Read kumam Danieri 4 Bible Online

Danieri 4 - kumam bible

Danieri 4

¹Abaka Nebukadunesa cwao kop noni but jo me atekerin dedede, erangi dedede, abilere dedede, kede leb dedede atie i wi lobo be, “Amoto wu!

²Cunya yom pi tatamo gianena kede giaura kame Rubanga Ngamalo Twal otimo nango.

³“Gianena kame en enyuto dongodongo! Giaura mege obedo me twer! Ajakanut mere bedo nakanaka; en ebino pug ikar dedede.

⁴“Ango Nebukadunesa oudo atie bedo i paco na di atie kede anapakin kede kuo ajabajaba.

⁵Do ako bedo kede lek akelo lworo, di ako neno gianyuta kame oko neko koma.

⁶Ango ako woto cik be kel i nyima jorieko dedede kame mia tam i Babilon, tetekeny amoto kigony na dwong me lek nono.

⁷Di jotim tangu, jotiet, jo Kaludea, kede imuroko oko bino, ango ako waco negi lek na, do gin likame kiko twero gonyo dwong mere.

⁸Di Danieri oko bino (en kolwonge da be Beletesasar, en nying rubanga na); en ebedo dano kame rubangan kacil omio twer. Ango ako tatamo ne lek na. Man en gikame ango ako waco ne:

⁹Beletesasar, ngatel me jotim tangu, ango angeo be in itie kede twer me rubangan kacil, manono mio in ingeo gikame omungere dedede. Aso, winyi lek kame ango aleko di iko gonyo na dwong mere.

¹⁰“Kakame oudo ango atie nino kede, ango ako neno gianyuta me twon yat koudo tie i cuny lobo.

¹¹En eko meede ameda dongo paka tuno i edou, manono omio jo dedede me wi lobo oudo twero nene.

¹²Pote mege oudo cil di epong kede anyakini kame oudo twero romo jo dedede. Leini me obar oudo urako i dude, winy oudo gedo i ajange mege, giakuo dedede oudo kuo kede camo anyakini mere.

¹³“Kakame ango oudo atie kede i kabuto di atie neno gianyuta nono, ango ako neno malaika kacil kame wange bit di etie bino ki malo.

¹⁴En eko ilelem di ewaco be, ‘Tong yat nono piny di iko lwero ajange mege; gwer pote mege di iko sasaro anyakini mege. Mi leini kame tie i dude kede winy kame tie i ajange mege ring tenge.

¹⁵Do mi isiki kede aliasin mege dong i lobo, di etwere kede irikoi me ayon kede buronsi, di etie cungo i lum obar kunono. “ ‘Mi toyo diak kom icuo noni, di eko donyo bedo obar kede leini kede lum.

¹⁶Mie ebed kede tam me le akaka me dano pi mwakini kanyaare.

¹⁷Kop me alola noni imalaikan awang gi bit en omio; tam noni komio di lubere kede cik kame imalaikan kacil omio, tetekeny jo dedede akuo ngei be Rubanga Ngamalo Twal tie kede twer i kom ajakanut me jo; en emie but ngat kame cunye omito, akadi di ebedo dano me ruom apiny adikinicel.’

¹⁸“Manoni en lek kame ango, Abaka Nebukadunesa, aneno. Aso, nan in Beletesasar, gony na dwong mere, pien jorieko dedede me ajakanut na likame twero gonyo na dwong mere. Do ango angeo be in itwero, pien rubangan kacil omi twer.”

¹⁹Di Danieri, ngat kame oudo kolwongo da be Beletesasar oko bedo kede par alit di likame eko twero waco kop moro. Tam kame oudo tie i wie omie lworo. Abaka oko waco ne be, “Beletesasar, kur ibed kede lworo pi lek nono arabo pi dwong mere.” Beletesasar oko dwoko be, “Adwong, koto lek nono kede dwong mere obedo pi jokwor nin, do weko in.”

²⁰In ineno yat adwong di tek, di edongo bor malo wie tuno i edou; jo dedede me wi lobo sobolo nene.

