Read kumam Wel 31 Bible Online

Wel 31 - kumam bible

Wel 31

²“Nyang gikame jo Midian otimo ne jo me Isirael; icen mere di do in iko bino to.”

³Aso, Musa bin oko waco ne jo be, “Miunu jo wu mogo iikere pi yi, tetekeny kiot yi kede jo Midian, di kiko culo kwor ka Rwot i kom gi.

⁴Ibinunu kwanyo jo tutumia acel tutumia acel ki buli ekeko me jo me Isirael di ikounu cwano gi ot yi.”

⁵Aso, bin oko yero jo tutumia acel tutumia acel ki buli ekeko me jo me Isirael, di do wel gi dedede oko bedo jo tutumia tomon kiwie are koikere pi ot yi.

⁶Musa di oko cwano gi ot yi di Pinekasi wot ka Eleasar ngasaseredoti en koudo telo gi. En oudo emako jamini me kabedo kacil kede agwara kame kokuto pi kwenyaro jo.

⁷Gin kiko suro jo Midian, bala kame oudo Rwot ociko ne Musa, di kiko neko cuo dedede,

⁸kiton abakai kany me Midian: Ebi, Rekem, Suur, Kur, kede Reba. Gin kiko neko da Balaam wot ka Beor.

⁹Jo me Isirael bin oko mako mon me Midian kede idwe gi di kiko tero; doko kiko tero da doke gi, romini kede diegi, kede kiko yako jamini gi dedede.

¹⁰Kiwango da bomban gi kede kimere gi dedede.

¹¹Gin di kiko tero jamini kame gin oudo kiyako, jo kede leini dedede

¹²but Musa kede Eleasar, kede but jo me Isirael kame bin tie i kimere kame oudo kogero i ebar me Moab loka tetuca me Yorodan, kakame oudo pimere kede Jeriko.

¹³Musa, Eleasar, kede jotel apat dedede oko yai ki kimere pi ot siramo isirikalen.

¹⁴Musa bin oko doko ger ne jodongo me isirikalen, kede ne jotel me ikodeta apapat me isirikalen kame oudo odwogo ki yi.

¹⁵En epenyo gi be, “Pinyo komio wun iwekunu mon odong kuo?

¹⁶Yutununu be mon en kame bin olubo pwony ka Balaam di kiko mino jo likame oko bedo kede genere but Rwot i Peor. Manono en kame bin oko kelo aumpuli i kom jo ka Rwot.

¹⁷Pi mano, nataman nenekunu awobe dedede kede mon dedede kame otieko buto kede cuo,

¹⁸do wekunu piru anyira dedede kede mon kalikame pwodi ongeo cuo.

¹⁹Aso, wun dedede jo kame itiekunu neko jo arabo ko tieko mulo kom dano oto, miero idongunu ooko me kimere pi ceng kanyaare. I ceng me adek kede i ceng me kanyaare ibinunu lonyere karacel kede mon kame imakunu i yi.

²⁰Miero ilwokunu da igoen dedede kede jamini dedede kame kotimo kede launi, yer me diegi, arabo ebao.”

²¹Eleasar ngasaseredoti oko waco ne isirikalen kame oudo odwogo ki yi be, “Magonogi en iswilia kame Rwot otieko mino but Musa.

²²Jamini dedede kalikame wang, bala nat saabu, siliba, nyonyo buronsi, nyonyo ayon, ideben, kede lilime apat kobino mino beo i mac pi lonyo gi. Jamini apat dedede kame romo wang kobino mino beo i pii pi lonyo gi.

²³

²⁴I ceng me kanyaare miero ilwokunu igoen wu, di do ikounu bino doko jo kalikame opwokere bala kame iswil mito; i cen mere di do ikounu romo dok i kimere.”

²⁵Rwot oko waco ne Musa be,

²⁶“In kede Eleasar, karacel kede jotel me diakale, poore imarunu rom me jamini dedede kame komao ki yi, kiton jo kame komako kede leini kame koyako.

²⁷Pokunu jamini kame koyako nogo kabedere are di rorom. Dul acel kobino mino isirikalen, di dul ocelu oko bino mino jo apat dedede.

