Read kumam Amosi 8 Bible Online

Amosi 8 - kumam bible

Amosi 8

¹Di Rwot oko bobo mina gianyuta ace kaman: Ango aneno ebukit kame anyakini tie iye pong.

²Di Rwot oko penya be, “Amosi, itie neno nyo?” Ango ako dwoko be, “Ebukit kame anyakini tie iye pong.” Di Rwot oko waco na be, “Ajikini otieko tuno ne jo na me Isirael. Ango likame doko abino loko tam na me mino gi alola.

³I ceng nono were kame kowero i paco me abaka bino lokere doko were me koko. Kom jo oto bino rade kabedere dedede. Pi manono ling titi!”

⁴Winyunu gikame atie yamo, wun jo kame inyonyonunu jo kame piny oloo, di ikounu tamakino muducaro jocan atie i lobo noni.

⁵Wun iwacunu kenu kenu be, “Awene kame ceng kacil me Ebaga me Por Duwe bino jik kede, tetekeny wan ocak cato engano wa? Awene kame piny bino yuto kede i ceng Sabato, tetekeny wan ocak bobo cat? Di do wan oko bino sero jo; obino tic kede gipim me aram kede misani kame kolalago pi kwalo jo kame wilo jame kibut wa.

⁶Wan obino cato engano akony mere li i wel amalo. Obino udo ngacan kalikame twero culo banya mere, akadi banya atitidi arom kede wel me wilo kalabanda, di wan oko wile bala epasoit.”

⁷Rwot kame ikwae ka Yakobo wakere pire okwongere be, “Likame wia bino wil kede tice gi areco.

⁸Pi manoni abino mino lobo noni yangere, di jo dedede kame bedo iye ko bedo kede iturur. Lobo noni dedede bino tingere di epoto bala ecilet me Nail atie Misiri.

⁹I ceng nono abino mino ceng donyo di piny ko doko col i dier iceng, ango Rwot Rubanga en awaco.

¹⁰Abino loko ibagai wu doko iturur, di were wu dedede ko doko koko. Abino mino jo dedede ngapo ipukoi di kiko kiso wi gi. Ibinunu bedo cal bala jonywal atie koko pi to me atin gi acel kenekene. Gi dedede kame bino timere bino jik di ekelo twon lito.

¹¹“Kare ateteni tie bino kame ango abino cwano kede kec i lobo; likame kec me cam amoto orio me pii. Kec kede orio me winyo kop na en kame jo bino bedo tie kede, ango Rwot Rubanga en awaco.

¹²Gin kibino wiratoi cako ki Nam Oto tuno i nam adwong me Mediterania, kede cako ki bad tetu malo tuno i bad tetu kide; gin kibino donyo ringo tuni tuni mono kop na, do likame kibino ude.

¹³I ceng nono akadi anyira kede awobe apwodi tek bino popoto di kiwile pi orio me pii.

¹⁴Jo kame kwongere i nying rubangan me Samaria di kiwaco be, ‘I nying rubanga me Dan,’ amoto be, ‘I nying rubanga me Beereseba’, jo nogo bino popoto di likame kiko bino doko yai.”