Read kumam Esekeri 48 Bible Online

Esekeri 48 - kumam bible

Esekeri 48

¹Magi en nying ikekon me ateker me Isirael: Cako ki ikor me bad tetu malo, jo me ekeko ka Dan bino tero adul acel; en ebino lubo yongayo adwong me Ketelon tuno Lebo Kamat, di eko tuno i bomba me Kasar Enon, tuno i ikor apoko Damasiko kede Kamat. Adul nono dedede yai ki ikor me bad tetu kide dok i bad tetu tim tuno i nam adwong me Mediterania bino bedo me jo me ekeko ka Dan.

²Jo me ekeko ka Aser bino tero adul acel; en ebino gongere kede lobo me jo me ekeko ka Dan cako ki bad tetu kide tuno i bad tetu tim.

³Jo me ekeko ka Naputali bino tero adul acel; en ebino gongere kede lobo me jo me ekeko ka Aser cako ki bad tetu kide tuno i bad tetu tim.

⁴Jo me ekeko ka Manase bino tero adul acel; en ebino gongere kede lobo me jo me ekeko ka Naputali cako ki bad tetu kide tuno i bad tetu tim.

⁵Jo me ekeko ka Epuraimu bino tero adul acel; en ebino gongere kede lobo me jo me ekeko ka Manase cako ki bad tetu kide tuno i bad tetu tim.

⁶Jo me ekeko ka Ruben bino tero adul acel; en ebino gongere kede lobo me jo me ekeko ka Epuraimu cako ki bad tetu kide tuno i bad tetu tim.

⁷Jo me ekeko ka Yuda bino tero adul acel; en ebino gongere kede lobo me jo me ekeko ka Ruben cako ki bad tetu kide tuno i bad tetu tim.

⁸Adul agongere kede lobo me jo me ekeko ka Yuda, cako ki bad tetu kide tuno i bad tetu tim, bino bedo lobo kame wun ibinunu poko di ikounu weko. Laco mere yai ki bad tetu malo tuno i bad tetu piny bino bedo kilomita tomon kiwie are kede dul, boro mere da yai ki bad tetu kide tuno i bad tetu tim bino bedo kamanono, di erom aroma kede dul kame komio jo me ekeko acelacel. Kanoni en kame kobino gero iye tempulo.

⁹I adul noni, ibinunu mina lobo kame boro mere tie kilomita tomon kiwie are kede dul, di laco mere tie kilomita tomon.

¹⁰Josaseredoti bino udo dul me lobo i kabedo kacil noni. Cako ki bad tetu kide tuno i bad tetu tim lobo gin boro mere bino bedo kilomita tomon kiwie are kede dul, di laco mere yai ki bad tetu malo tuno i bad tetu piny ko bedo kilomita kany. Tempulo nango bino cungo i cuny lobo noni.

¹¹Kanoni bino bedo pi josaseredoti kobedo ikwae ka Sadoki. Gin bin kidong jo agenere buta kakame Jolebi kede jo ace me Isirael oparao kede tenge kibuta.

¹²Aso, gin kibino tero dul apire tek noni, en agongere kede adul ka Jolebi; en ebino bedo dul kacil kalamo.

¹³Jolebi da bino tero dul moro me lobo apire tek nono. Dul kame gin kibino tero bino bedo i bad tetu piny me dul kame josaseredoti otero. Eda ebino bedo kilomita tomon kiwie are kede dul yai ki bad tetu kide tuno i bad tetu tim, di laco mere ko bedo kilomita kany yai ki bad tetu malo tuno i bad tetu piny.

¹⁴Likame gin kibino cato karamoro kiye arabo seso, arabo mino ngatamoro lobo aber nono, piento en kabedo kacil kobedo mera.

¹⁵Kabedo kodong me adul apire tek nono, kame boro mere tie kilomita tomon kiwie are kede dul, di laco mere tie kilomita are kede dul, likame obedo kabedo kacil. En etie pi jo me Isirael timo iye gikame gin kimito. Gin kitwero donyo bedo kagamogo di kagamogo ko dong nono. Bomba bino bedo tie i cuny dul nono.

