Read kumam Danieri 11 Bible Online

Danieri 11 - kumam bible

Danieri 11

¹I mwaka me agege me apugan ka Darias me Mede, ango kikoma acungo konye di ako mine teko.

²“Nan ango amito waco ni kop me ateni.” Malaika nono oko waco be, “Abakai adek ace bino pugo Pasia. Abaka me ongwon mere bino bedo ngat kobaro kalamo gin dedede, di do kakame ebino tieko doko tek kede pi abar mare, en eko bino supo jo dedede i kom ajakanut me Guris.

³“Di abaka kobedo ngayi ko bino bino, di eko pug kede loc adwong di etimo gi dedede bala kame cunye mito.

⁴Do kakame twer mere pwodi tie meede dongo kede, ajakanut mere bino tur di eko popokun i adulion ongwon. Abakai kalikame obedo nywal me ode en kame bino pug kawange, do likame kibino bedo kede twer kame en oudo etie kede. Kobino kwanyo ajakanut ki cinge di oko mino jo apat.

⁵“Abaka me Misiri bino doko tek. Do akadi kamanono da, ngat acel kikom jodongo mege me isirikalen bino doko tek kalamo di en eko pugo ajakanut adwong kalamo mere.

⁶Ingei mwakini mogo gin kiko bino winyere pi aribakin, di abaka me Misiri ko bino mino abaka me Siria nyare me anyoma pi moko winyere gi nono. Do winyere gi nono likame bino bedo pi kare alac, di dako nono, kede cware, kede atin mere, kede jotic mege koupere kede, oko bino neko.

⁷I kare nogo, dano moro kobedo anywali me ot ka papa me dako nono bino doko abaka. En ebino suro isirikalen ka abaka me Siria di eko donyo i apama kame kigero atek me gwokere di eko bwono gi.

⁸En eko bino yako cal me rubangan gi, kede jamini abeco kame kotimo kede siliba kede saabu eko tero gi Misiri. Pi mwakini mogo, abaka me Misiri bino kong weko suro Siria,

⁹di do icen mere abaka me Siria ko bino ot suro Misiri, do kobino dwoko wie.

¹⁰“Awobe ka abaka me Siria ko bino iikere pi yi di kiko coko twon ekodet me isirikalen, di kiko ot bala alele, di kiko ngolo ot suro ngakwor gi akadi paka tuno i apama atek me gwokere koluko gi.

¹¹Abaka me Misiri bino ot kede gero di eko yi kede abaka me Siria di eko bwono twon isirikalen kame ecoko.

¹²Kakame etieko bwono kede twon isirikalen jokwor mege, cunye bino pong kede ewaka pi tutumian me isirikalen kame erwaco, do likame ebino meede bwono yi nakanaka.

¹³“Abaka me Siria bino dok di eko coko twon isirikalen akalamo koudo ebedo tie kede sek. Ingei kare moro en eko bino dok kede twon isirikalen kede jamini koromo amakere kede yi.

¹⁴I kare nono jo atot bino jemo ne abaka me Misiri. Jogero mogo kikom jo nin kikokome bino dipo yi kede en pi cobo gianyuta kame ineno, do kobino bwono gi.

¹⁵Di do abaka me Siria ko bino bino di eko luko bomba kame kocelo kede apama atek di eko make. Isirikalen me Misiri likame bino twero meede yi, akadi atek kikom gi likame bino bedo tie kede teko me bwono yi.

¹⁶Abaka me Siria bino timo negi gikame cunye omito, abongo ngatamoro galao en. En ebino sipakin i lobo kame neno cil, di lobo nono dedede ko bino bedo i twer mere.

¹⁷“Abaka me Siria bino moko tam mere pi bino kede teko duc kame ajakanut mere tie kede. Di do pi mito muducaro ajakanut ka ngakwor mere, en ebino winyere kede en i kom kop amako mulem, di eko bino mino abaka nono nyare me anyoma; do iik mere nono bino poto.

¹⁸Ingei manono en ebino loko wie i kom lobere atie i dog name, di eko bino bwono atekerin atot. Do tie ngatel me isirikalen kame bino tieko anywar mere; ateteni en ebino dwoko anywar me abaka me Siria i wie.

¹⁹Di do eko bino dok i bomba me lobo mere kame kocelo kede apama atek, do kobino bwone di manono ko bino bedo ajikini mere.

²⁰“Abaka ace bino lunyo wange, kame bino cwano ngatic mere bedo kede adie i kom jo i kom kop amako culo esolo pi medo abar me ajakanut mere; ingei kare acecek kobino neko abaka nono, do likame obe i dier jo, amoto i yi.”

²¹Malaika oko meede kede yamo be, “Abaka me Asiria kame bino lunyo wange bino bedo dano won acae kalikame jo omio twer me bedo abaka. En ebino ngole angola gamo apugan i yore me rieko.

²²Isirikalen dedede kame bino piem kede en, akadi kiton Ngatel me Josaseredoti da, en ebino weno gi di eko muducaro gi.

