peko pi mule.”

²¹Di eko dwoka i diakal aoko, di eko tela obeo i isondana ongwon me diakal nono; di ako neno i buli esonda acelacel diakal moro atitidi kame boro mere tie mita ot are, kede laco mere mita tomon kiwie kany.

²³Buli acelacel oudo koluko kede apama me kide, di apama nono tie kede kenere me moko mac i dude piny rimaro.

²⁴En eko waco na be, “Mago en pimbiron kakame jotic me tempulo tedo kiye giayala me jo.”