²¹Pote mege oudo cil, doko oudo etie kede anyakini asobolo pito jo me wi lobo lung. Leini me obar oudo wei i dud tipo mere, kede winy da oudo ogedo i ajange mege.

²²“Adwong abaka, manono obedo in! In idoko dwong di itek. Dwongo ni otieko meede etuno i edou, doko twer ni otieko nyai i wi lobo lung.

²³Kakame in oudo itie ngire kede, malaika oko wok ki malo di eko waco be, ‘Tong yat nono piny iko dudubo en, do wek isiki mere dong cungo i lobo. Twee kede irikoi me nyonyo ayon kede buronsi, di iko weke obar i lum koswapo. Poore toyo diak kom icuo noni, di en eko dong bedo kunono karacel kede leini pi mwakini kanyaare.’

²⁴“Adwong abaka, dwong mere en ine, doko da manoni obedo gikame Rubanga Ngamalo Twal owaco be bino timere i komi:

²⁵In kobino riami tenge kikom lwak di iko donyo bino bedo kede leini me obar. Ibino donyo camo lum bala twon pi mwakini kanyaare, di ibuto ooko kakame toyo bino diako kiye komi. Di do in iko bino ngeno be Rubanga Ngamalo Twal tie kede twer i kom ajakanuto dedede me jo, doko esobolo mino gi but jo kame cunye oyero.

²⁶Malaika nono oko mino cik be wek isiki me yat nono dong cungo i lobo. Manono nyuto be in ibino bobo doko abaka cako i kare kame in ibino yei kede be Rubanga pugo wi lobo lung.

²⁷Pi manono, abaka, lub kop kame atie waco ni. Wek timo dub di iko donyo timo gikame opoore, di iko bedo kede cuny me kisa but jocan, di oko bino medo kare me mulem ni.”

²⁸Bin magonogi dedede oko timere ne abaka Nebukadunesa.

²⁹Ingei dwete tomon kiwie are, di oudo en etie latoa i malo i wi ode me abaka koudo tie Babilon,

³⁰en bin eko waco be, “Nen ca bomba adwong me Babilon! Ango agere kede twer na pi bedo bomba na me abaka, pi nyuto deyo kede dwongo na.”

³¹Di pwodi likame etieko waco kop noni, dwan oko winyere di yamo ki malo be, “Abaka Nebukadunesa, winy gikame atie waco ni: kotieko kwanyo ajakanut ki cingi!

³²Kobino riami tenge kikom lwak, di iko donyo bino bedo kede leini me obar. Kobino mini idonyo camo lum bala twon pi mwakini kanyaare. Di in iko bino ngeno be Rubanga Ngamalo Twal tie kede twer i kom ajakanuto me jo, doko da en esobolo mino gi but jo kame cunye oyero.”

³³Kop nono oko cobere oyotoyot. Bin oko riamo Nebukadunesa kikom lwak di eko donyo camo lum bala twon. Toyo oko bedo diako kome, di yer me wie oko dongo bocoboco bala yer me ekokom, di lwete oko wito bala lwet winyo.

³⁴Ingei mwakini kanyaare, ango Nebukadunesa ako tingo wanga neno malo, di wia oko yabare. Ango ako pako Ngamalo Twal; amio wor kede dwongo but en ngat kame ebedo nakanaka. En ebino pug nakanaka, doko ajakanut mere bino bedo ikar kede ikar.

³⁵Kibute jo dedede me wi lobo obedo gimoro li; imalaikan dedede me malo kede jo me wi lobo dedede tie i twer mere. Likame tie ngatamoro kame twero gengo mit mere, arabo penye gikame etie timo.

³⁶Kakame wia oyabere kede, wor na, dwongo na, kede deyo me ajakanut na bin oko dwoko na. Jotic na amia tam kede jotel me ajakanut na oko gama, di oko dwoko na twer na me abaka, kede dwongo akalamo kasek.

³⁷Nan ango Nebukadunesa apako, amio wor, kede amio dwongo but Abaka me malo. Gi dedede kame en etimo tie kakare doko kipoore. En etwero dwoko piny jo kame wakere.