Read kumam Danieri 9 Bible Online

Danieri 9 - kumam bible

Danieri 9

¹Darias dano me Mede, wot ka Sereses, oko pugo Babilonia.

²I mwaka me agege me apugan mere, ango oudo atie siyao itabun kacil di aparo kop i kom mwakini ot kanyaare kame Yerusalem bino dong kede di etie ameje, di lubere kede kop kame Rwot oudo owaco ne enabi Yeremia.

³Ango ako lego kede cunya dedede but Rwot, di angangao en, di akanyo kec, di angapo epuko, kede di abedo i buru.

⁴Ango alego but Rwot Rubanga di atuco dub ka jo na. Ango awaco be, “Rwot Rubanga, in idwong twatwal, wan omi wor. In igwoko isikan ni, doko inyuto amara abedo nakanaka but jo kame mari kede kame gwoko cik nin.

⁵“Wan odubo, wan otimo gikarac, obedo kede tim kalikame ber, wan ojemo ni, oweko lubo cik kede iswilia ni.

⁶Wan likame oyei winyo kop me inabin jotic nin, gin jo kame kiyamo i nyingi but abakai wa, jopug wa, joakwari wa, kede but jo dedede me ateker wa.

⁷“Rwot in nakanaka itimo gikame opoore. Do tuno tin wan otie kede lewic i wi wa, wan jo kame obedo Yuda, Yerusalem, kede jo dedede me Isirael kame bedo kabedo kiyapiyapi, kede kakabor i lobere dedede kame in isasaro gi iye pi kite kalikame kigenere kede buti.

⁸Rwot, lewic nan do tie i wi wa, i wi abakai wa, i wi jotel wa, kede i wi joakwari wa, pien wan odubo buti.

⁹Rwot Rubanga wa, in itie kede cuny me kisa kede me sasiro jo, bed bala wan obedo kede tim me jemo buti.

¹⁰Wan likame oyei winyo kop ni, in Rwot Rubanga wa, kakame iwaco ne wa kede pi lubo iswilia kame imio wa kibut inabin jotic ni.

¹¹Jo dedede me Isirael oturo iswilia ni di kiko dagi lubo gikame in iwaco. Wan odubo buti en omio in iko kelo ne wa ilam kame kowandiko i Iswil ka Musa ngatic ni.

¹²In icobo timo gikame oudo iwaco be ibino timo ne wa kede jopug wa. In imio Yerusalem alola alit kalamo bomban dedede me wi lobo.

¹³Bala kame kowandiko kede i Iswil ka Musa, in itieko mino wa alola nogo dedede. Do akadi nan da, Rwot Rubanga wa, wan likame otamakino lokere tenge ki gikareco wa arabo tamo pi ateni nin.

¹⁴Aso, Rwot in iko bedo di iikere pi kelo ne wa alola paka tuno in kele i kom wa. Ateteni Rwot Rubanga, gi dedede kame in itieko timo opoore, pien wan odagi winyo kop nin.

¹⁵“Rwot Rubanga, in bin iwoto jo ni ki lobo me Misiri kede twer nin, manono oko mino nyingi odong di ngere tuno tin; wan odubo, wan otimo gikarac.

¹⁶Okwe Rwot, di lubere kede tice ni kopoore, wan okwai be, kwany gero ni tenge ki bomba me Yerusalem, en moru ni kacil; pien pi dub wan kede me ka joakwari wa, Yerusalem kede jo ni dedede otieko doko gi me acae but atekerin me kio.

¹⁷Okwe Rwot Rubanga wa, winy kwac kede ingangai na, ango ngatic ni. Pir bero nin, Rwot akwai nen kede mwolo tempulo ni kame kodudubo.

¹⁸Okwe Rubanga na, cik yiti di iko winyo koko wa. Yab wangi di iko neno can kame otie iye, kede bomba kame kolwongo kede nyingi. Wan otie lego buti pien in itie kede cuny me kisa, do likame be pien wan otimo gikame opoore.

¹⁹Okwe Rwot winy wa. Rwot sasiro wa. Rwot winy wa di iko timo gikame mitere abongo gal, pien bomba ni kede jo ni kolwongo kede nyingi.”

²⁰Ango ako meede kede ilega, di atuco gikareco na kede gikareco ka jo me Isirael, di angangao Rwot Rubanga na pi temuno tempulo mere kacil.

²¹Kakame oudo ango atie kede ilega, malaika Gabulieri, en icuo kame ango oudo acako neno i gianyuta kokato, oko por bino kakame ango oudo atie iye. Manono oudo obedo esawa me mino giayala me otieno.

²²En ebino di eko waco na be, “Danieri, ango nan atieko bino pi mini rieko kede niang i kom imurai nono.

²³Kakame in icako kede ingangai but Rwot, en eko gamo kwac ni. En emari twatwal, aso nan ango abino pi waco ni adwokini mere. Nan cik yiti di ango agonyo ni dwong me gianyuta nono.

²⁴“Mwakini kanyaare tien ot kanyaare en kare kame Rubanga omoko pi jo ni kede bomba nin kacil, pi jiko dub kede gikarac, pi udo isasir, kede pi en kelo poore abedo nakanaka, tetekeny gianyuta kede imurai nono cobere kakare, di oko bino medo kwero tempulo.

²⁵Ngei kiber doko niang be, cako i kare kame kobino mino kede cik me temuno gero Yerusalem tuno i kare kame ngatel kame Rubanga oyero bino bino kede, manono bino tero mwakini kanyaare tien kanyaare. Kobino gero Yerusalem di etie kede gudi kede apamai atek me cel, di eko bino cungo pi mwakini kanyaare tien ot kanyape kiwie are, do manono bino bedo kare me peko.

²⁶Ingei ajikini me kare nono kobino neko ngatel kame Rubanga oyero abongo tien kop moro. Di isirikalen me ngapug atie bino ko bino dudubo bomba kede tempulo. Ajikini bino bino bala pii me alele, di ekelo yi. Rubanga omoko be dudubo.

²⁷Ngapug nono bino timo isikan atek kede jo pi mwakini kanyaare, do di dul me kare nono okato, en ebino jiko kop me mino giayala kede giamia, di oko bino lunyo kawang gi kede gikame munao kabedo kacil, tuno di ngat komunao kanono oriamo kede ajikini kame Rubanga otieko iiko ne.”