Read kumam Amosi 9 Bible Online

Amosi 9 - kumam bible

Amosi 9

¹Ango aneno Rwot di tie cungo i nget alutari, di eko waco be, “Dip wi ipirin me tempulo paka dud apama piny yangere. Tuturo gi di kiko popoto i wi jo. Jo kodong mege ango abino neko gi i yi, likame tie ngatamoro kikom gi kame bino lanyo, likame tie ngatamoro kame bino bwot.

²Akadi bed bala kikuny piny di kiko donyo i kabedo me jo oto, ango abino woto gi ki kunono. Akadi bed bala kiyiti i kabedo me i malo, pwodi ango abino mako gi di ako dwoko gi piny.

³Akadi bed bala kipwoni i wi moru me Kamel, ango pwodi abino mono gi di ako mako gi. Ka kipwono na piny i dud nam adwong, ango abino golo cik ne twol me nam di en eko totongo gi.

⁴Akadi bed bala jokwor gi mak gi di oko donyo kolo gi pi koto tero gi ot bedo mabus obukui, do ango abino golo cik di oko neneko gin dedede. Ango abino ciko wanga i kom gi pi kelo negi can do weko bero.”

⁵Rwot Rubanga me jo yi mulo wi lobo, di en eko yangere, di jo dedede kame bedo iye ko bedo kede iturur. Wi lobo lung donyo tingere di epoto bala ecilet me Nail i Misiri.

⁶Rwot gero agolai mege i kabedo me i malo, di eko peto edou koyarere malo i wi lobo. En elwongo pii me nam adwong, di eko onyo gi i wi lobo. En nyinge Rwot!

⁷Rwot waco be, “Okwe wun jo me Isirael, kur iterunu be wun ipatunu kede jo me Abisinia. Ango en kame akwanyo jo Pilistia ki Kurete, doko da ango en kame akwanyo jo me Aram ki Kir bala kame akwanyo wuda kede ki Misiri.

⁸Ango Rwot Rubanga wanga tie i kom ajakanut kopong kede dub me Isirael noni, doko abino muducaro en ki wi lobo. Do likame abino muducaro jo dedede me Isirael.

⁹“Ango abino golo cik di ako yayango jo me Isirael i diere me atekerin apat, bala kame koyayango kede alos atie i kekei, di likame tie ngat arac moro kame ko bino bwot.

¹⁰Kobino neneko jodubo duc i yi, gin jo kame kiwaco be, ‘Likame tie gikarac moro kame bino timere ne wa.’ ”

¹¹Rwot waco be, “Ceng tie bino kame ango abino kiarao kede ajakanut ka Daudi kame nataman cal bala ot kopopoto. Ango abino gere di bobo eko dok i cal mere kariki sek.

¹²Di jo me Isirael ko bino mano bobo donge me lobo me Edom, kede me atekerin ace koudo obedo mega. Ango Rwot en awaco, doko gikame awaco bino cobere.

¹³“Kare tie bino,” Rwot en owaco, “kame kare me cuno kodi me engano bino tuno di udo pwodi likame kotieko nyaro ace ki poti; doko da kobino puro olok anyen di eko cek di pwodi likame kotwero tieko bino anyakini me olok me dwete kokato. Bwini awinyiwinyi bino totonun ki wi mori, ebino mol piny ki wi imukuran.

¹⁴Ango abino dwoko ne jo na me Isirael mulem gi me kare kasek. Gin kibino temuno gero bomban gi di kiko donyo bedo iye; gin kibino puro poti me olok di kiko mato bwini mere; kibino puro poti di kiko camo gikame kipuro.

¹⁵Ango abino sipakino jo na i lobo kame oudo amio gi bala yat kame kopito, di likame oko doko bino puto gi kiye.” Rwot Rubanga wu en kowaco.