Read kumam Wel 17 Bible Online

Wel 17 - kumam bible

Wel 17

¹Rwot oko waco ne Musa be,

²“Wace jo me Isirael kimii ibelai tomon kiwie are, ebela acel kibut ngatel me ekeko acelacel. Wandiko nying ngatel acelacel i kom ebela mere,

³di iko wandiko nying Aaron i kom ebela kame cungo pi ekeko ka Lebi. Ngatel me ekeko acelacel bino bedo kede ebela acel.

⁴Ter ibelai nogo i Eema na di iko keto gi i nyim Sanduku me Isikan, kakame ango ariamo kede wu iye.

⁵Di do ebela me ngat kame ango abino yero pi bedo ngasaseredoti na ko bino libo. Iepone noni ango abino jiko ingungur kame jo me Isirael tie kede i komi nakanaka.”

⁶Aso, Musa oko yamo kede jo me Isirael, di ngat acelacel kikom jotel gi oko mine ebela; ebela acel pi ekeko acel, gin dedede ibelai tomon kiwie are. Oko keto ebela ka Aaron da karacel kede mergi.

⁷Di Musa oko keto ibelai nogo dedede i Eema i nyim Sanduku me Isikan ka Rwot.

⁸Oru mere, kakame Musa ooto kede i Eema, eko udo ebela ka Aaron, kame oudo cungo pi ekeko ka Lebi, olibo. Etimo ature di eko nyak eko cek.

⁹Musa oko kwanyo ibelai nogo dedede di eko nyuto ne jo me Isirael dedede. Gin kiko ngino gi, di dano acelacel oko kwanyo ebela mere.

¹⁰Di Rwot oko waco ne Musa be, “Dwok ebela ka Aaron i nyim Sanduku me Isikan. En miero gwoke bala gi me ikwenyar but jo me Isirael kame jojemo be, kibino to kwanyo di gin kijiko ingungur i koma.”

¹¹Musa oko timo bala kame oudo Rwot ociko ne.

¹²Jo me Isirael oko waco ne Musa be, “Wan do otieko to girwa; wan dedede otiek!

¹³Ka ngatamoroni kame noko nget Eema miero toi, dwong mere be wan dedede ocal bala jo otieko do to!”