Read kumam Yona 2 Bible Online

Yona 2 - kumam bible

Yona 2

¹Di Yona oko lego but Rwot Rubanga mere di oudo etie i yi eputa di ewaco be,

²“Ango alwongere but Rubanga kakame oudo atie kede i peko, di en eko gamo doga. Ango akok kakame oudo atie kede i kabedo me jo oto, di in iko winyo dwana.

³In iuca i pii atut, i dier nam, di pii oko luka ouma, di ebuka ni apek dedede oko mol beo ki malo i koma.

⁴Di ango ako waco be kotieko riama tenge ki nyimi, bobo likame abino twero neno tempulo nin kacil.

⁵Pii omwonya; nam olwinya; egira otutuko wia.

⁶Adonyo piny paka i dud moru, i kabedo kame kogoo ekeko me erute mere atwal; do in, Okwe Rwot Rubanga na, iko wota ki kakatut di akuo.

⁷Kakame kuo na oudo tie yai kede, ango ako yutuno in Rwot; ako cwano kwac na buti, di oudo in itie i tempulo ni kacil.

⁸Jo kaworo caljwogi gikame kony gi li otieko weko winyo kop nin.

⁹Do ango abino mini pwoc, abino mini giayala di ako timo gikame akwongere iye. Alako wok kibut Rubanga.”

¹⁰Di Rwot oko waco ne eputa pi nyeto Yona i lobo kakatek, eputa oko timo kamanono.