Read kumam Wel 35 Bible Online

Wel 35 - kumam bible

Wel 35

¹I ebar me Moab, loka tetuca me ecilet me Yorodan, kakame pimere kede Jeriko, Rwot bin owaco ne Musa be,

²“Cik jo me Isirael pi mino Jolebi bomban mogo ki lobere gin, kame kibino bedo iye, doko da kiko mino gi kakwat kame tie i nget bomban nogo.

³Bomban nogo bino doko me ka Jolebi di gin kiko bedo i yi gi. Kakwat bino bedo kakame gin kikwao iye doke gi kede leini gi dedede apat.

⁴Kakwat me bomban nogo kame ibinunu mino Jolebi, bino bedo mita tol ongwon kede ot kany (450) cako ki apama me bomba ot ooko, i bad dedede.

⁵Ibinunu pimo i ooko me bomba, mita tol kanyangon (900) i bad tetu dedede di rorom, do di bomba tie diere. Manoni en kame bino bedo kakwat me Jolebi.

⁶Bomban kame ibinunu mino Jolebi bino ribo bomban kanyape me ringo ot gwokere, kakame ibinunu yei ne ngat koneko dano ringo iye. Medo i kom magonogo ibinunu mino gi bomban ace ot ongwon kiwie are.

⁷Bomban kame ibinunu mino Jolebi wel gi dedede bino bedo ot ongwon kiwie kanyauni, kede kabedere me kwat gi.

⁸Wel me bomban kame ekeko acelacel me Isirael bino mino Jolebi bino lubere kede rom me lobo me ekeko acelacel. Ikekon kame lobere gi lac bino mino bomban atot, do alobere gi titino bino da mino bomban anonok.”

⁹Rwot oko bobo waco ne Musa

¹⁰pi waco ne jo me Isirael be, “Ka ingolunu ecilet me Yorodan di ikounu donyo i lobo me Kanan,

¹¹ibinunu yero bomban me ringo ot gwokere, tetekeny ka ngatamoro oneko dano ocelu i akangas en ebino ringo kunono.

¹²Bomban nogo bino bedo ne wu bomban me ringo ot gwokere kibut ngat kame mito culo kwor, tetekeny nganek likame koromo neko tuno di owinyo pido mere i nyim jo.

¹³Bomban kame ibinunu yero me ringo ot gwokere bino bedo kanyape.

¹⁴Adek kikom gi bino bedo loka tetu kide me Yorodan, kede adek da i lobo me Kanan.

¹⁵Bomban kanyape nogi bino bedo me ringo ot gwokere, ne jo me Isirael kede ne jokumbor kame tie bedo kede gin pi kare katitidi arabo atwal. Ngatamoroni kame neko dano i akangas karuno ringo i acel kikom gi.

¹⁶“Do ka ngatamoro oko juto dano ocelu kede nyonyo di eko to, ngat nono obedo nganek; nganek nono kobino neke.

¹⁷Arabo ka ngatamoro oko dipo ngat ocelu kede kidi kame oudo emako i cinge, kidi kame oudo romo neko dano, di dano nono oko to, ngat nono obedo nganek; nganek nono kobino neke.

¹⁸Amoto ka ngatamoro oko juto dano ocelu kede gi me yi kobedo ebela kame oudo en emako i cinge, ebela kame oudo romo neko dano, di ngat nono oko to, udo en ebedo nganek; nganek nono kobino neke.

¹⁹Ngacul kwor me remo kame koonyo en kame bino neko nganek nono. Ka en eriamo kede nganek nono, en ebino neke.

²⁰“Kamanono da, ka ngatamoro cunye dagi ngat ocelu di en eko remoro en eko poto arabo ekie di eko dipe kede gimoro eko to,

²¹amoto pi ading di en eko donge adonga kede cinge di eko to, ngat koneko dano nono kobino neke; en ebedo nganek. Ngat kame culo kwor me remo me ngat kame en eneko bino neke ka en eriamo kede.

²²“Do ka ngatamoro oko ngeso remoro dano ocelu abongo ading moro arabo edipe kede gimoro i akangas,

²³amoto di oudo en etie mako kidi moro kame romo neko dano, di en abongo neno eko lwomo kidi nono i kom dano ocelu di eko neke, do di gin oudo likame kidingere, doko en oudo likame eikere pi timo rac ne ngat nono,

²⁴jopiny en kame bino ngolo kop i dierediere me ngat koneko dano nono kede ngat kame mito culo kwor me remo kame koonyo, di lubere kede iswilia nogi.

²⁵Jopiny bino lako ngat koneko dano i akangas nono ki cing ngat kame mito culo kwor me remo kame koonyo. Di do gin kiko dwoke i bomba me ringo ot gwokere kame oudo en ebwot di eko ringo iye. Ngat koneko dano nono bino bedo kunono tuno to me ngatel me josaseredoti me kare nono.

²⁶Do ka ngat koneko dano i akangas nono oko donyo ooko me bomba kame en oudo eringo ot gwokere iye,

²⁷di ngat kame mito culo kwor me remo kame en eonyo oko ude ooko me bomba kunono di oko neke, raco me oonyo remo likame bedo i wi ngacul kwor.

²⁸Pien ngat koneko dano i akangas miero dong bedo i bomba kame en eringo ot gwokere iye tuno to me ngatel me josaseredoti; i cen mere en eko romo dok paco.

²⁹Magonogi en iswilia kame wun kede ikwae wu ibinunu lubo i kakame ibedunu iye.

³⁰“Ka ngatamoro oneko dano ocelu, kobino neko nganek nono pi kop me ijurak. Do likame tie ngat kame kobino neko pi kop me mujura acel kenekene.

³¹Medo i wi manono, likame ibinunu gamo sente moro me egelit pi lako kuo me nganek kame kongolo ne kop me to. Nganek miero koneke.

³²Doko da likame ibinunu gamo sente moro pi ngat kotieko ringo i bomba me gwokere, be tetekeny edwog paco di pwodi ngatel me josaseredoti likame oto.

³³Likame ibinunu munao lobo kame ibedunu iye. Remo kame koonyo munao lobo, doko likame tie pwola moro me kwanyo dub kame koromo timo pi lobo, pi remo kame koonyo iye, kwanyo kenekene onyo remo me nganek nono.

³⁴Likame ibinunu munao lobo kame ibedunu iye, kakame ada abedo iye; pien ango Rwot abedo i diere me jo me Isirael.”