Read kumam Kosea 9 Bible Online

Kosea 9 - kumam bible

Kosea 9

¹Jikunu kilel, Okwe wun jo me Isirael! Kur itacunu bala kame atekerin apat timo. Wun itimunu tim me malaya di ikounu weko Rubanga wu. Icaterenu but rubanga Baal bala imalayan, di cunyu oko maro engano kame en eculo wu kede.

²Do oyotoyot ibinunu doko li kede engano kede mo me olibeti, doko da bwini anyen bino bedo li.

³Jo me Isirael likame bino dong bedo i lobo ka Rwot, do gin kibino dok Misiri, doko da kibino camo cam kobedo me kwer i Asiria.

⁴I lobere me kumbor gin likame kibino twero mino Rwot giamia me bwini, doko da giayala gi likame bino yomo cunye. Giayala gi nogo bino bedo bala cam me kakame okoko kiye dano oto; gin kibino came kenekene pi udo yengo, do likame kobino tero moro kiye i tempulo ka Rwot bala giamia.

⁵Nyo kame gin kibino timo i ceng kame komoko me ebaga, kede i ceng me ebaga ka Rwot?

⁶Kame can opoto di jo oko sasarun, jo me Misiri bino coko gi pi yiko gi Mempi kunono. Okuto kede doi bino mwono abar gi me siliba kede kakame miere gi oudo cungo iye.

⁷Ceng me alola otieko tuno, ceng kame jo bino udo kede gikame kipoore udo; Isirael bino niang da! Wun iwacunu be, “Enabi noni ngamingo. Icuo kame twer me tipo tie i kome noni otieko poi.” Wun idaganu adikinicel pien dub wu tot twatwal.

⁸Rubanga ocwa bala enabi pi kwenyaro jo mege me Isirael. Do kabedere dedede kame ango aoto iye itienu cika bala ciko winyo. Doko da akadi i tempulo jo tie dagi enabi.

⁹Wun itiekunu dubere atwal atwala pi tice wu areco, bala bin cuo me Gibea. Rubanga bino yutuno dub wu di eko mino wu alola.

¹⁰Rwot waco be, “Kakame ango audo kede Isirael, oudo ecal bala udo olok i wi tim. Kakame ango aneno kede joakwari wu, oudo ecal bala neno anyakini me epigi acako cek me agege. Do kakame itununu kede i moru me Peor, wun i ikounu donyo i tim me lewic me woro Baal, di do ikounu doko rac i wanga bala rubanga kame cunyu oudo maro nono.

¹¹Deyo me Isirael bino por tenge bala winyo; gamo yic, yac kede nywal bino bedo li.

¹²Do akadi koto ibedunu tie kede idwe, ango koto akwanyo gin dedede di ako weko wu koko. Kame ango ajalo wu, ateteni ibinunu bedo tie i can!”

¹³Bin ango oudo aneno Isirael bala tugo kame kopito i lobo amio; do nan Isirael miero tel idwe mege eter gi ot nek gi.

¹⁴Okwe Rwot, nyo kame poore akwai pi timo ne jogi? Mi mon gi bed kede wok yic, doko da mi cak bed li i tune gi.

¹⁵Rwot waco be, “Tim gin areco dedede bin ocakere i Giligal; ango ako cako dagi gi i kunono. Doko pi tice gi areco, ango abino riamo gi tenge ki oda. Likame doko abino meede maro gi. Jotel gi dedede obedo kede tim me epali buta.

¹⁶Jo me Isirael cal bala yat kame aliasin mege otuo, likame etwero nyak. Do akadi bed bala koto kibed tie kede idwe, ango koto aneneko idwe kame kimaro nogo dedede.”

¹⁷Isirael odagi winyo kop ka Rubanga na. Nan eda ebino dagi gi; kibino ot rimo piny i diere me atekerin apat.