Read kumam Wel 32 Bible Online

Wel 32 - kumam bible

Wel 32

¹Jo me ekeko ka Ruben kede me ka Gad bin tie kede doke atot twatwal. Gin bin kiko neno be lobo me Yaser kede me Gilead oudo ber me pito doke.

²Manono oko mino gin bin kiko ot but Musa, Eleasar, kede jotel apat me Isirael di kiko waco negi be,

³“Lobo kame Rwot okonyo wa mano kame ribo bomban me Atarot, Dibon, Yaser, Nimura, Kesibon, Eleale, Sebam, Nebo, kede Beon, ber twatwal me pito doke. Wan jotic ni otie kede doke atot twatwal.

⁵Wan okwai imi wa lobo noni bed merwa, di likame iko mino wan ongol ecilet me Yorodan.”

⁶Musa bin oko waco negi be, “Benyo, wun itienu mito dong bedo kan di jo me Isirael icegun tie ot yi?

⁷Pinyo kame mio wun imitunu dubo cuny jo me Isirael di kiko weko ot ngolo loka tetuca i lobo kame Rwot otieko mino gi?

⁸Joakwari wu da bin otimo gi noni i kare kame ango bin acwao gi kede yai ki Kades Barenea pi ot mamano lobo nono.

⁹Gin bin kiko ot naka tuno i aditot me Esikol di kiko neno lobo nono. Do kakame gin bin kiko dwogo kede, gin kiko dubo cuny jo me Isirael; kimio gi kiko dagi ot donyo i lobo kame Rwot oudo otieko mino gi.

¹⁰I ceng nono cuny Rwot bin oko wang di eko kwongere be,

¹¹‘Ateteni likame tie ngatamoro kikom jo nogi kame oyai ki Misiri, cako kibut jo me mwakini ot are ot malo, kame bino neno lobo kame bin ango akwongere iye pi mino Aburaam, Isaka, kede Yakobo, pien gin likame kibedo luba kede cuny gi lung.

¹²Likame tie ngatamoro kikom gi kame bino donyo i lobo nono kwanyo kenekene Kaleb wot ka Jepune dano me Ken kede Yosua wot ka Nun, pien gin kibedo lubo kop na kede cuny gi lung.’

¹³Rwot bin oko lilo ne jo me Isirael di eko mino gi kibedo wiratoi i wi tim tieko mwakini ot ongwon, tuno kakame jo dedede me lwak kame oudo otimo gikarac i nyim Rwot otieko to kede.

¹⁴Doko nataman wuda itiekunu lunyo wang joakwari wu, lwak anyen me jodubo, imitunu medo gero ka Rwot i kom jo me Isirael.

¹⁵Ka wun ilokerenu tenge di ikounu weko lube, en ebino bobo jalo jo nogi dedede i wi tim; di to ka jo nogi dedede oko bino maro i wi wu.”

¹⁶Gin kiko ot but Musa di kiko waco ne be, “Wan obino gero anok kane ne romini wa, kede bomban ne mon wa kede idwe wa.

¹⁷Di do wan oko bino kwanyo jamini wa me yi di oko telo jo me Isirael icegun ot yi tuno wan keto gi i lobo kame bino bedo mergi. Manono wan obino timo di do ber mon wa kede idwe wa tie bedo i bomban kame kocelo pi gwokere kibut jo kame bedo i lobo noni.

¹⁸Wan likame obino dwogo i miere wa tuno di jo me Isirael icegun dedede otieko bedo i lobere kame mako gi.

¹⁹Wan likame obino gamo lobo moro i loka tetuca me Yorodan pien wan otieko gamo iner wa me lobo i loka tetuni, i bad tetu kide me Yorodan.”

²⁰Aso, Musa bin oko waco negi be, “Ka wun ikounu timo kamanono, di i nyim Rwot ikounu iikere pi ot yi,

²¹di jo wu dedede komako jamini me yi oko ngolo ecilet me Yorodan, di gin kiko dong kede jo me Isirael icegun tuno Rwot tieko riamo jokwor mege tenge ki lobo nono

²²di en eko mane, wun iromunu dwogo di ikounu bedo, pien udo itiekunu cobo gikame miero itimunu ne Rwot kede ne jo me Isirael icegun. I nyim Rwot lobo noni bino bedo meru.

²³Do ka wun likame ikounu timo kamanono, udo itimunu dub i nyim Rwot; doko ateteni ibinunu udo alola pi dub kame itimunu nono.

²⁴Aso, gerunu bomban ne mon wu kede idwe wu, kede anok ne romini wu; do poore itimunu gikame icikerenu iye.”

²⁵Di do cuo me ekeko ka Gad kede me ka Ruben oko waco ne Musa be, “Wan jotic ni obino timo bala kame in iciko.

²⁶Mon wa, idwe wa, romini wa, kede doke wa bino dong kan i bomban me Gilead.

²⁷Do wan jotic ni dedede kotieko iikere pi yi obino ngolo loka tetuca di oko yi pi Rwot bala kame in iciko.”

²⁸Aso, Musa oko mino cik but Eleasar, Yosua kede jotel apat me Isirael be,

²⁹“Ka jo me ekeko ka Gad kede me ka Ruben oko iikere pi yi ka Rwot, di kiko ngolo ecilet me Yorodan karacel kede wu di ikounu mano lobo nono, wun ibinunu mino gin lobo me Gilead doko mergi.

³⁰Do ka gin likame kiko ngolo ecilet me Yorodan pi ot yi karacel kede wun, gin kibino udo iner me lobo gi karacel kede wun i lobo me Kanan.”

³¹Jo me ekeko ka Gad kede me ka Ruben oko waco be, “Wan obino timo kamanono bala kame Rwot otieko waco ne jotic mege.

³²Wan obino ngolo ecilet me Yorodan di oko ot yi pi Rwot i lobo me Kanan. Do lobo kame bino doko merwan bino bedo loka tetuni.”

³³Aso, Musa bin oko mino jo me ikekon ka Gad kede me ka Ruben karacel kede dul me jo me ekeko ka Manase wot ka Yosepu, adulion dedede kame Abaka Sikon me jo Amor kede Abaka Og me Basan oudo pugo, ribo kiton bomban kede adulion koluko gi.

³⁴Jo me ekeko ka Gad bin oko gero bobo bomban me Dibon, Atarot, Aroer,

³⁵Atirot Sopan, Yaser, Yagubeka,

³⁶Bet Nimura, kede Bet Karan. Bomban nogi dedede gin bin kiko celo kede apama atek, kede kiko gero anok me romini da.

³⁷Jo me ekeko ka Ruben bin oko medo gero bomban me Kesibon, Eleale, Kiriataim,

³⁸Nebo, Baal Meon kede Sibima. Gin bin kiko cako nying anyen ne bomban kame gin bobo kiko gero nogi.

³⁹Ikwae ka Makir wot ka Manase bin oko ot suro lobo me Gilead, kiko mane di kiko riamo tenge jo Amor kame bin bedo kunono.

⁴⁰Aso, Musa bin oko mino lobo me Gilead but jo ka Makir di gin kiko donyo bedo iye.

⁴¹Yair, akwar Manase bin oko ot di eko mano calere mogo di en eko cako negi nying anyen be “Kabot Yair.”[7]

⁴²Noba bin oko ot di en eko mano bomba me Kenat kede calere mege, di eko cako nying bomba nono Noba, manono oudo obedo nyinge.