Read kumam Kosea 14 Bible Online

Kosea 14 - kumam bible

Kosea 14

¹Okwe wun jo me Isirael dokunu but Rwot Rubanga wu. Dub wu omio igetenu.

²Dokunu but Rwot di ikounu lego be, “Sasiro dub wa dedede di iko gamo ilega wa, di wan oko bino mini giayala me pak.

³Asiria likame bino lako wa; doko asigiran me yi da likame bino konyo wa. Wan likame doko obino meede waco ne caljwogi kame cing wa ocweo be gin kibedo Rubanga wa. Okwe Rwot itie kede cuny me kisa i kom jo kame tie bala idwe kic abongo ngatamoro kame kitwero ringo bute.”

⁴Rwot waco be, “Ango abino cango epali kame jo me Isirael tie kede. Ango abino maro gi kede cunya dedede; ango atieko kwanyo gero na kibut gi.

⁵Abino bedo ne jo me Isirael bala toyo abido piny. Gin kibino tuuro bala ature kame kolwongo be lili; aliasin gi bino donyo kakatut bala yen me abum me Lebanon.

⁶Ajange gi bino yarere, di kicil bala yat me olibeti. Kibino bedo kede ngwece amit bala ngwece me abum me Lebanon.

⁷Gin kibino bobo gwok i dud tipo nango. Kibino bedo libaliba bala kodi atie dongo i poto; kibino tuuro bala olok di nying gi ko bedo iruo bala bwini me Lebanon.

⁸Jo me Isirael, bedunu li kede kop moro amakere kede caljwogi. Ango abino winyo ilega wu di ako gwoko wu. Abino bedo ne wu bala tipo me yat Saipuras kalikame pote mege ony; bero dedede kame wun itienu kede wok kibuta.”

⁹Jo dedede ariek poore niang gi nogi; jo kame ngeo poko gikaber kede arac poore ngei gi. Pien yote ka Rwot tie kakare, jo kopoore lubo gi, do kigetaro jodubo.