Read kumam Danieri 8 Bible Online

Danieri 8 - kumam bible

Danieri 8

¹I mwaka me adek me apugan ka Belesasar, ango Danieri ako bobo neno gianyuta ace.

²I gianyuta nono, apoi audo be oudo atie i bomba me Susa, i adul me Elam, di atie cungo i dog ecilet me Ulai.

³I kanono ako neno emerekek koudo tie kede tunge are abocoboco, do acel oudo bor kalamo ocelu; abor twatwal mere owok kicen.

⁴Ako neno di emerekek nono ociko tunge pi yi, di eko dok i bad tetu tim, i bad tetu malo, kede i bad tetu piny. Leini dedede oudo likame tie kede teko me yi kede en, doko oudo likame tie le moro kame twero lako ocelu kibute; en oudo etimo gikame cunye mito, di eko doko tek.

⁵Di ango oudo pwodi atie ngire, ekoroi oko wokun ki bad tetu tim eko ngolo wi lobo abongo tiene mulo piny. Ekoroi nono oudo tie kede tunge i dierediere me wange.

⁶En eko ot tetu but emerekek koudo tie kede tunge are, kame oudo ango aneno di tie cungo i dog ecilet. En eko motar kede gero i kom emerekek nono.

⁷Ango anene di etie ot i kom emerekek nono. En oudo emotar i kome kede gero di eko dipe paka tuturo tunge are. Emerekek nono oudo li kede teko me yi kede en; en eko uco emerekek nono piny di eko donyo nyonyono en. Likame oudo tie ngatamoro kame twero lako emerekek nono kibute.

⁸Diel nono oko meede ameda woo pi teko mere, do kakame teko mere otuno kede malo adikinicel, oko bin turo tunge. Di kawang manono, tunge ongwon kame idelelei oko tui, di acelacel kikom gi tie cimo bad apat.

⁹Tunge moro atitidi oko bobo tui i kom tunge acel kikom ongwon nogo, di twer mere oko dok i bad tetu piny, i bad tetu kide, kede tetu lobo kame neno cil.

¹⁰En eko doko tek teko kame rom kede isirikalen me malo. En eko rereto i wi lobo mogo kikom isirikalen nogo, kede acerin mogo, di eko nyonyono gi.

¹¹En eko donyo woo kiton ne ngadwong me isirikalen me malo, di eko gengo giayala awanga me buli ceng kame komio bute, di eko munao tempulo mere.

¹²Jo oko donyo timo dub kunono akaka mino giayala me buli ceng, di eko mino wor me ateni ojik. Gi dedede kame en oudo etimo cobere ne kiber.

¹³Ango ako winyo di malaika acel penyo ocelu be, “Gikame oneeno i gianyuta noni bino meede pi kare karom amene? Dub arac noni bino dong di elunyo kawang giayala me buli ceng pi kare karom kamene? Kobino dong di kotie nyonyono isirikalen me malo kede me tempulo pi kare karom kamene?”

¹⁴Ako winyo di malaika ocelu dwoko be, “Ebino meede pi otieno kede odiko tutumia are kede tol adek (2,300), di do oko bino mino tempulo bedo di epoore bobo.”

¹⁵Kakame ango Danieri oudo atie tamo pi niang kede dwong me gianyuta nono, cucuto ngatamoro oko bino cungo i nyima, en oudo ecal bala icuo.

¹⁶Ako winyo di dwan dano yamo ki ecilet me Ulai be, “Gabulieri, mie eniang dwong me gianyuta kame eneno.”

¹⁷Gabulieri oko bino di eko cungo i ngeta, di lworo oko maka di ango ako riebere piny. En eko waco na be, “Wot dano, niang be gianyuta noni nyuto kare me ajikini.”

¹⁸Kakame en oudo etie yamo keda, wia oko witar di ako poto, do en eko maka di eko kiarao ango acungo,

¹⁹di eko waco na be, “Ango atie nyuto ni gikame gero ka Rubanga bino kelo. Gianyuta nono nyuto kare me ajikini.

²⁰“Emerekek kame in ineno koudo tie kede tunge are cungo pi abakai me Media kede Pasia.

²¹Ekoroi cungo pi ajakanut me Guris; tunge kidelelei atie i dierediere me wange are cungo pi abaka mere me agege.

²²Tunge ongwon kame oko wok ingei tunge me agege tur cungo pi ajakanuto ongwon kame bino popokun ki ajakanut nono, kame teko gi karacel likame bino tuno i me ajakanut me agege.

²³“Kame kare me ajikini me ajakanuto nogo onoko, di do dub gi oyitiriro, abaka awange tek bino wokun, kame tie kede diru me angalo.

²⁴“En ebino doko tek, do likame kede twer mere kene. En ebino dudubo jamini i yore arac kalamo, doko iik mege dedede bino cobere ne kiber. En ebino muducaro jo atek kede jo ka Rubanga.

²⁵Pi kite kame etie kede diru me angalo, angalo mege likame bino meede ameda. En ebino bedo kede twon ewaka pire kene di eko bino muducaro jo atot abongo kwenyaro gi. En ebino da ngangar i kom Abaka me abakai; do kobino muducaro en, likame kede twer me dano.

²⁶Gianyuta noni amako kop me giayala awanga me odiko kede otieno kame kogonyo ni dwong mere bino cobere. Do nan ber kong mie ebed mung, pien ebino tero kare alac di pwodi likame ecobere.”

²⁷Aso, ango Danieri kop noni oko ninga di ako bedo tuwo pi ceng atot atota. Di do ako doko momot di ako dok i wang tic kame abaka oudo omia. Do gianyuta nono oneko koma, doko da likame ako niang dwong mere.