Read kumam Yoweri 3 Bible Online

Yoweri 3 - kumam bible

Yoweri 3

¹Rwot waco be, “I kare nono ango abino dwoko mulem ne jo me Yuda kede Yerusalem.

²Ango abino coko atekerin dedede di ako kelo gi i aditot me Yekosapat.[1] Ango abino pido kede gi i kunono pi jo na me Isirael. Gin kitieko sarakino gi i diere me atekerin di gin kiko popoko lobo na.

³Gin kiuco alulu me popoko jo na. Awobe gin kiseso kede imalayan, do anyira kiko seso kede bwini abwina di kiko mato.

⁴“Okwe wun jo me Taya, Sidon kede jo me adulion dedede me Pilistia, nyo ine kame wun itimunu nango? Benyo, tie gimoro kame itienu nyango? Ka itienu timo onyanga, ango abino dwoko i wi wu oyotoyot gikame itimunu.

⁵Wun itiekunu kwanyo siliba kede saabu na, jamini na kame pirgi tek di ikounu tero gi i tempulon wu.

⁶Wun itiekunu tero jo me Yuda kede me Yerusalem kakame bor kede piny gi, di ikounu cato gi but jo Gurik.

⁷Do nataman ango abino mino gin kiyai kiweko kabedere kame wun oudo icatunu gi iye, di ango ako bino timo ne wun gikame wun itiekunu timo ne gin.

⁸Ango abino mino kocato idwe wu ne jo me Yuda, di gida kiko bino cato gi ne jo Seba, ateker kame tie i piny abor. Ango Rwot atieko waco.

⁹“Tatamunu kop noni i diere me atekerin be, ‘Iikerenu pi yi; supunu cuny isirikalen. Miunu isirikalen bin di gin iyapiyapi kan.

¹⁰Tetunu leb kwei me doke wu dok ipimai, kede pale wu me lwero olok dok tongini. Akadi ngat agoro da poore wac be en ebedo ngayi atek.

¹¹Susunyunu bino, wun atekerin dedede kame oluko kanoni, cokerenu i aditot kunono.’ ” Okwe Rwot, cwai isirikalen ni sur gi!

¹²“Mito atekerin iikere, di gin kiko bino i aditot me Yekosapat. Ango abino bedo piny kunono pi ngolo kop ne atekerin dedede kame kio kede kanoni.

¹³Gin kireco twatwal; miunu pala cak tic i kom gi, pien gin kical bala kal kotieko cek. Donyunu ikounu nyonyono gi bala olok kame konyonyono i bur kopong me biino bwini, paka bwini atie iye alamar.”

¹⁴Jo tutumian kede tutumian ocokere i Aditot me Ngolo kop. Pien ceng ka Rwot iyapiyapi kede Aditot me Ngolo kop.

¹⁵Ceng kede duwe odoko col cucucuc, doko acer da oweko rieny.

¹⁶Rwot dorano bala engu ki Sion; en ewoto dwane ki Yerusalem, di lobo kede malo ko yayangun. Do Rwot en ngat kame jo mege ringo gwokere bute; en ecal bala kakatek me gwokere but jo me Isirael.

¹⁷“Di do wun jo me Isirael ikounu bino ngeno be ango Rwot Rubanga wu, abedo Sion, moru na kacil. Yerusalem bino bedo bomba kacil; jokumbor likame bobo bino mane.

¹⁸“I kare nono olok bino dure i wi mori, doko doke kame mio cak atot bino bedo tie i wi imukuran; pii bino bedo mol ki i isamai dedede me Yuda pi kare lung. Atan me pii bino lelepa i ot ka Rwot, di eko bido aditot me Sitim.

¹⁹“Misiri bino doko kabedo kalikame jo bedo iye, di Edom ko doko wi tim kakame gimoro li iye, pi tim me gero kame gin kitimo i lobo me Yuda, di kiko onyo remo me jo mege abongo raco moro.

²⁰Ango abino nyango remo gi; ango likame abino weko aweka jo kotimo raco. Do Yuda jo bino bedo tie iye nakanaka, kede Yerusalem da jo bino bedo tie iye pi kare dedede, pien ango Rwot abedo i moru me Sion.”