Read kumam Esekeri 8 Bible Online

Esekeri 8 - kumam bible

Esekeri 8

¹I buto duwe kany me duwe me kanyape i mwaka me kanyape me wan bedo obukui bala mabus, di oudo ango atie bedo i oda karacel kede joadongo me Yuda, cucuto twer ka Rwot oko bino i koma.

²Ango ako ngoloro, di ako neno gimoro kame cal bala dano. Cako ki piere dok piny aneno iye gimoro kame cal bala mac, doko cako ki piere dok malo ango aneno iye gimoro kame cal bala nyonyo ameny.

³En eko rieno gimoro kame cal bala cing dano, di eko mako yer wia. I gianyuta nono tipo ka Rubanga oko tinga malo i yamo di eko tera Yerusalem, i erute kame donyo i diakal me yie, kame oudo tie i bad tetu malo, kakame oudo oketo iye caljwogi kame oudo mio nyeko mako Rubanga kitek.

⁴Ango ako neno rieny me deyo ka Rubanga, bala kame oudo aneno i nget ecilet me Kebar.

⁵Di do Rubanga oko waco na be, “Okwe wot ka dano, kong ting wangi di iko neno bad tetu malo.” Ango ako ngoloro bad tetu malo kunono, di ako neno caljwogi kame oudo mio nyeko mako Rubanga tie i nget erute kame donyo kakame alutari tie iye.

⁶Rubanga oko waco na be, “Wot ka dano, mam ineno gikame gin kitie timo. Manono en gi me kwer kame jo me Isirael tie timo kan, gikame tie riama tenge kakabor ki kabedo na kacil. Do pwodi ibino medo neno gikareco kalamo kano.”

⁷Di en eko tera i dogola kame donyo i diakal; ango ako ngoloro, di ako neno kakotuc i apama.

⁸En eko waco na be, “Wot ka dano, kuny kor apama ituci.” Kakame ango ako kunyo kede kor apama, ako udo ekeko moro tie iye.

⁹En eko waco na be, “Donyi, di iko neno gikareco, tim aneno rac kame gin kitie timo kanoni.”

¹⁰Aso, ango ako donyo di ako neno gikame oudo tie kunono. I kor apama rimaro oudo ogo iye cal me gi dedede kame liao alia, kede me leini mogo kame neno rac, kede cal me caljwogi dedede kame jo Isirael oudo tie woro.

¹¹Joadongo ot kanyaare me Isirael oudo tie cungo i nyim gi, kiton Yasania wot ka Sapan da oudo tie cungo karacel kede gin. Ngat acelacel kikom gi oudo tie mako gi me dunyo odok angwe kur, di yiro angwe kur duny kiye eoto malo.

¹²Rubanga oko waco na be, “Wot ka dano, mam ineno gikame jotel me Isirael tie timo i mung i kakacol, ngat acelacel i agola mere me caljwogi. Gin kitie waco be, ‘Rwot gire likame neno wa! En etieko jalo lobo noni.’ ”

¹³Rwot oko waco na be, “In iyaro pwodi neno gikareco kame gin kitie timo, kame kalamo kano.”

¹⁴Aso, en eko tera i erute me bad tetu malo me tempulo. Mon mogo oudo tie bedo kunono di kitie koko rubanga Tamus.[1]

¹⁵Rwot oko waco na be, “Wot ka dano, mam ineno mano. In pwodi iyaro neno twon tim mogo me kwer areco kalamo mago.”

¹⁶Di en eko tera i diakal me yie me tempulo. Ango ako neno cuo kame romo ot are kiwie kany, di kitie i nget ekeko me kabedo kacil, i dierediere me alutari kede agola me kadonyo. Gin oudo kiloko ne tempulo ka Rwot ngei gi, di kiriebere piny nyim gi oneno tetu kide, kitie woro ceng kame tie wok.

¹⁷Rwot oko waco na be, “Wot ka dano, mam ineno mano da. Etie gikarac twatwal pi jo me Yuda timo tim areco kacal kamago kan. Do manono likame pwodi romo gi. Gin bobo da kitieko nyano tim me gero i lobo di kiko medo wango cunya. Neningo kite kame kitie nywara kede nywar kokato kare.

¹⁸Pi manono, ango abino tic kede gi di alilo. Ango likame abino weko gi aweka, akadi bedo kede cuny me kisa but gi. Akadi gin kikok buta kede dwan amalo, ango likame abino winyo koko gi.”