Read kumam Yona 1 Bible Online

Yona 1 - kumam bible

Yona 1

¹Bin Rubanga oyamo kede Yona wot ka Amitai.

²En ewaco ne be, “In oti i bomba adwong me Ninebe di iko waco ne raco mere; pien ango angeo dub me jo mege.”

³Do Yona oko gire lokere ot Tarusi pi ringo tenge kibut Rwot. En eoto paka Jopa di eko donyo i emeri koudo tie ot Tarusi. En eko culo sente mere me yongayo di eko donyo i emeri kede jokwang pi ot kede gi Tarusi, me wek ering tenge kibut Rwot.

⁴Do Rwot oko cwano yamo atek i nam; yamo nono oudo ger twatwal omio lworo oudo tie be emeri nono oudo twero atuturun.

⁵Jokwang emeri oko doko lwor, di ngat acelacel kikom gi oko donyo koko but rubanga mere. Gin kiko donyo lwomolwomo yec koudo tie i emeri i pii pi mine doko wekeweke. Esawa nono Yona oudo odonyo piny i yi emeri eko nino elelejun.

⁶Ngadwong me jokwang oko ude kuno di oko penye be, “Kom in itie nino? Yai malo ileg but Rubanga ni, cengemogo etwero konyo wa likame otounu.”

⁷Jokwang oko donyo yamo ken gi ken gi be, “Bianu olamunu gagi tetekeny ongeunu ngat komio can noni opoto i kom wa.” Gin kiko lamo gagi di gagi oko nyuto Yona.

⁸Gin kiko waco ne Yona be, “Wace wa gikomio can ni opoto i kom wa. Tic nin nyo? In iwok ki tuai? Turu tie tuai? In dano me ateker mene?”

⁹Yona oko dwoko be, “Ango abedo Ngaeburania. Ango aworo Rwot Rubanga me malo, ngat kocweo nam kede lobo.”

¹⁰Yona oko tuno kiton waco negi be en oudo etie ringo tenge kibut Rubanga. Cuo nogo oko medo ameda doko lwor, di kiko waco ne be, “Pinyo komio itimo kamano?”

¹¹Di do gin kiko penye be, “Nan wan do otim ni nyo, tetekeny nam kwei ne wan?” Pien buko me yamo oudo tie meede ameda.

¹²En eko waco negi be, “Kwanyanu ikounu uca i pii, di nam ko bino kwei ne wu; pien ango angeo be yamo ager noni obino ne wu pi ango.”

¹³Bed bala kamanono da, cuo ka oko cane kwango emeri ot i dog nam, do likame kiko twero, pien yamo oudo tie meede ameda buko kitek.

¹⁴Gin kiko kok but Rwot be, “Okwe Rwot, wan okwai, kur imi wa otoi pi dano noni. Kur imar i wi wa raco me onyo remo ali kede raco moro; pien in, Okwe Rwot, itieko timo bala kame yomo cunyi.”

¹⁵Aso gin kiko tingo Yona di kiko uce i pii; di do nam oko kwei.

¹⁶Cuo nogo oko medo ameda bedo kede lworo but Rwot, di kiko mino giayala but Rubanga di kikwongere.

¹⁷Do Rwot oko mino eputa adwong omwonyo Yona; Yona oko tieko iceng adek kede iwor adek i yi eputa.