Read kumam Wel 33 Bible Online

Wel 33 - kumam bible

Wel 33

¹Manoni en kite kame jo me Isirael riki obedo kokobo kede ot i kare kame gin bin kiyai kede i lobo me Misiri kede isirikalen gi di Musa kede Aaron en kame telo gi.

²Musa riki obedo wandiko nying kabedere kame gin kiyai kiye di kimeede kede ot gi bala kame Rwot oudo ciko negi. Manoni en kite kame gin bin kibedo meede kede ot gi di lubere kede kabedere dedede kame gin kiko gero iye kimere.

³Gin bin kiyai ki Rameses i buto duwe tomon kiwie kany me duwe me agege, i ceng me Ebaga me Kalamo. Ceng nono gin kiko yai abongo lworo moro di jo dedede me Misiri tie neno gi.

⁴Jo me Misiri oudo tie yiko idwe kao gi kame Rwot oudo oneneko. Rwot bin otimo manono pi nyuto be en ebwono rubangan gin.

⁵Aso, jo me Isirael bin oko yai ki Rameses di kiko ot gero kimere Sukot.

⁶Kiko yai ki Sukot di kiko ot gero kimere Etam, kabedo kame bin tie i nget wi tim.

⁷Gin kiko yai ki kanono di kiko lokere dok cen kabedo kame kolwongo be Pi Kakirot, kame oudo tie i bad tetu kide me Baal Sepon, di gin kiko gero kimere gi i nget Migidol.

⁸Kiko yai ki Pi Kakirot di kiko ngolo nam adwong di kiko ot i wi tim. Gin kiko bedo ot ki wi tim me Etam pi ceng adek, di do kiko gero kimere gi Mara.

⁹Kiko yai ki Mara di kiko ot tuno Elim kakame kiko gero iye kimere gi, kabedo kame ataneko tomon kiwie are kede tugere ot kanyaare bin tie iye.

¹⁰Gin bin kiko yai ki Elim di kiko gero kimere gi i nget Nam Akwar.

¹¹Kiko yai ki Nam Akwar di gin kiko ot gero kimere gi i wi tim me Sin.

¹²Kiko yai ki wi tim me Sin di kiko ot gero kimere gi Dopuka.

¹³Di bobo kiko yai ki kano di kiko ot gero kimere Alus.

¹⁴Ki Alus gin kiko yai di kiko ot gero kimere Repidim, kakame oudo pii kame kiromo mato li iye.

¹⁵Gin bin kiko yai ki Repidim di kiko ot gero kimere i wi tim me Sinai.

¹⁶Kiko yai ki wi tim me Sinai di kiko ot gero kimere Kiborot Kataba.

¹⁷Kiko yai ki kano di gin kiko ot gero kimere Kaserot.

¹⁸Kiko yai ki Kaserot di gin kiko ot gero kimere Ritima.

¹⁹Gin kiko yai ki Ritima di kiko ot gero kimere Rimon Peresi.

²⁰Kiko yai bobo ki kano di gin kiko gero kimere Libina.

²¹Kiko yai ki Libina di gin kiko gero kimere Risa.

²²Di gin kiko yai ki Risa di kiko ot gero kimere Kekelata.

²³Kiko yai ki Kekelata di gin kiko ot gero kimere i moru me Seper.

²⁴Gin kiko yai ki moru nono di kiko ot gero kimere Karada.

²⁵Kiko yai ki Karada di gin kiko ot gero kimere Makelot.

²⁶Kiko yai ki Makelot di gin kiko ot gero kimere Takat.

²⁷Di gin bobo kiko yai ki Takat di kiko ot gero kimere Tera.

²⁸Kiko yai ki Tera di gin kiko ot gero kimere Mitika.

²⁹Kiko yai ki kano di gin kiko ot gero kimere Kasimona.

³⁰Gin kiko yai ki kano di kiko ot gero kimere Moserot.