²³En ebino timo winyere me aribakin kede atekerin apat, di eko donyo ngolo negi rieko di en eko medo doko tek ameda, bed bala en epugo jo anonok.

²⁴En ebino ngole suro adul kobaro di eko timo gikame abakai kame en elubo ngei gi likame otimo. Di do en eko bino popoko ne jo kame lubo kop mere jamini kede abar kame eyako. En ebino timo iik me tuturo kabedere atek me gwokere, do manono bino bedo pi kare moro acecek.

²⁵“En ebino coko twon ekodet me isirikalen di wange tek pi ot suro abaka me Misiri, en ngat kame bino da iikere kede twon isirikalen atot di tek kalamo pi yi kede en. Do abaka me Misiri likame bino twero, pien jo bino ngolo ne rieko,

²⁶gin en jo kiyapiyapi kede en. Gin kibino rete, di oko bino bwono isirikalen mege, di oko neko atot kikom gi.

²⁷Di abakai are nogo ko bino bedo cam karacel i emesa acel, di ngat acelacel tie kede tam arac i kom ngawote, doko di kingalere ken gi ken gi. Do likame kibino cobo mit gi pien kare mere udo pwodi likame otuno.

²⁸Abaka me Asiria bino yai dok i lobo mere kede twon abar kame eyako, do udo pwodi cunye tie mito dudubo edini amakere kede isikan kacil. En ebino timo gikame cunye mito di eko dok i lobo mere.

²⁹“Ingei kare moro en ebino doko suro Misiri, do i manoni kop bino lokere.

³⁰Imerin bino wok ki Kitim pi yi kede en di lworo ko make di eko dok. En ebino dok kede gero di eko tamakino dudubo edini amakere kede isikan kacil. En ebino lubo tam me jo kotieko weko edini nono.

³¹Isirikalen kame ebino cwano bino luko tempulo kede apama atek koluke di kiko munao en. Gin kibino gengo giayala awanga me ceng dedede di kiko cibo kanono gikame munao kabedo kacil.

³²En ebino ngalao cuny jo kotieko weko edini gi, do jo kame lubo kop ka Rubanga gi bino cungo di kitek di kiko timo gimoro.

³³Jo ariek i diere me jo bino nywako rieko gi kede jo atot. Do pi kare moro kobino neko ace kikom gi i yi, kede apat mege kobino wango awanga kede mac paka to. Ace kobino yako kede ace kobino mako otero gi kumbor bala mabus.

³⁴Kakame nek tie meede kede, jo ka Rubanga bino udo kony moro atitidi, bed bala jo atot kame bino donyo i kom gi likame bino timo kamanono kede cuny me ateni.

³⁵Kobino neko jo ariek nogo mogo, di jo ko bino udo lonyere pi manono. Manono bino meede paka tuno i kare me ajikini, en kare kame Rubanga otieko moko.

³⁶“Abaka me Asiria bino timo gikame cunye mito; en ebino tingere di eko tero be en edwong ekalamo rubangan dedede, di eko donyo waco kope awinyo rac i kom Rubanga Ngamalo Twal. En ebino meede kede tim mege tuno i kare kame Rubanga bino nyuto kede gero mere. Rubanga bino timo gikame en etieko iiko.

³⁷En likame ebino mino wor but rubangan ka joakwari mege, arabo but rubanga kame mon singo maro; en likame ebino mino wor but rubanga moroni dedede, piento en ebino terere be en edwong kalamo gin dedede.

³⁸Akaka magonogi en ebino bedo kede wor but rubanga kame gwoko kabedere atek me gwokere, kabedere kame kocelo. Pi nyuto wor bute, en ebino mino saabu, siliba, kide me wel, kede giamia ace me wel but rubanga kame joakwari mege oudo likame ngeo.

³⁹Pi gwoko bomban mege kame koluko kede apama atek, en ebino tic kede jo kame woro rubanga me kumbor. Ebino mino wor adwong but jo kogame bala ngapug, di eko mino gi tice me ruom amalo, kede eko mino gi lobo bala giamia me pwoc.

⁴⁰“I kare me ajikini me abaka me Siria, abaka me Misiri bino sure, di abaka me Siria ko bino mwomar i kome bala apipiru, di etio kede cabalan, jo kame ringo kede asigiran, kede imerin atot atota. En ebino suro pinye atot bala core me pii me alele.

⁴¹En ebino suro kiton lobo kacil me isikan di eko neko jo tutumian kede tutumian, do lobo me Edom, Moab, kede kakodong me Amon bino bwot.

⁴²Kame en esuro lobere nogo dedede, akadi Misiri da likame bino bwot.

⁴³En ebino tero saabu, siliba, kede abar dedede me Misiri. Ebino da bwono Libiya kede Abisinia.

⁴⁴Di rwonge kowok ki bad tetu kide kede ki bad tetu tim ko bino dubo cunye, di eko bino yi kede twon gero di eko neko jo atot.

⁴⁵En ebino sipo iemai mege adongodongo me abaka i dierediere me nam adwong kede moru kame tempulo cungo i wie. Do en ebino to, abongo ngatamoro akonye.”