Read kumam Wel 12 Bible Online

Wel 12 - kumam bible

Wel 12

¹Kakame oudo kitie kede Kaserot, Miriamu kede Aaron oko yamo kirac i kom Musa, pien Musa oudo onyomo nyako me jo Kus.

²Gin kiwaco be, “Benyo, Rwot oyamo kibut Musa kenekene? Mam eyamo kibut wada?” Rwot oko winyo kop gi nono.

³Aso, icuo anyinge Musa oudo obedo dano amwol adikinicel, en oudo emwol kalamo jo dedede me wi lobo.

⁴Rwot oko ngole waco ne Musa, Aaron kede Miriamu be, “Wun jo adek go wokunu ikounu bino i Eema na me ariamakin.” Aso, jo adek nogo oko ot kunono.

⁵Rwot oko bino piny i cal me epir me edou, di eko cungo i ekeko me Eema, di eko lwongo Aaron kede Miriamu di gin kiko ot anyim.

⁶Rwot oko waco negi be, “Winyunu kop na. Kame inabin tie i diere wu, ango anyutere but gi i gianyuta, doko ayamo kede gi i lek.

⁷Do likame etie kamanono kede Musa; ango atieko cibe pi bedo ngat kame lo jo na me Isirael.

⁸Ango ayamo kede en wang i wang, di kope dedede tie kakaler likame i agole. Doko da en etieko neno cal nango! Do kara pinyo komio wun likame ikounu bedo kede lworo me yamo kop arac i kom Musa?”

⁹Rwot oko ngoi kede gi di eko yai.

¹⁰Kakame edou oyai kede ki wi Eema, tuo me delkom oudo otieko mako Miriamu, di kome oko doko tar bala akako. Aaron oko lokere di eko neno Miriamu di tuwo me delkom omako kome dedede.

¹¹Aaron oko waco ne Musa be, “Okwe, adwong na kur imi wa alola pi dub kame otimo mingomingo.

¹²Kur imie ebed bala atin kame konywalo di oto, di ringo kome tetucel otieko top kakame ewok kede ki yi toto mere.”

¹³Di Musa oko kok but Rwot be, “Okwe Rwot cang Miriamu.”

¹⁴Do Rwot oko dwoko be, “Ka koto papa mere oudo ongulo lau i wange, iparo be koto oudo likame ekanyakino lewic nono pi ceng kanyaare? Poore cege ooko me kimere pi ceng kanyaare, di ingei manono oko bino karuno dwoke bobo.”

¹⁵Oko cego Miriamu ooko me kimere pi ceng kanyaare, di jo likame oko yai cako sapali tuno kakame Miriamu odwogo kede.

¹⁶Di jo oko yai ki Kaserot di kiko ot gero kimere i wi tim me Paran.