Read kumam Kosea 2 Bible Online

Kosea 2 - kumam bible

Kosea 2

¹Aso, lwong jo Isirael wadu be “Jo ka Rubanga” kede ne amiegu wu be “Konyuto negi Cuny me Kisa”.

²Idwe na, ngangaunu toto wu. Bed bala en bobo likame etie dako na, doko ada likame abedo cware, ngangaunu en tetekeny ewek adote kede tim mere me malaya.

³Ka likame eweko, ango abino gonyo igoen mege di eko dong nono bala kite kame oudo etie kede i ceng kame konywale kede. Abino mine edoko cal bala wi tim kakotuo di orio pii ko bino neke.

⁴Ango likame abino nyuto ne wun idwe mege cuny me kisa, pien wun ibedunu idwe kame onywalo i tim me malaya.

⁵Toto wu obedo timo malaya; en ngat kame eyaco wu etimo gi me lewic. En ewaco be, “Ango abino ot but ipalon na; gin en kame kimia cam kede giamata, igoen me yer kede igoen aliamaliam, mo me olibeti kede bwini.”

⁶Pi mano, ango abino cego yongayo mere kede okuto di ako gero cel me apama luke, tetekeny kur eud kabeo.

⁷En ebino ringo wapo ipalon mege do likame ebino mako gi. En ebino mono gi do likame ebino udo gi. Di en eko bino waco be, “Ango abino yai di ako dok but cwara me agege, pien i kare kame ango oudo atie kede bute, ango oudo atie i kuo aber lono nataman.”

⁸En likame oudo engeo be ango en kame oudo amie alos, bwini, kede mo me olibeti, kiton siliba kede saabu kame en oudo etio kede me woro Baal.

⁹Pi mano, ango abino twone alos kede bwini na ka kare gi otuno, doko abino gamo egoe na me yer kede egoe na aliamaliam kame oudo amie me umo kome.

¹⁰Ango abino gonye di eko dong nono i nyim ipalon mege. Likame tie ngatamoro kame bino twero lake ki cinga.

¹¹Ango abino jiko ilel mege dedede, ibagai mege me buli mwaka, Ibagai me Por Duwe, kede me Sabato, kede ibagai kame kociko apat dedede.

¹²Ango abino dudubo olok kede epigi mege kame en ewaco be ipalon mege ocule kede pi gikame en etimo negi. Ango abino mino gi kidoko abum di leini me obar ko donyo camo gi.

¹³Ango abino mine alola pi kare dedede kame en bin wie owil keda, kare kame en ebedo woro kede Baal di ewango odok angwe kur bute, kede kare kame en bin engapo kede mwolere mege di eko yai ot lubo ipalon mege. Rwot en owaco.

¹⁴Pi mano, ango nataman abino bitao cunye di ako tere i wi tim di ako yamo kede ki kunono kede mwolo.

¹⁵Ki kunono ango abino dwoko ne olok mege di ako mino Aditot me Peko[4] doko ekeko me gen. En ebino yei kop na kikuno bala bin i kare mere me aponga, kare kame bin en eyai kede ki lobo me Misiri.

¹⁶Cako i ceng nono en ebino lwonga be, “Cwara,” do likame bobo be “Baal na.”[5]

¹⁷Pien ango abino kwanyo nying me Baal tenge ki doge di likame bobo eko bino lwongo nying nono atwal.

¹⁸I kare nono ango abino timo isikan kede leini me obar, winy kame por i malo, kede jamini kame liao alia i piny, tetekeny gin likame kibino timo ne jo na gimoro arac. Ango abino kwanyo tenge ki lobo jamini dedede me yi, di ako mino jo na bedo kede mulem kede anapakin.

¹⁹Di ango ako bino teri, in Isirael, iko bedo dako na atwal; ango abino nyuto ni kuo kopoore kede me ateni; abino nyuto ni amara kalikame lokere kede cuny me kisa di ako mini ibedo mera atwal.

²⁰Ango abino bedo kede genere di ako teri ibedo dako na, di in iko bino ngena bala Rwot.

²¹I kare nono ango abino gamo kwac me jo na di ako mino kot cwei i lobo,

²²di lobo ko bino ceko engano, olok, kede olibeti i aditot me Jeserel.

²³Ango abino cuno kodi di ako nyuto cuny me kisa but Lo Rukama.[6] Abino waco ne Lo Ami[7] be, “Wun en jo na,” di gin kiko bino gamo be, “In en Rubanga wa.”