Read kumam Kosea 12 Bible Online

Kosea 12 - kumam bible

Kosea 12

¹Gi dedede kame jo me Isirael timo piny yuluyul cal bala riamere kede yamo kame buko wok ki bad tetu kide. Tim me angalo kede me gero tie nyai anyaa i diere gi. Gin kitimo isikan kede Asiria, doko kicato ne Misiri mo.”

²Rwot tie pido jo me Yuda; en ebino mino jo me Isirael alola pi yote areco me kuo gi. En ebino mino gi cul kame poore kede tice gi.

³Kwaru gi Yakobo bin oute kede omin mere Esau i kare kame gin ibangin oudo kitie kede i yi toto gi; kakame Yakobo oko dongo kede, en eko ute kede Rubanga;

⁴en eyi kede malaika di eko bwone. En eko kok di ekwao be lam ne winyo. Di Rubanga oko bino bute i Betel di oko yamo kede.

⁵Manono oudo obedo Rwot Rubanga me jo yi; nyinge en Rwot!

⁶Aso nan wun ikwae ka Yakobo dwogunu but Rubanga wu; bedunu kede amara kede tim atie kakare, di ikounu bedo kede gen bute nakanaka.

⁷Rwot waco be, “Jo me Isirael kwalo jo kede misanin kalikame kide gi tie kakare, di kiko udo bero i wi jo icegun.

⁸Gin kiwaco be, ‘Wan obaro; wan otieko diato abar. Likame tie ngatamoro kame twero waco be wan odubo be pien oudo abar i yore karac.’

⁹Do ango Rubanga wu ngat kokwanyo wu ki Misiri abino bobo mino wu idonyunu bedo i iemai, bala kame oudo itimunu i kare kame ango abino kede butu i wi tim.

¹⁰“Ango bin ayamo kede inabin di ako mino gi kineno gianyuta atot. Abino da cwano inabin kelo ne jo rwonge me amuducar.

¹¹Kotie timo dub me woro caljwogi i Gilead, do jo kame tie timo manono bino to. Koyalo twonin i wi alutarin i Giligal, do alutarin nogo bino doko cal bala atukito me ingaroi kame kocoko i poti.”

¹²Kwaru wa Yakobo bin oringo i lobo me Aram kakame eko donyo kwano kiye romini pi udo dako.

¹³Rwot bin ocwao enabi pi kwanyo jo me Isirael ki Misiri, di enabi nono oko donyo gwoko gi.

¹⁴Jo me Isirael otieko timo raco kame wango cuny Rwot kitek; pi manono Rwot bino keto raco gi i wi gi di eko mino gi alola kame poore kede acae kame kibedo kede bute.