³¹Kiko yai ki Moserot di gin kiko ot gero kimere Bene Jakan.

³²Kiko yai ki Bene Jakan di gin kiko ot gero kimere Kor Kagidigad.

³³Gin bin kiko yai ki Kor Kagidigad di kiko gero kimere.

³⁴Kiko yai ki Yotobata di gin kiko gero kimere Aburona.

³⁵Kiko yai ki Aburona di gin kiko ot gero kimere Esion Geber.

³⁶Gin bin kiko yai ki kano di kiko ot gero kimere i wi tim me Siin (manono en Kades).

³⁷Gin bin bobo kiko yai ki Kades di kiko ot gero kimere i moru me Kor, i nget lobo me Edom.

³⁸Rwot bin oko ciko Aaron ngasaseredoti pi en ot yito i wi moru me Kor. Aaron bin oko to i wi moru kunono i ceng me agege me duwe me kany i mwaka me ot ongwon cako i kare kame jo me Isirael oyai kede ki Misiri.

³⁹I kare kame bin Aaron oto kede i wi moru me Kor, mwaka me dongo mere oudo oromo tol acel kede ot are kiwie adek (123).

⁴⁰Dano me Kanan, abaka me Arad, kame bin bedo i bad tetu piny i wi tim me Kanan, oko winyo be jo me Isirael oudo tie bino.

⁴¹Jo me Isirael oudo oyai ki moru me Kor di gin kiko ot gero kimere gi Salamona.

⁴²Gin di kiko yai ki Salamona di kiko gero kimere Punon.

⁴³Kiko bobo yai ki Punon di gin kiko ot gero kimere Obot.

⁴⁴Kiko yai ki Obot di gin kiko ot gero kimere kabedo kame oudo tie i adul me Moab kame kolwongo be Iye Abarim.

⁴⁵Kiko yai ki kano di gin kiko ot gero kimere Dibon Gad.

⁴⁶Kiko yai ki Dibon Gad di gin kiko ot gero kimere Alumon Dibilataim.

⁴⁷Gin kiko yai ki Alumon Dibilataim di kiko ot gero kimere i moru me Abarim, i nyim Nebo.

⁴⁸Kiko yai kikano di gin kiko ot gero kimere i ebar me Moab i nget ecilet me Yorodan kakame oudo pimere kede Jeriko.

⁴⁹Gin bin kigero kimere gi i nget ecilet me Yorodan cako ki Bet Jesimot ape tuno Abel Sitim kame oudo tie i ebar me Moab.

⁵⁰I ebar me Moab kunono, i nget ecilet me Yorodan kakame bin pimere kede Jeriko, Rwot oko waco ne Musa

⁵¹pi waco ne jo me Isirael be, “Ka wun ikounu ngolo ecilet me Yorodan di ikounu donyo i lobo me Kanan,

⁵²wun miero iriamunu tenge jo kame tie bedo i lobo nono. Miero imuducarunu da caljwogi gin kame kotimo kede kide kede nyonyo, kede kabedere kame gin kiworo kiye rubangan gin.

⁵³Wun ibinunu gamo lobo nono di ikounu donyo bedo iye, pien ango atieko mino wu lobo nono pi en doko meru.

⁵⁴Wun ibinunu popoko lobo nono kede alulu, di lubere kede rom me jo me ekeko acelacel. Ekeko kame jo tot iye ibinunu mino gin lobo alac, do ekeko kame jo mege nonok ibinunu mino gida lobo katitidi.

⁵⁵Do ka wun likame ikounu riamo tenge jo kame oudo tie bedo i lobo nono, jo kame wun ibinunu weko dong nogo bino bedo lolo wu bala gimoro kopoto i wang wu kede bala okuto kame cocobo nget wu. Gin kibino bedo lolo wu i lobo kame itienu ot bedo iye.

⁵⁶Doko ango abino timo i komu gikame ango oudo amito timo i kom gin.”