Read kumam Wel 16 Bible Online

Wel 16 - kumam bible

Wel 16

¹Kora wot ka Isikar, kobedo Ngalebi me ekeko ka Kokat oko bedo kede jemo i kom tel ka Musa. Jo adek da me ekeko ka Ruben oko ribere i kome, gin en Datan kede Abiram, koudo obedo awobe ka Eliab, kede On wot ka Pelet. Gin bin kiko tero jo tol are kede ot kany me Isirael, gin jotel me ekodet kame jo oudo oyero, di kiko ot but Musa kede dwan agwai.

³Gin kiko cokere but Musa kede Aaron di kiko waco negi be, “Wun do ikangasarunu! Jo dedede me ekodet noni obedo jo ka Rwot, doko da Rwot tie kede wan dedede. Do kara pinyo komio wun itingerenu bedo kede ruom amalo rom kano kalamo ekodet me jo ka Rwot?”

⁴Kakame Musa owinyo kede kop noni, en eko poto eriebere piny.

⁵Di eko waco ne Kora kede jo dedede kame oudo eupere kede be, “Diki odiko Rwot bino nyuto ne wa ngai en kobedo mere; en ebino yei ne ngat kobedo mere, ngat kame en ebino yero, pi ot bute i alutari.

⁶In nan tim kaman: diki odiko in kede jo ni kwanyunu itatany mogo me dunyo odok angwe kur di ikounu pongo yi gi kede itonge me mac kede odok angwe kur, di ikounu cibo gi i alutari i nyim Rwot; ngat kame Rwot bino yero en kame bino bedo mere. Wun Jolebi wun en ikangasarunu.”

⁷

⁸Di Musa oko waco ne Kora be, “Kong winyunu, wun Jolebi!

⁹Wun iterunu be ebedo gimoro atitidi me Rubanga me Isirael poko wun kikom jo me Isirael, di eko yei ne wu tuno bute tetekeny itimunu tic i Eema mere, kede icungunu i nyim ekodet di ikounu tic pirgi?

¹⁰En eyei ni tuno bute, karacel kede imiegu ni Jolebi ace apat dedede, do pwodi doko itie mito tic me ngasaseredoti da!

¹¹Nan wun icokerenu karacel pi jemo ne Rwot, do likame ne Aaron.”

¹²Musa oko cwano kop pi lwongo Datan kede Abiram, gin awobe ka Eliab, do gin kiko dwoko be, “Wan likame oyaro bino.

¹³Iparo be ebedo gimoro atitidi me in kwanyo wan ki lobo amio di iko kelo wa neko wa i wi tim kan? Miero mam doko ipug wa?

¹⁴Etie kakaler be in likame ikelo wa i lobo amio, doko da likame imio wa poti kede olok. Benyo, nan bobo imito ngalo jogi? Wan likame oyaro bino.”

¹⁵Cuny Musa oko wang twatwal di eko waco ne Rwot be, “Kur iyei gamo giayala gi. Likame ango agamo punda moro kibut gi, doko da likame tie raco moro kame ango atimo ne ngatamoro kikom gi.”

¹⁶Musa oko waco ne Kora be, “Diki in karacel kede jo ni poore iotunu i nyim Rwot, in kede gin karacel kede Aaron.

¹⁷Poore ngat acelacel kibutu ter itatany mere di eko ponge kede odok angwe kur, di ngat acelacel ko tero mere i nyim Rwot i alutari, wun jo tol are kede ot kany. Aaron da bino tero mere.”

¹⁸Aso, buli dano oko kwanyo itatany mere di eko keto iye itonge me mac, di eko keto odok angwe kur iye. Gin kiko cungo i ekeko adonyo i Eema ka Rwot karacel kede Musa kede Aaron.

¹⁹Kora oko coko jo dedede kiko donyo cungo ngino Musa kede Aaron i dog ekeko me Eema ka Rwot. Deyo ka Rwot oko nyutere ne jo lung koudo ocokere kunono.

²⁰Di Rwot oko waco ne Musa kede Aaron be,

²¹“Yaunu tenge kibut jogo tetekeny anek gi abongo gal.”

²²Do Musa kede Aaron oko riebere piny kwano Rwot di kiwaco ne be, “Okwe Rubanga, in en Rubanga kame mio kuo, benyo, in ibino doko ger ne ekodet dedede pi dub me dano acel kenekene?”

²³Rwot oko waco ne Musa

²⁴pi waco ne ekodet be, “Yaunu tenge ki kimere ka Kora, me ka Datan kede me ka Abiram.”

²⁵Di do Musa oko yai ot but Datan kede Abiram, di joadongo me Isirael oko lube kunono.