²⁸Kikom dul kame komio but isirikalen, pok tenge ne Rwot gi acel kikom tol kany me jamini dedede, doke, pundan, romini, diegi kiton jo kame komako bala mabus.

²⁹Mi gi but Eleasar ngasaseredoti bala giamia but Rwot.

³⁰Do kikom dul kame komio but jo me Isirael icegun, ibino kwanyo gi acel kikom ot kany me jamini dedede, doke, pundan, romini, diegi, kiton jo kame komako bala mabus, di in iko bino mino gi but Jolebi kame gwoko Eema ka Rwot.”

³¹Musa kede Eleasar oko timo gikame Rwot oudo ociko.

³²Jamini kame isirikalen oudo oyako, kame oko dong di gin kiko tero, wel gi dedede oudo tie kaman: romini ribo kede diegi oudo tie tutumia tol kanyape kede ot kanyaare kiwie kany (675,000),

³³doke tutumia ot kanyaare kiwie are (72,000),

³⁴pundan tutumia ot kanyape kiwie acel (61,000),

³⁵kede mon kame oudo pwodi likame ongeo cuo, tutumia ot adek kiwie are (32,000).

³⁶Iner me isirikalen bin oko bedo diegi kede romini tutumia tol adek kede ot adek kiwie kanyaare kede tol kany (337,500),

³⁷di me ka Rwot kame oko kwanyo kiye oko bedo romini kede diegi tol kanyape kede ot kanyaare kiwie kany (675).

³⁸Iner me doke kame oko mino isirikalen oudo tie doke tutumia ot adek kiwie kanyape (36,000), di me ka Rwot kame oko kwanyo kiye oko bedo doke ot kanyaare kiwie are (72).

³⁹Iner gin me pundan oudo tie pundan tutumia ot adek kede tol kany (30,500), di oko kwanyo kiye pundan ot kanyape kiwie acel pi bedo me ka Rwot.

⁴⁰Mon kalikame pwodi ongeo cuo, kame bin oko mino isirikalen oudo tie tutumia tomon kiwie kanyape (16,000), di oko kwanyo kikom gi mon ot adek kiwie are pi bedo me ka Rwot.

⁴¹Musa bin oko mino Eleasar ngasaseredoti gikame oudo komio but Rwot, bala kame oudo Rwot ociko.

⁴²Iner kame bin oko mino but jo me Isirael icegun oudo rom aroma kede kame komio but isirikalen: romini kede diegi tutumia tol adek kede ot adek kiwie kanyaare kede tol kany (337,500), doke tutumia ot adek kiwie kanyape (36,000), pundan tutumia ot adek kede tol kany (30,500), kede mon kalikame pwodi ongeo cuo tutumia tomon kiwie kanyape (16,000).

⁴³

⁴⁴

⁴⁵

⁴⁶

⁴⁷Musa bin oko kwanyo ki iner noni acel kikom ot kany me leini kede jo kame oudo komako bala mabus, di en eko mino gi but Jolebi kame oudo gwoko Eema ka Rwot, bala kame Rwot oudo ociko.

⁴⁸Di do jodongo me isirikalen kame bin otelo isirikalen ot yi oko ot but Musa

⁴⁹di gin kiko waco ne be, “Adwong, wan otieko maro wel me isirikalen kame wan oudo otelo di oko udo be gin dedede kitie.

⁵⁰Aso, wan okelo gikame ngat acelacel oudo, jamini kame kotimo kede saabu, mwolere me bad kede me ngut cing, ipetai, mwola me yit kede me ngut. Wan omio gi but Rwot bala gi me cul pi kuo wa, piento en egwoko wa.”

⁵¹Musa kede Eleasar oko gamo saabu nogo kibut gi. Saabu nogo lung oudo obedo jamini me tubuso kom.

⁵²Saabu lung kame jodongo me isirikalen nogo oko mino but Rwot oudo peko gi buco romo kilo tol are.

⁵³Manoni oudo likame ribo kiton jamini kame isirikalen apat otero.

⁵⁴Aso, Musa kede Eleasar di oko tero saabu nogo i Eema me riamo pi bedo ne jo me Isirael bala gi me iyutun i nyim Rwot.