Read kumam Wel 21 Bible Online

Wel 21 - kumam bible

Wel 21

¹Kakame abaka me Arad, kame bin bedo i bad tetu piny me Kanan oko winyo kede be jo me Isirael oudo tie bino di kilubo yongayo me Atarim, en eko ot suro gi di eko mako mogo kikom gi etero.

²Di jo me Isirael oko kwongere but Rwot be, “Kan in imio jo nogi i cing wa, wan obino muducaro bomban gi atwal atwala.”

³Rwot oko winyo kwac gi di eko mino gi kibwono jo Kanan. Aso, jo me Isirael di oko muducaro gi kede bomban gi atwal atwala, di kiko lwongo kabedo nono be Koroma.[5]

⁴Jo me Isirael oko yai ki moru me Kor di kiko lubo yongayo kame oto i Nam Akwar, tetekeny kimanaro lobo me Edom. Di gin bin kitie ot, jo likame oko karuno dire.

⁵Gin kiko yamo kirac i kom Rubanga kede Musa di kiwaco be, “Pinyo komio ikwanyunu wa ki Misiri di ikounu kelo wa to i wi tim kan kakame cam akadi pii da li iye? Wan likame otwero meede kanyakino camo cam arac noni.”

⁶Di Rwot oko cwano twole ager i dier jo me Isirael, di kiko tongotongo jo atot di kiko neko.

⁷Jo oko ot but Musa di kiko waco ne be, “Wan otieko dubo pi yamo kirac i kom Rwot kede i komi, nataman wan okwai ileg but Rwot wek ekwany twole nogi tenge.” Aso, Musa oko kwano Rwot pi jo.

⁸Di Rwot oko waco ne Musa be, “Tim cal me twol ager di iko cibe i wi epir, tetekeny ngatamoroni kame twol tongo bino ngine di eko bedo kuo.”

⁹Aso, Musa oko timo twol kede nyonyo buronsi, di eko cibe i wi epir. Ka twol oudo otongo ngatamoro, ngat nono oudo ngio twol kame kotimo kede nyonyo buronsi nono di eko kuo.

¹⁰Jo me Isirael oko meede kede ot gi di kiko gero kimere gi Obot.

¹¹Ingei yai ki Obot, gin kiko ot di kiko gero kimere gi kabedo kame kolwongo be Iye Abarim, i wi tim kame oudo tie i bad tetu kide me piny me jo Moab.

¹²Kiko yai kikano di kiko ot gero kimere gi i aditot me Sered.

¹³Gin bobo kiko yai ki Sered di kiko gero kimere gi loka tetuca me ecilet me Arunon, i wi tim kame donyo i piny me jo Amor. (Arunon en kame bin obedo ikor me jo Moab kede jo Amor.)

¹⁴Manono en komio kowaco i Itabu me Yi ka Rwot be, “Bomba me Wakeb i adul me Supa, kede aditoto; ecilet me Arunon,

¹⁵kede i bad aditoto kame oto naka i bomba me Ar kede tetu ikor me Moab.”

¹⁶Kiko yai ki Arunon di kiko ot kabedo kame kolwongo be Beer. Kanono en kulo kame bin Rwot owaco ne Musa kiye be, “Cok jo karacel di ango ako bino mino gi pii.”

¹⁷Jo me Isirael bin oko wero wer noni be, “Atan lelepo pii, Okwe atan! Werunu ne wer!

¹⁸Atan kame bin jotel okunyo, jodongo me jo en kokunye, kikunye kede ebela gi me pug kede ibelai me cing.” Gin bin kiko yai ki wi tim di kiko ot Matana,

¹⁹kiko yai ki Matana di kiko ot Nakaliel, kiko yai kikano di kiko ot Bamot.

²⁰Ki Bamot di kiko ot i aditot kame tie i piny me Moab, i dud moru me Pisiga, kakame neeno kede wi tim.

²¹Di do jo me Isirael oko ooro jo but Abaka Sikon me jo Amor pi ot waco ne be,

²²“Wan okwai iyei ne wa ngolo ki lobo ni. Wan likame obino beo i poto moro akadi me olok, doko likame obino mato pii me atan wu moro. Wan obino lubo yongayo adwong[6] kenekene tuno wan kato adul ni.”

²³Do Sikon likame oko yei ne jo me Isirael ngolo ki piny mere. En eko coko isirikalen mege karacel di eko ot ne jo me Isirael i wi tim; etuno Jas di eko suro jo me Isirael.

²⁴Do jo me Isirael oko neko jo atot kikom gi, di kiko donyo bedo i lobo gi cako ki ecilet me Arunon i bad tetu piny tuno i ecilet me Jabok i bad tetu malo, tuno i ikor kede jo Amon; pien oudo kodaro ikor me jo Amon kitek.

²⁵Aso, jo me Isirael bin oko mano bomban dedede me jo Amor, kiton Kesibon kede bomban koluke dedede di gin kiko donyo bedo i yi gi.

²⁶Kesibon en bin bomba adwong me Abaka Sikon me jo Amor, en ngat kame bin oko yi kede abaka kasek me jo Moab di eko mano lobo mere lung naka tuno i ecilet me Arunon.

²⁷Manono en komio jo awero waco be, “Bia Kesibon, i bomba me Abaka Sikon! Mito kogere bobo di oko dwoke kakare.

²⁸Isirikalen ka Sikon bin oko yai ki bomba me Kesibon bala mac kame liel; di kiko muducaro bomba me Ar i Moab kede da imukuran me tetu malo me Arunon.

²⁹Itienu ican tin benyo, wun jo me Moab! Kotieko muducaro wu, Okwe wun jo ka rubanga Kemos! Wun rubanga wu otieko mino cuo odoko joring ayela, di oko mako mon odoko mabus ka Abaka Sikon me jo Amor.

³⁰Do nataman do ikwae gi kotieko muducaro, cako ki Kesibon tuno Dibon; wan otieko muducaro gi cako ki Nasim tuno Nopa, i nget Medeba.”

³¹Aso, jo me Isirael bin oko donyo bedo i lobo me jo Amor.

³²Musa bin oko cwano jo pi ot begao bomba me Yaser. Jo me Isirael bin oko mako bomba nono kede calere mege koluke, di kiko riamo tenge jo Amor kame bin tie kunono.

³³Di do jo me Isirael oko lokere di kiko lubo yongayo aoto Basan. Abaka Og me Basan oko bin sirito kede isirikalen mege pi ot suro gi i Ederei.

³⁴Rwot bin oko waco ne Musa be, “Kur ilwore. Ango atieko mine i cingi, en kede jo mege dedede, kede lobo mere da lung. Ibino timo ne gikame oudo itimo ne Abaka Sikon me jo Amor, ngat kame oudo pugo Kesibon.”

³⁵Aso, jo me Isirael bin oko neko Abaka Og, awobe mege, kede jo mege dedede, abongo weko ngatamoro acel dong di ekuo; di do gin kiko donyo bedo i lobo mere.