Read kumam Yoweri 1 Bible Online

Yoweri 1 - kumam bible

Yoweri 1

¹Manoni en kop ka Rwot but Yoweri wot ka Petuel.

²Winyunu kop noni, Okwe wun joadongo, cikunu yitu, wun jo dedede me Yuda. Benyo, cako sek lem gikame cal kamanoni otieko timere, i kare wun arabo i kare ka joakwari wu?

³Tatamunu kop mere but idwe wu, doko mito idwe wu da tatamo kop mere ne idwe gi, di idwe nogo da ko tatamo ne lwak kame lubo.

⁴Ikodeta me obonyo oraramun i kom cam me poti di lubere aluba, gikame ekodet acel oweko, ekodet alubo mere ocamo.

⁵Ceunu di ikounu koko, wun joamera; boroborunu dwan wu kede koko, wun jomat bwini, pien olok me timo bwini anyen otieko doko li.

⁶Twon ekodet me obonyo otieko suro lobo wa, gin kitek doko wel gi likame marere; lak gi cal bala me engu, kibitobito bala me engu adako.

⁷Gin kitieko muducaro olok wa, doko kitieko koco epigi wa. Kitieko pacaro poke me kor gi, paka jange gi dong tar atara.

⁸Kokunu bala nyako kame kok pi to me icuo kame oudo oyaro nyome.

⁹Giamia me alos kede me amata kame komio i ot ka Rwot otieko doko li. Josaseredoti kok, jotic ka Rwot kok pien gin kili kede giayala.

¹⁰Poti ler alera; lobo do cal bala dano kame tururo pien kotieko muducaro cam, olok otieko tuo, yen me olibeti oner.

¹¹Cuny wu poore poti, wun jopur; kokunu, wun jo kame igwokunu olok, pien engano kede mawele, kede cam dedede me poti kotieko muducaro.

¹²Olok kede epigi otieko ner; pomagurunet, tugere kede yen apat kame nyak dedede otieko ner di kiko tuo. Ateteni ilel otiek kibut jo.

¹³Ngapunu ipukoi di ikounu kok, wun josaseredoti; boroborunu koko, wun jo kame timo tic i alutari. Donyunu i ot ka Rwot di ikounu kok iwor kiakia! Giayala me alos kede giayala amata otieko doko li i ot ka Rwot Rubanga wu.

¹⁴Cikunu kare me kanyo kec; lwongunu cokere! Cokunu joadongo kede jo dedede me Yuda i ot ka Rwot Rubanga wu, di ikounu kok bute.

¹⁵Ceng ka Rwot iyapiyapi, ceng kame Rwot bino kelo iye can. Okwe lworo kame ceng no bino kelo!

¹⁶Komuducaro cam wa di onenunu. Ilel kede yomcuny otieko do doko li i ot ka Rwot Rubanga wa.

¹⁷Kodere to i dog lobo kotuo, dere tie nono; doko kitieko dubere pien cam kame kokano i yi gi li.

¹⁸Leini tie dinyo adinya! Doke bedo wire awira pien lum me acama li negi; akadi romini da tie neno can.

¹⁹Okwe Rwot, ango akok buti, pien mac otieko wango lum kame doke camo, kede yen dedede.

²⁰Akadi leini me obar da kok buti pien isamai otieko tuo.