Read kumam Wel 1 Bible Online

Wel 1 - kumam bible

Wel 1

¹I ceng me agege i duwe me are i mwaka me are ingei jo me Isirael yai ki Misiri, Rwot oko yamo kede Musa i eema mere me riamo i wi tim me Sinai. En ewaco ne be,

²“In kede Aaron marunu wel me jo me Isirael, di ilubunu kede ikekon ka joakwari gi kede diakal acelacel. Wandikunu nying cuo dedede

³kame tie cako ki mwakini ot are ot malo, jo kame twero ot i yi. Marunu gi i ume i ume.

⁴Dano acel kobedo ngadwong ki buli ekeko acelacel me ateker bino konyo wu.”

⁵Magi en nying jo kame oko yero ki buli ekeko acelacel pi timo tic noni: Ki ekeko ka Ruben, Elisur wot ka Sedeur. Ki ekeko ka Simeon, Selumiel wot ka Surisadai. Ki ekeko ka Yuda, Nakason wot ka Aminadab. Ki ekeko ka Isakar, Netanel wot ka Suar. Ki ekeko ka Sebulun, Eliab wot ka Kelon. Ki ekeko ka Epuraimu, Elisama wot ka Amikud. Ki ekeko ka Manase, Gamaliel wot ka Pedasur. Ki ekeko ka Benjamin, Abidan wot ka Egidioni. Ki ekeko ka Dan, Akieser wot ka Amisadai. Ki ekeko ka Aser, Pagiel wot ka Akeran. Ki ekeko ka Gad, Eliasap wot ka Dewel. Ki ekeko ka Naputali, Akira wot ka Enan.

¹⁷Kede kony me cuo tomon kiwie are nogi, Musa kede Aaron

¹⁸oko lwongo jo dedede me Isirael karacel i ceng me agege me duwe me are. Gin kiko wandiko jo di lubere kede ikekon me diakale kede ude gi. Kiwandiko nying cuo dedede me cako ki mwakini ot are ot malo, di kiko maro gi,

¹⁹bala kame Rwot oudo ociko ne Musa. Aso Musa bin oko wandiko nying jo i wi tim me Sinai.

²⁰Oko wandiko nying cuo kame cakere ki mwakini ot are ot malo, gin jo kame oudo twero ot i yi. Kiwandiko wel me jo di lubere kede ikekon me diakale kede ude gi, di ocako kede ekeko ka Ruben. Wel gi oko bedo kaman: jo tutumia ot ongwon kiwie kanyape kede tol kany (46,500) ki ekeko ka Ruben, jo tutumia ot kany kiwie kanyangon kede tol adek (59,300) ki ekeko ka Simeon, jo tutumia ot ongwon kiwie kany kede tol kanyape ki ot kany (45,650) ki ekeko ka Gad, jo tutumia ot kanyaare kiwie ongwon kede tol kanyape (74,600) ki ekeko ka Yuda, jo tutumia ot kany kiwie ongwon kede tol ongwon (54,400) ki ekeko ka Isakar, jo tutumia ot kany kiwie kanyaare kede tol ongwon (57,400) ki ekeko ka Sebulun, jo tutumia ot ongwon kede tol kany (40,500) ki ekeko ka Epuraimu, jo tutumia ot adek kiwie are kede tol are (32,200) ki ekeko ka Manase, jo tutumia ot adek kiwie kany kede tol ongwon (35,400) ki ekeko ka Benjamin, jo tutumia ot kanyape kiwie are kede tol kanyaare (62,700) ki ekeko ka(...)

⁴⁷Do oudo likame komaro Jolebi i kom jo me ikekon apat.

⁴⁸Pien Rwot oudo owaco ne Musa be,

⁴⁹“Ka itie wandiko nying jo me Isirael, kur irib kiton jo me ekeko ka Lebi.

⁵⁰Do poore iket Jolebi bed jo kame lo Eema nango kede jamini dedede kame tie iye. Gin kibino bedo jo kame yeo Eema nono; kibino tic iye, doko da kibino gero kimere gi luke.

⁵¹Kame itienu dak, Jolebi bino tako Eema nono di kiko bobo ot sipe i kabedo anyen me kimere. Dano moro apat kame bino noko Eema nono kobino neke.

⁵²Jo ace me Isirael bino gero kimere gi di lubere kede ikodeta gi, ekodet acelacel kede imendera mere.

⁵³Do Jolebi bino gero kimere gi luko Eema na, tetekeny kur ngatamoro noke di eko mina abedo kede lilo i kom jo me Isirael; gin kibino bedo jo kame daro Eema nono.”

⁵⁴Jo me Isirael oko timo gi dedede bala kame Rwot oudo ociko ne Musa.