Read kumam Esekeri 6 Bible Online

Esekeri 6 - kumam bible

Esekeri 6

¹Rwot oko yamo keda.

²En ewaco be, “Wot ka dano, lok nyimi nen tetu mori me Isirael di iko murao kop i kom gi.

³Wac negi kaman: Wun mori me Isirael, winyunu kop ka Rwot Rubanga! Rwot Rubanga tie waco ne mori kede imukuran, isamai kede aditoto kaman: ango kikoma abino kelo yi i komu, di oko dudubo kabedere kame jo woro iye caljwogi.

⁴Kobino mumuko alutarin wu, di oko tuturo alutarin me wango odok angwe kur. Jo dedede kame tie kunono kobino neko i nyim caljwogi gi.

⁵Ango abino mino liele me jo me Isirael rade i nyim caljwogi gi; di ako sasaro cogere gi rimaro alutarin.

⁶Kabedere dedede kame jo Isirael bino bedo iye, bomban gi bino dong nono, doko kabedere gi me woro caljwogi kobino muducaro. Caljwogi gi kobino tuturo di oko muducaro, doko alutarin gi me wango odok angwe kur kobino tongotongo piny, di oko bino mino gi dedede kame gin oudo kitimo rwenyo atwal.

⁷Kom jo oto bino rade i diere gi, di gin kiko bino ngeno be ango en Rwot.

⁸“Do ango abino weko jo mogo dong kuo. Jo mogo kikom gi bino bwot di gin kiko sasarun i diere me atekerin i pinye apapat.

⁹Jo kame bino bwot kikom gi bino yutuno ango i diere me atekerin kakame kotero gi iye bala mabus. Gin kibino yutuno kite kame oudo kimia kede twon lewic pi mit me cuny gi kolokere tenge ki buta, kede imiela atie i wang gi oko mino gin kilokere but caljwogi. Di do gin kiko bino nenere ken gi di kiko bedo kede acae i kom gi ken gi pi gikareco kame gin kitimo, kede pi tim gi dedede kame reco.

¹⁰Gin kibino ngeno be ango en Rwot. Ango likame oudo angato negi me nono be abino kelo can i kom gi.”

¹¹Rwot Rubanga waco be, “Dodongunu koru! Didipunu piny kede tien wu! Kokunu pi can, pi tim areco dedede kame jo me Isirael otieko timo. Gin kibino to i yi, kibino to kec kede tuwo me aumpuli.

¹²Jo kame tie kakabor tuwo me aumpuli bino neko gi; jo kame tie kabedere kiyapiyapi bino to i yi; jo kame bino bwot dong kuo bino to kec. Manono en kite kame ango abino bwoto kede gero na i kom gi.

¹³Liele gi bino buto i nget caljwogi gi, i nget alutarin gi, i wi imukuran dedede, i wi mori dedede, i dud yen koduko dedede, i dud yen oak koduko dedede, i kabedere lung kame gin oudo kimio iye giayala angwe kur but caljwogi gi.

¹⁴Ango abino tic i kom gi kede twer na, di ako mino lobo gi doko ameje, kabedo kalikame jo bedo iye. Abino timo manono i kabedere dedede kame gin kibedo iye, cako ki wi tim tuno Ribula. Di do gin kiko bino ngeno be ango en Rwot.”