Read kumam Wel 28 Bible Online

Wel 28 - kumam bible

Wel 28

¹Rwot oko ciko Musa

²pi waco ne jo me Isirael be miero kigwokere di kiko mino Rubanga giayala me cam kame yomo cunye i kare kame kociko.

³Magonogi en giayala me cam kame poore mi but Rwot: giayala awanga me buli ceng, idwe romini are me mwaka acelacel, kame li kede peko moro i kom gi.

⁴Atin oromo acel kobino mino esawa me odiko, kede me are mere di oko bino mino otieno di piny amumusit.

⁵Giayala acelacel kobino yalo karacel kede kilo acel me alos kinunga, kame konyalo kede lita acel me mo me olibeti kame ber adikinicel.

⁶Manoni en giayala awanga me buli ceng, kame bin komio tien me agege i wi moru me Sinai, bala giayala me cam kame kowango lung, giayala kame ngwe kur but Rwot.

⁷Giayala amata lita acelacel me bwini en kame bino upere kede giayala me idwe romini nogo; kobino onyo giayala amata me bwini akec but Rwot i kabedo kacil.

⁸Oromo ocelu kobino yalo otieno di piny amumusit, iepone acel nono kame koyalo kede me odiko. Eda etie giayala me cam, kame ngwece mere yomo cuny Rwot.

⁹Ceng Sabato kobino mino giayala me idwe romini acuo are kalikame tie kede peko moro i kom gi, alos kilo are kame konyongo kede mo me olibeti, pi bedo giayala me alos kede giayala amata.

¹⁰Giayala awanga noni kopoore yalo buli ceng Sabato, medo i wi giayala me buli ceng kede giayala amata mere.

¹¹I agege me duwe acelacel, ibinunu mino giayala awanga but Rwot kaman: itobai are, emerekek acel, idwe romini kanyaare me mwaka acelacel, gin dedede di likame kitie kede peko moro i kom gi.

¹²Kilo adek me alos kame konungo miero nyonge kede mo me olibeti di oko yale karacel kede etobait acelacel bala giayala me alos. Emerekek nono kobino yalo karacel kede kilo are me alos kame konyongo kede mo;

¹³doko kilo acel me alos kobino nyongo kede mo di oko yale karacel kede atin oromo acelacel. Giayala awanga nogi en giayala me cam kame ngwece mere yomo cuny Rwot.

¹⁴Giayala amata kame poore kede etobait acelacel en lita are me bwini, lita acel kede dul pi emerekek, kede lita acel pi atin oromo acelacel. Manoni en iswil kame mako giayala awanga kame koyalo i ceng kame geo duwe acelacel tieko mwaka lung.

¹⁵Medo i wi giayala awanga me buli ceng kede giayala mere me bwini, ibinunu yalo ekoroi bala giayala me kwanyo dub.

¹⁶I ceng me tomon kiwie ongwon me duwe me acel ibinunu tedo Ebaga me Kalamo pi mino wor but Rwot.

¹⁷I ceng me tomon kiwie kany mere ibinunu tedo ebaga kame kocamo pi ceng kanyaare, di kocamo mugati kame arup li iye kenekene.

¹⁸Ceng me agege me ebaga nono obedo ceng me cokere kacil. Likame ibinunu timo tice wu.

¹⁹Ibinunu mino giayala awanga bala giayala me cam kame komio but Rwot: itobai are, emerekek acel, kede idwe romini acuo kanyaare me mwaka acelacel, gin dedede di kili kede peko moro i kom gi.

²⁰Ibinunu mino giayala me alos kame konungo kiber di oko nyonge kede mo me olibeti: kilo adek me alos nono kobino yalo karacel kede twon acelacel, kilo are mere kobino yalo karacel kede emerekek,

²¹di kilo acel ikounu bino yalo karacel kede atin oromo acelacel.

²²Ibinunu da mino giayala me ekoroi acel bala giayala me kwanyo dub. Manono en pwola me lonyo jo ki dub gi.

²³Ibinunu mino giayala nogi medo i wi giayala awanga kame komio buli ceng odiko.

²⁴Iepone acel nono, ibinunu mino giayala awanga me cam but Rwot pi ceng kanyaare, giayala kame ngwe kur bute. Ibinunu mino giayala noni medo i wi giayala awanga kame komio buli ceng karacel kede giayala me amata.

²⁵Di do ceng me kanyaare mere ko bino bedo ceng me cokere kacil; likame ibinunu timo tice wu.

²⁶I ceng me agege me Ebaga me Kac, kakame jo mio kede giayala me alos anyen but Rwot, ibinunu bedo i cokere kacil; likame ibinunu timo tice wu.

²⁷Ibinunu mino giayala awanga kame ngwe kur but Rwot: itobai are, emerekek acel, kede idwe romini acuo kanyaare me mwaka acelacel; gin dedede likame miero kibed kede peko moro i kom gi.

²⁸Ibinunu mino giayala me alos kame konungo kiber di oko nyonge kede mo me olibeti: kilo adek me alos nono kobino yalo karacel kede twon acelacel, kilo are mere kobino yalo karacel kede emerekek,

²⁹di kilo acel oko bino yalo karacel kede atin oromo acelacel.

³⁰Ibinunu da mino giayala me ekoroi acel bala giayala me kwanyo dub. Manono en pwola me lonyo jo ki dub gi.

³¹Ibinunu mino giayala me leini nogi ali kede peko moro i kom gi, karacel kede giayala amata, medo i wi giayala awanga me buli ceng kede giayala me alos.