Read kumam Wel 25 Bible Online

Wel 25 - kumam bible

Wel 25

¹I kare kame jo me Isirael bin tie bedo kede i aditot me Akasia, cuo me Isirael oko donyo buto kede mon me Moab.

²Mon nogi oudo lwongo gin camo ibagai me mino giayala but rubangan me Moab. Jo me Isirael oudo camo di kiko donyo woro rubanga

³Baal me Peor. Manono oko mino cuny Rwot owang i kom gi

⁴di eko waco ne Musa be, “Kwany jotel dedede me Isirael di iko neko na gin i dier iceng di jo dedede neno, tetekeny ango ako bino kwanyo gero na tenge kibut jo me Isirael.”

⁵Di Musa oko waco ne jongolkop me Isirael be, “Ngat acelacel kikom wu miero nek jo me ekeko mere kotieko donyo woro Baal me Peor.”

⁶Inonono inonono di icuo moro acel me Isirael bino kede dako moro me Midian etero ture, di Musa kede jo dedede neno. Esawa nono oudo jo tie koko i ekeko me Eema me riamo.

⁷Kakame Pinekasi, wot ka Eleasar, akwar Aaron ngasaseredoti, oko neno kede kamano, en eko yai eweko jo kacokere. En eko kwanyo tong,

⁸di eko lubo icuo nono i ode, di eko cobo gin jo are nogo pelepel. Epone no en kame oko jiko kede aumpuli kame oudo tie neko jo me Isirael.

⁹Akadi kamanono da jo kame aumpuli oudo otieko neko oudo romo tutumia ot are kiwie ongwon (24,000).

¹⁰Rwot oko waco ne Musa be,

¹¹“Pinekasi wot ka Eleasar, akwar Aaron ngasaseredoti, otieko loko gero na tenge kibut jo me Isirael; piento en ebedo kede nyeko atek pira di manono oko mina likame amuducaro gi.

¹²Pi manono, wace be, ‘Ango ayaro timo kede en isikan na me mulem.

¹³En kede ikwae mege kibino bedo josaseredoti nakanaka, piento en oudo nyeko omake kitek pi Rubanga mere, di eko timo gikame oko kwanyo dub me jo me Isirael.’ ”

¹⁴Nying icuo me Isirael kame koneko karacel kede dako me Midian oudo Simiri wot ka Salu, ngatel me diakal moro me ekeko ka Simeon.

¹⁵Nying dako nono kame koneko oudo Kosibi, nyar ka Suur, ngatel me diakal acel me Midian.

¹⁶Rwot oko waco ne Musa be,

¹⁷“Oti iko suro jo Midian di iko bwono gi,

¹⁸pi gikarac kame gin kitimo butu kakame kingalo wu kede i Peor, kede pi kop kame mako amin gi Kosibi, nyar ka ngatel gi acel anyinge Sur; en bin koneke i Peor, i kare me aumpuli.”