²⁶En eko waco ne jo be, “Yaunu tenge ki kimere me cuo areco nogi, doko da kur imulunu jamini gi, aso ka li kobino neko wuda pi dub gin dedede.”

²⁷Di jo oko yai tenge kiweko kimere ka Kora, me ka Datan, kede me ka Abiram. Di Datan kede Abiram oko wok cungo i dog ikekon me kimere gi.

²⁸Di Musa oko waco be, “Man en epone kame wun ibinunu ngeno kede be Rwot en ocwa timo tice nogi dedede, do likame ango atie timo gi kede wia kena:

²⁹Ka jogi oto to abino kene, arabo ka can moro abino kene en opoto negi, udo likame Rwot en ocwa.

³⁰Do ka Rwot otimo gimoro anyen, ka lobo oyabere di eko mwonyo gi karacel kede jamini gi, di kiko ot i kabedo me jo oto di kikuo, manono bino mino wun ingeunu be cuo nogi ateteni oudo ocao Rwot.”

³¹Cucuto di Musa otieko waco kope nogi, lobo oko ngamere ki kakame jo nogo oudo tie iye.

³²Lobo ongamo doge di oko mwonyo gi, gin karacel kede jamini gi kede joe gi, karacel kede jo ka Kora kede jamini gi dedede.

³³Aso, gin kede jamini gi kiko ot i kabedo me jo oto di kikuo; lobo oko micakin i kom gi di kiko to.

³⁴Kakame gin kikok kede, jo dedede me Isirael koudo tie kanono oko dipo ringo di kiwaco be, “Oringunu, cengemogo lobo bino mwonyo wada!”

³⁵Di mac oko bino piny kibut Rwot di eko wangaro jo tol are kede ot kany koudo tie dunyo odok angwe kur.

³⁶Rwot oko waco ne Musa be,

³⁷“Wac ne Eleasar wot ka Aaron ngasaseredoti pi kwanyo itatany me dunyo odok angwe kur ki mac atie liel di eko wewelo mac atie i yi gi tenge kakabor.

³⁸Pien itatany ka jo nogo me dunyo odok angwe kur otieko doko gikacil pi to gin. Tet gi kidok gi me umo wi alutari, pien jo nogo oudo omio gi buta di kiko doko gikacil. Gin kibino bedo anen but jo me Isirael.”

³⁹Aso Eleasar ngasaseredoti oko kwanyo itatany kame kotimo kede nyonyo buronsi, itatany kame oudo jo kame mac owango oudo omio Rwot nogo, di oko teto gi kidoko gime umo wi alutari.

⁴⁰Manoni oko bedo bala ikwenyar but jo me Isirael be, likame tie ngatamoro kalikame obedo akwar Aaron, kame poore ot i alutari pi mino Rwot giayala me odok angwe kur, tetekeny kur gi kotimere ne Kora kede jo mege timere ne gida.

⁴¹Oru mere jo dedede me Isirael oko donyo cocobo Musa kede Aaron kede kop di kiwaco be, “Wun inekunu jo ka Rwot.”

⁴²Kakame jo oudo ocokere kilukaro gi kede, Musa kede Aaron oko loko nyim gi tetu Eema ka Rwot; edou oudo oume di deyo ka Rwot oko rieny kiye.

⁴³Di Musa kede Aaron oko ot di kiko cungo i nyim Eema ka Rwot,

⁴⁴di Rwot oko waco ne Musa be,

⁴⁵“Wun yaunu tenge kibut jogo, tetekeny ango anek gi abongo gal.” Gin jo are nogo kiko riebere piny.

⁴⁶Musa oko waco ne Aaron be, “Kwany itatany ni me dunyo odok angwe kur di iko kwanyo mac ki alutari iket iye, di iko keto iye odok angwe kur iko ot awakawaka itim ne jo pwola me lonyere. Pien lilo ka Rwot otieko neeno; aumpuli otieko cakere.”

⁴⁷Aso, Aaron oko timo gikame Musa owaco ne, di eko ringo tuno i diere me jo kocokere, kakame aumpuli oudo ocakere iye ne jo. En eko keto odok angwe kur i mac me itatany mere di eko timo pwola me lonyo jo.

⁴⁸En eko cungo i dierediere me jo koudo oto kede jo koudo pwodi kuo di aumpuli nono oko jik.

⁴⁹Wel me jo oto oudo oromo tutumia tomon kiwie ongwon kede tol kanyaare (14,700), di likame komaro iye jo oto pi kop me jemo ka Kora.

⁵⁰Kakame aumpuli oko jik kede, Aaron oko dok but Musa i ekeko me Eema ka Rwot.