¹⁶Bomba nono bino bedo rorom ki bad dedede, bad acelacel kilomita are kede mita tol are kede ot kany (250).

¹⁷Kakatwolo alaco mere tie mita tol acel kede ot are kiwie kany (125) bino luko bomba nono ki bad dedede.

¹⁸Ingei gero bomba, kakame bino dong iriria i bad tetu piny me dul kacil bino bedo kapur me jo abedo i bomba; boro mere bino bedo kilomita kany di laco mere tie kilomita are dok i bad tetu kide, doko da ebino bedo rom kamanono dok i bad tetu tim.

¹⁹Jo dedede kame bedo i bomba, abongo popoko ikekon me anywali gi, bino puro lobo nono.

²⁰Aso, dul me lobo kame kobino poko di oko weko bino bedo kilomita tomon kiwie are kede dul ki bad dedede, di eribo kiton lobo me bomba da.

²¹Kakame bino dong i bad tetu kide kede i bad tetu tim me dul kacil kame tempulo tie iye, lobo me josaseredoti, lobo me Jolebi, kede lobo me bomba, bino bedo me ka ngapug. I bad tetu kide en ebino ot paka tuno i ikor me bad tetu kide, kede i bad tetu tim en ebino ot paka tuno i nam adwong me Mediterania. I bad tetu malo en egongere kede adul ka jo me ekeko ka Yuda, kede i bad tetu piny en egongere kede adul ka jo me ekeko ka Benjamin.

²³Pi jo me ikekon apat kodong: jo me ekeko ka Benjamin bino tero adul acel; en ebino cakere ki bad tetu kide tuno i bad tetu tim.

²⁴Jo me ekeko ka Simeon bino tero adul acel; en ebino gongere kede lobo me jo me ekeko ka Benjamin cako ki bad tetu kide tuno i bad tetu tim.

²⁵Jo me ekeko ka Isakar bino tero adul acel; en ebino gongere kede lobo me jo me ekeko ka Simeon cako ki bad tetu kide tuno i bad tetu tim.

²⁶Jo me ekeko ka Sebulun bino tero adul acel; en ebino gongere kede lobo me jo me ekeko ka Isakar cako ki bad tetu kide tuno i bad tetu tim.

²⁷Jo me ekeko ka Gad bino tero adul acel; en ebino gongere kede lobo me jo me ekeko ka Sebulun cako ki bad tetu kide tuno i bad tetu tim.

²⁸I bad tetu piny me adul me jo me ekeko ka Gad, ikor yai ki Tamar tuno i pii me Kades Meriba; ki kanono eko dero aditot kobedo ikor me Misiri tuno i nam adwong me Mediterania.

²⁹Manoni en epone kame ibinunu popoko kede lobo i adulion ne jo me ikekon dedede me Isirael, ango Rwot en awaco.

³⁰Bomba me Yerusalem bino bedo tie kede irutei tomon kiwie are. Acelacel kikom apamai ongwon koluke boro mere bino bedo kilomita are kede mita tol are kede ot kany (250), di buli acelacel tie kede irutei adek. Irutei nogo dedede kobino cako negi nying ikekon tomon kiwie are me anywali me ateker me Isirael. Irutei me bad tetu malo kobino cako negi nying Ruben, Yuda, kede Lebi; irutei atie i apama me bad tetu kide kobino cako negi nying Yosepu, Benjamin kede Dan; irutei atie i apama me bad tetu piny kobino cako negi nying Simeon, Isakar kede Sebulun; irutei atie i bad tetu tim kobino cako negi nying Gad, Aser kede Naputali.

³⁵Boro me apamai ongwon koluko bomba nono ka koriribo bino bedo kilomita kanyangon. Nying anyen kame kobino mino bomba nono en, “Rwot Tie Kan!”