Read kumam Wel 10 Bible Online

Wel 10 - kumam bible

Wel 10

¹Rwot oko waco ne Musa be,

²“Tim agwarai are me nyonyo siliba; ibino teto gi ateta kede enyondo. Tic gi bino bedo me lwongo jo i cokere kede me mino jo tako kimere di kiko cako ot.

³Kame kokuto agwarai are nogo dedede, jo dedede bino cokere buti i ekeko me Eema me ariamakin keda.

⁴Do ka kokuto acel kenekene, jotel me jo me ikekon apapat me ateker me Isirael bino cokere i nyimi.

⁵Kame kokuto agwara acel kenekene kede dwan me yi, jo me kimere me bad tetu kide bino yai cako ot;

⁶kame oko kuto agwara tien me are kede dwan me yi, jo me kimere me bad tetu piny bino yai cako ot.

⁷Do ka jo poore cokere, kobino kuto agwara, do likame kede dwan me yi.

⁸Awobe ka Aaron kobedo josaseredoti en kame bino kuto agwarai; cik me kuto agwarai bino bedo cik kame mako kiton ikwae wu me kare dedede.

⁹“Ka itienu ot yi i lobo wu kede jokwor adio wu, ibinunu kuto agwarai kede dwan me yi di ango Rwot Rubanga wu ako bino yutuno wu, di ako lako wu kibut jokwor wu.

¹⁰Doko da i ceng kame itienu kede kilel, i ceng kame komoko me kwero ibagai wu i agege me por duwe, ibinunu kuto agwarai i wi giayala awanga kede i wi giayala me nywak, manono bino mina ayutuno wu, ango en Rwot Rubanga wu.”

¹¹I ceng me ot are me duwe me are me mwaka me are, edou oko yai ki wi Eema ka Rwot.

¹²Di jo me Isirael oko cako ot lubo edou di kikokobo akokob yai ki wi tim me Sinai, di edou oko ot cungo i wi tim me Paran.

¹³Manoni en oudo tien me agege me Musa mino jo cik ka Rwot di kiko yai.

¹⁴Jo dedede koudo tie i imendera me jo me ekeko ka Yuda en oko cako yai, ikodeta kede ikodeta di kilubere aluba. Nakason wot ka Aminadab en koudo telo gi.

¹⁵Netanel wot ka Suar en oko telo ekodet me jo me ekeko ka Isakar,

¹⁶kede Eliab wot ka Kelon en oko telo ekodet me jo me ekeko ka Sebulun.

¹⁷Di oko tako Eema ka Rwot piny di jo me ekeko ka Gereson kede jo me ot ka Merari oko yene di kiko cako ot.

¹⁸Alubo mere, jo dedede koudo tie i imendera me jo me ekeko ka Ruben en oko yai, ikodeta kede ikodeta di kilubere aluba. Elisur wot ka Sedeur en koudo telo gi.

¹⁹Selumiel wot ka Surisadai en oko telo ekodet me jo me ekeko ka Simeon,

²⁰kede Eliasap wot ka Dewel en oko telo ekodet me jo me ekeko ka Gad.

²¹Di Jolebi me ot ka Kokat kame oudo tic gi yeno jamini me woro Rwot oko gida yai. Bin oko gero Eema ka Rwot i kabedo me kimere anyen di pwodi likame gin kituno kunono.

²²Alubo mere, jo dedede koudo tie i imendera me jo me ekeko ka Epuraimu en oko yai, ikodeta kede ikodeta di kilubere aluba. Elisama wot ka Amikud en koudo telo gi.

²³Gamaliel wot ka Pedasur en oko telo ekodet me jo me ekeko ka Manase,

²⁴kede Abidan wot ka Egidioni en oko telo ekodet me jo me ekeko ka Benjamin.

²⁵Alubo mere, jo dedede koudo tie i imendera me jo me ekeko ka Dan en oko lubo kicen, ikodeta kede ikodeta di kilubere aluba. Gin oudo kigwoko jo ki asura kame twero wok kicen ngei gi. Akieser wot ka Amisadai en koudo telo gi.

²⁶Pagiel wot ka Akeran en oko telo ekodet me jo me ot ka Aser,

²⁷kede Akira wot ka Enan en oko telo ekodet me jo me ekeko ka Naputali.

²⁸Manoni en epone kame bin jo me Isirael osirito kede, ikodeta kede ikodeta, i kare kame kiyai kede.

²⁹Musa owaco ne Kobab dano me Midian, en papa me dako mere be, “Wan otie yai ot i kabedo kame Rwot oudo owaco be, ‘Abino mine butu.’ Upere kede wa, wan likame obino teri kirac; pien Rwot ocikere timo gikaber ne jo me Isirael.”

³⁰Do Kobab oko dwoko ne Musa be, “Ango likame abino upere kede wu, do ango abino dok i lobo na amaka but joe na.”

³¹Musa doko oko waco ne be, “Kur iwek wa, pien in ingeo kakame wan opoore gero iye kimere i wi tim, manono mio ibino bedo bala ngat kame nyuto ne wa yongayo.

³²Doko medo i wi manono da, ka in iupere kede wa, gi dedede aber kame Rwot bino timo ne wa wada obino timo nin.”

³³Aso, jo me Isirael oko yai ki moru ka Rwot. Gin kiko ot sapali me ceng adek, di Jolebi kame oudo yeo Sanduku me Isikan ka Rwot en oudo telo negi yongayo, pi mono kakame kipoore wei iye.

³⁴Kame gin oudo kitie kobo, edou ka Rwot oudo bedo i wi gi i esawa me iceng.

³⁵Tek kame oudo kocako yeno Sanduku me Isikan pi kobo, Musa oudo waco be, “Rwot, yai iko bwono jokwor ni di iko mino gi kiringi kisasarun.”

³⁶Doko da kame jo oudo otuno kakame kipoore gero iye kimere pi wei, en oudo ewaco be, “Rwot, dwog but jo tutumian kede tutumian me Isirael.”