Read kumam Danieri 7 Bible Online

Danieri 7 - kumam bible

Danieri 7

¹I mwaka me agege me apugan ka Belesasar bala abaka me Babilonia, ango Danieri ako neno gianyuta i lek di oudo atie buto iwor. Ango ako wandiko lek nono kaman:

²Ango Danieri aneno i gianyuta kotimere na, yamere me malo di tie buko ki bad dedede, di kitie rubo pii me nam adwong.

³Di leini ongwon adongodongo oko wokun ki nam adwong nono, gin dedede cal gi papat.

⁴Me agege oudo cal bala engu di etie kede bwome acal bala me ekokom. Kakame ango oudo atie ngine kede, oko puputo bwome, di oko kiarao en ki lobo di oko mine ecungo kede tiene are bala dano; oko mine ebedo kede tam acal bala me dano.

⁵Le ace bobo oko neeno, en le me are. En oudo ecal bala edubu. En oudo etie cungo kede tiene me cen di ekiarao me anyim, di etie kede isepon adek i lake. Dwan oko winyere di waco be, “Yai, cam ringo atot bala kame itwero.”

⁶Kakame oudo pwodi ango atie ngire kede, le ace oko bobo neeno. En oudo ecal bala erisa, do oudo etie kede bwome ongwon ingee, kede wie da oudo tie ongwon. Bin oko mine twer me pug.

⁷Di pwodi oudo atie ngire, le me ongwon oko neeno. En oudo etek adikinicel di nene rac; cal mere oudo mio dano lworo. En oudo etie kede lake me nyonyo ayon kame oudo etie nyanyato kede ringo di enyamo, di enyonyono angidingidin kodong kede tiene. En oudo cal mere pat kede leini ace apat kocako neeno; oudo etie kede tunge tomon.

⁸Kakame ango oudo atie ngino kede tunge nogo, tunge atitidi oko cako gulo i diere me magonogo. Pi weko ne tunge nono kare, oko puputo tunge adek kikom tunge me agege. Tunge nono oudo tie kede wange kame cal bala wang dano, kede doge koudo tie yamo ewaka ewaka.

⁹Kakame ango oudo atie ngire kede, oko cibo komini me ngolo kop. Ngat kobedo tie ikar kede ikar oko bedo i kom acel. Igoen mege oudo tar bala akako, kede yer me wie oudo cal bala yer me oromo atar di pwot. Kom mere nono oudo liel mac, namusigan mege da oudo obokere mac.

¹⁰Esamai amol mac oudo tie mol wok kibute. Jo tutumian kede tutumian oudo tie kanono pi tic ne, kede jo milion kede milion oudo tie cungo i nyime. Tuale oko cako tic me ngolo kop, di oko yabo itabun.

¹¹Ango ako meede kede ngire, di ako winyo di tung le me ongwon, tunge atitidi ca, di tie pwodi yamo ewaka ewaka. Di pwodi oudo atie ngire, oko neko le me ongwon nono di oko dudubo kome di oko uce i mac.

¹²Do leini apat bin koko kwanyo twer gi me pug, do oko weko gi kidong kuo pi kare moro.

¹³I gianyuta nono kame aneno iwor, aneno gimoro acal bala dano, di etie bino kede idoun. En eko bino paka but ngat kobedo tie ikar kede ikar, di oko tere i nyime.

¹⁴Oko mine twer me pug, deyo, kede ruom me abaka, tetekeny jo me atekerin dedede kede leb dedede tim nen tic. Loc mere tie pi kare lung, ajakanut mere likame kobino dudubo.

¹⁵Gianyuta kame ango Danieri aneno opoto cunya di eko mina lworo.

¹⁶Ango ako ot but dano acel koudo tie cungo kunono di ako penye pi gonyo na ateni mere dedede. En eko gonyo na dwong me gianyuta nono kaman:

¹⁷“Leini ongwon adongodongo cungo pi abakai ongwon kame bino wokun i wi lobo.

¹⁸Di jo ka Ngamalo Twal ko bino gamo ajakanut di kiko dong kede pi ikar kede ikar.”

¹⁹Ango ako mito ngeno ateni me le me ongwon, le koudo pat kede leini ace; en oudo emio dano bedo kede lworo kokalamo, di lake obedo nyonyo ayon, kede lwete me tiene obedo nyonyo buronsi, kame en enyanyato kede gi ringo di eko donyo popoo gi i adulion atitino, di eko nyonyono angidingidin kodong kede tiene.

²⁰Doko da oudo amito ngeno ateni me tunge tomon koudo tie i wie, kede tunge kame oko gulo kicen di eko mino tunge adek oko popoto pi weko nen kabedo. Tunge nono oudo tie kede wange kede doge, di eyamo ewaka ewaka. Le nono oudo mio dano bedo kede lworo kalamo leini icegun ka.

²¹Di pwodi oudo ango atie ngire, tunge nono oko cako yi kede jo ka Rubanga di eko bwono gi.

²²Di ngat kobedo tie ikar kede ikar oko bino di eko ngolo kop agango jo ka Ngamalo Twal. Kare oudo otuno ne jo ka Rubanga pi gamo ajakanut.

²³Gikame en eko waco na ine: “Le me ongwon obedo ajakanut me ongwon kame bino bedo tie i wi lobo, en ebino bedo pat kede ajakanuto apat dedede. En ebino nyinyito wi lobo di eko nyonyono en.

²⁴Tunge tomon obedo abakai tomon kame bino pugo ajakanut nono. Di abaka ace ko bino wokun, en ebino bedo pat kede abakai me agege nogo, di en eko bino bwono abakai adek kikom gi.

²⁵En ebino yamo kope areco i kom Ngamalo Twal di eko tidilo jo mege. En ebino tamakino loko ceng adongo kede iswilia me edini gi. Jo ka Rubanga bino bedo i twer mere pi mwakini adek kede dul.

²⁶Di tuale me malo ko bino bedo pi ngolo kop, di oko bino kwanyo twer mere di oko muducaro en atwal atwala.

²⁷Twer me pug, loc, kede dwongo me ajakanuto dedede me wi lobo kobino mino but jo ka Rubanga Ngamalo Twal. Ajakanut gi bino bedo nakanaka, doko wegi loc dedede me wi lobo bino tic negi di mio gi wor.”

²⁸Man en ajikini me kop nono. Do ango Danieri tam kame abedo kede oko mina lworo atek di ako donyo jul ajula; do ango ako kano kop nono i cunya.