Read kumam Wel 24 Bible Online

Wel 24 - kumam bible

Wel 24

¹Balaam oudo otieko ngeno be Rwot mito mino jo me Isirael winyo. Aso, en likame eko ot mono gianena anyuto winyo aber amoto arac, bala kame oudo ebedo timo kede, do en eko loko nyime oneno tetu wi tim.

²Balaam oko tingo wange malo di eko neno kimere me jo me Isirael di kicokere ekeko kede ekeko. Tipo ka Rubanga oko bino i kome,

³di eko murao kaman: “Kop ka Balaam wot ka Beor, kop me dano kame wange neno piny kiber,

⁴dano kame twero winyo kop kame Rubanga waco, dano kame neno gianyuta kame Won Twer mio, di etie wirawira.

⁵Iemai wu tin cil benyo, Okwe ikwae ka Yakobo, kabedo kame igerunu iye kimere wu, Okwe wun jo me Isirael!

⁶Kipete kugo kugo bala tugere, arabo poti kame tie i nget ecilet; kical bala yen aloe kame Rwot opito arabo yen seda kame tie i nget pii.

⁷Kot bino bedo tot ne wu, di kodere wu ko bino bedo kede pii atot kame romo gi. Abaka wu bino bedo dwong ekalamo Agag, doko ajakanut mere bino nyai.

⁸Rubanga ngat kokelo wu ki Misiri, tek bala jobi. Wun ibinunu muducaro atekerin kobedo jokwor wu, di ikounu tuturo cogere gi. Ibinunu cocobo gi kede imalia wu.

⁹Wun idolenu buto piny bala engu, icalunu bala engu adako; ngai kame yei ot twaruno wu? Jo dedede kame lamo ne wu winyo gida kiudo winyo, doko jo dedede kame lamo wu kirac gida kolamo gi kirac.”

¹⁰Di do Balak cunye oko wang i kom Balaam di eko rono cinge pi wangcuny, di eko waco ne be, “Ango oudo alwongi pi lamo jokwor na, do akaka timo kamanono nataman in itieko lamo negi winyo tien adek.

¹¹Nataman do yai idok paco! Ango oudo awaco ni be abino mini giamia aber me pwoni, do Rwot otieko gengi udo giamia nono.”

¹²Balaam oko waco ne Balak be, “Mam ango oudo awaco ne joor kame in ioro buta be,

¹³‘Akadi Balak di ko mina ode kame eketo iye siliba kede saabu culucul, ango likame aromo lango kop ka Rwot di ako timo gimoro aber amoto arac i mit na; gikame Rwot yamo, manono en kame ango abino waco.’ ”

¹⁴Balaam oko waco ne Balak be, “Aso, nataman ango atie dok but jo na, do di pwodi likame aoto, ango amito kwenyaro in i kom gikame jo me Isirael bino timo ne jo ni i kare me anyim.”

¹⁵Di do en eko murao kaman: “Kop ka Balaam wot ka Beor, kop me dano kame wange neno piny kiber,

¹⁶kop me dano kame twero winyo kop kame Rubanga waco, dano kame tie kede ngec kame wok kibut Ngamalo Twal, dano kame neno gianyuta kame Won Twer mio, di etie wirawira.

¹⁷Ango aneno kare me anyim; aneno abaka moro kame bino wok kibut ikwae ka Yakobo bala acer, en ebino wok kibut jo me Isirael bala ebela me pug. En ebino dudubo Moab, kede adul kame jo Set bedo iye.

¹⁸En ebino mano lobo me Edom doko mere, Seir, lobo me jokwor mere, en ebino mano; di jo me Isirael ko meede ameda doko tek.

¹⁹Ngapug bino wok kibut ikwae ka Yakobo di eko neko jo kobwot ki bomba.”

²⁰Di do Balaam oko neno jo Amalek i gianyuta kame oudo en eneno, di eko murao kaman: “Amalek en kame oudo obedo ateker me agege kikom atekerin, do i ajikini en ebino rwenyo atwal.”

²¹En eko neno jo Ken i gianyuta kame eneno, di eko murao kaman: “Likame tie peko kame romo tuno kabedo kame wun itienu iye, ecal bala ot me winyo kame tie i wi lela;

²²do di wun jo Ken kobino muducaro wu i kare kame jo Asur bino mako wu kede di kiko tero wu bala mabus.”

²³Balaam bobo oko murao be, “Okwe, ngai kame bino dong kuo i kare kame Rubanga timo kede gi noni?

²⁴Jo asura bino kwango imerin di kiwok ki Kitim, gin kibino bwono jo Asur kede jo Eber, do gida kicen mere kobino muducaro gi atwal.”

²⁵Di do Balaam oko yai di eko dok paco, di Balak da oko ot elubo yongayo mere kene.