Read kumam Kosea 11 Bible Online

Kosea 11 - kumam bible

Kosea 11

¹Rwot waco be, “Di bin Isirael oudo pwodi titidi, ango oudo amare, di ako lwonge pi yai ki Misiri bala woda.

²Do kakame ango ako meede ameda lwonge kede, eda eko meede ameda ot tenge kibuta. Jo na omeede mino Baal giayala, kede dunyo ne caljwogi odok angwe kur.

³Do di ango en kame oudo apwonyo Isirael teteo ot. Ango atingo gi i cinga, do gin likame kingeo be ango en kame acango gi.

⁴Ango awao gi dwogo buta kede mwolo kede amara. Kibut gi oudo ango acal bala ngat kame tingo atin di eko gonge i leme; ango agungo but gi di ako pito gi.

⁵“Gin kitieko dagi dwogo buta, pi manono kibino dok i lobo me Misiri; Asiria bino pugo gi.

⁶Yi bino poto i bomban gi di oko tuturo irutei me bomban gi. Yi bino muducaro gi pi iik gi areco.

⁷Jo na otieko moko tam gi pi lokere tenge kibuta. Gin kibino koko buta Ngamalo Twal, do likame ango abino kiarao gi.

⁸“Isirael, epone mene kame ango asobolo weki kede? Epone mene kame ango asobolo jali kede? Benyo benyo kame ango asobolo dudubo in kede bala kame bin atimo ne bomba me Adama, arabo teri iepone acel bala kame bin atero kede Seboim? Cunya likame yei na timo kamanono; amara na buti dwong twatwal.

⁹Ango likame abino mini alola pi gero adwong kame atie kede i komi; ango likame doko abino dudubo Isirael. Pien ango abedo Rubanga do likame dano. Ango Ngat Kacil atie i diere wu. Likame abino bino butu kede gero.

¹⁰“Ango Rwot abino dorano bala engu i kom jokwor gi, di jo na ko bino dwogo ki bad tetu tim di kom gi miel amiela.

¹¹Gin kibino dwogo ki Misiri bala winy apor kitek, kede ki Asiria bala aweleko. Ango abino bobo dwoko gi i miere gi. Ango Rwot en awaco.”

¹²Rwot waco be, “Jo me Isirael oluka kede kope me abe kede angalo; jo me Yuda pwodi tie jemo na, ango Rubanga kame genere kede kacil.