Read kumam Danieri 3 Bible Online

Danieri 3 - kumam bible

Danieri 3

¹Abaka Nebukadunesa oko timo cal kede saabu; oudo boro mere malo tie bala mita ot are kiwie kanyaare, kede laco mere bala mita adek, di eko mino kocibe i ebar me Dura i adul me Babilon.

²Abaka oko cwano kop lwongo jotic mege adongo pi bino karacel, magonogo bin ribo jopug, jo abedo i kansulo mere, jokan lim, jongolkop, kede jotic ace dedede. Gin oudo kipoore cokere pi kwero cal kame Abaka Nebukadunesa oudo ocibo.

³Kakame jonogi dedede oko cokere kede di kiko cungo i nyim cal nono pi kwere,

⁴eraban ka abaka oko cungo malo di eko waco kede dwan amalo be, “Wun jo me atekerin, abilere, kede leb apapat,

⁵ka iwinyunu koko me agwara, di ko lubo koko me bilo, adungu, arigirigi, kede dwan jamini ace me goc, wun dedede ipoorenu riebere piny di ikounu donyo woro cal kame Abaka Nebukadunesa ocibo.

⁶Ngat kalikame bino riebere piny eko wore, kobino cucuto uce i epipa adwong me mac kosorano.”

⁷Aso, cucuto di jo dedede owinyo koko me agwara kede dwan jamini ace me goc, jo me atekerin dedede, abilere dedede, kede leb dedede oko riebere piny di kiko donyo woro cal kame Abaka Nebukadunesa oudo ocibo.

⁸Manoni oko mino jo mogo me Babilon oudo kare me pido Iyudayan.

⁹Gin kiwaco ne Abaka Nebukadunesa be, “Okwe koto abaka bed kuo nakanaka!

¹⁰Adwong, in oudo imio cik be kame kokuto agwara di oko gono jamini ace me goc, jo dedede poore riebere piny di kiko woro cal kame kotimo kede saabu.

¹¹Doko da iko waco be ngatamoroni kalikame bino riebere piny di eko woro cal nono kobino uce i epipa adwong me mac kosorano.

¹²Tie Iyudayan mogo kame in imio tice adongo i adul me Babilon, kame dagi winyo kop nin. Jo nogo obedo Sadurak, Mesak, kede Abedenego; gin likame kiworo rubangan nin, akadi riebere woro cal kame in isipo.”

¹³Kop nono oko mino abaka odoko ger, di eko mino cik me tero cuo adek nogo i nyime.

¹⁴En eko penyo gi be, “Sadurak, Mesak, kede Abedenego, benyo etie kop me ateteni be wun likame iworunu rubangan nango, kede da be wun likame iworunu cal kame kotimo kede saabu kame ango acibo?

¹⁵Aso, nan kame wun i iikerenu riebere di ikounu woro cal kame ango acibo, ingei winyo agwara, bilo, adungu, arigirigi, bul, kede jamini ace me goc, manono bino bedo ber; do ka likame ikounu wore, cucuto kobino uco wu i epipa me mac kosorano. Iparunu be tie rubanga moro kame bino lako wu kikuno?”

¹⁶Sadurak, Mesak, kede Abedenego oko dwoko ne abaka be, “Okwe Adwong Nebukadunesa, wan likame otie kede kop kame oromo dwoko iye.

¹⁷Ka Rubanga kame wan oworo twero lako wa ki epipa me mac kosorano kede ki twer nin, en ebino lako wa.

¹⁸Do akadi ka likame ebino lako wa da, adwong abaka ngei kiber be wan likame obino woro rubangan ni, akadi woro cal kame kotimo kede saabu kame in icibo.”

¹⁹Di Nebukadunesa oko doko ger ne Sadurak, Mesak, kede Abedenego, di wange oko bokere. Eko mino cik be dop epipa tien kanyaare kalamo kite kame lem kodope kede.

²⁰Eko golo cik ne isirikalen mege atek pi twetweo cuo adek nogo di oko uco gi i epipa kame mac osorano iye.

²¹Aso, oko twetweo cuo adek nogo, di kingapo isatin gi, idabudan, icoron kede igoen ace, di oko uco gi i epipa kame mac osorano iye.

²²Pi kite kame abaka oudo ogolo kede cik awakawaka be mi epipa dop kalamo lem sek, manono oko mino eura me mac oko neko isirikalen koudo otingo cuo adek nogo pi uco gi i epipa.

²³Di Sadurak, Mesak, kede Abedenego oko popoto i cuny mac kosorano i yi epipa di kitie i cal kame kotweo gi iye.

²⁴Cucuto abaka oko lepun ki kabedo mere di elelemo kede ur. En epenyere be, “Mam oudo wan otwetweunu cuo adek nogo di oko uco gi i mac kosorano me epipa?” Gin kiko dwoko ne be, “Adwong abaka, wan oudo otimo kamanono.”

²⁵En eko penyere be, “Do pinyo doko komio ango atie neno cuo ongwon tie ot i cuny mac di likame kitwere, doko di mac da likame owango gi? Dano me ongwon mere cal bala rubanga moro.”

²⁶Nebukadunesa oko noko ekeko me epipa kodop nono di eko lwongere be, “Sadurak! Mesak! Abedenego! Jotic ka Rubanga Ngamalo Twal, wokunu, bianu kan!” Di cuo nogo oko wok ooko ki epipa.

²⁷Di jopug dedede, jotel, jo kame bedo i kansulo ka abaka oko cokere karacel di kiko neno be mac obedo li kede twer moro i kom cuo adek nogo; yer me wi gi oudo likame orere, igoen me kom gi da likame owang, doko ngwece me mac oudo li ki kom gi da.

²⁸Abaka oko waco be, “Pak bed but Rubanga ka Sadurak, Mesak, kede Abedenego. En ecwao malaika mere di eko lako jotic mege kagene. Gin kidagi lubo cik kame ango amio di kiko yei jalo kuo gi akaka woro rubanga moro ace apat, kwanyo kenekene Rubanga gi.

²⁹“Aso, nan ango atie mino cik kaman: ka ngatamoro me ateker moro, abila moro, arabo leb moro owaco kop moro arac i kom Rubanga ka Sadurak, Mesak kede Abedenego, kobino nyinyilo en di oko rereto ode; pien likame doko tie rubanga moro kame twero lako jo i epone noni.”

³⁰Di abaka oko kobo Sadurak, Mesak, kede Abedenego i tic me ruom amalo i adul me Babilon.