Read kumam Wel 36 Bible Online

Wel 36 - kumam bible

Wel 36

¹Jotel me diakale me ot ka Gilead wot ka Makir, en akwar Manase wot ka Yosepu bin oko ot but Musa kede jotel icegun me diakale me joakwari me Isirael

²di gin kiko waco be, “Rwot bin ociki pi poko lobo ne jo me Isirael kede alulu; doko en eko ciki pi mino lobo ka omin wa Selopekad but anyira mege.

³Do poore ingei be ka gin kiko nyomere i ekeko apat me Isirael, lobo gin likame bobo bino bedo me ka kwaru wan, do ebino doko me ekeko kame konyomo gin iye. Aso, lobo nono kobino tero tenge kikom lobo kame kopoko ne wan.

⁴Kame mwaka me dwoko jamini me jo me Isirael otuno, lobo me anyira nogo kobino medo i kom lobo me ekeko kame konyomo gi iye di ekeko ka kwaru wan ko bino kei lobo gi.”

⁵Di do Musa oko mino jo me Isirael cik kame Rwot omio. En ewaco be, “Kop kame ikwae ka Yosepu tie waco tie kakare.

⁶Manoni en gikame Rwot tie waco i kom anyira ka Selopekad, ‘Gin kiromo nyomere kede ngat kame cuny gi mito, kwanyo di dano nono obedo me ot me ekeko ka papa gi,

⁷tetekeny likame okobo lobo moro me ekeko moro me Isirael ne ekeko ocelu. Pien jo me Isirael dedede bino dong kede lobo me ikekon ka joakwari gi.

⁸Buli nyako moro kame komio lobo i ekeko moro me Isirael bino nyomere kede icuo me ot me ekeko ka papa mere, tetekeny jo me Isirael dedede romo meede bedo kede lobo ka joakwari gi.

⁹Likame tie lobo moro kame kobino kobo ki ateker moro ne ateker ocelu. Buli ateker me Isirael bino dong kede lobo mere.’ ”

¹⁰Aso, anyira ka Selopekad, gin en Makala, Tirisa, Kagela, Milika, kede Nua, oko timo bala kame Rwot oudo ociko ne Musa, di gin kiko nyomere kede awobe me imiegu ka papa gi.

¹²Gin kinyomere i ude me ekeko ka Manase wot ka Yosepu, di lobo gi oko dong i ot me ekeko ka papa gi.

¹³Magonogi en cik kede iswilia kame Rwot bin omio Musa pi mino jo me Isirael i ebar me Moab, i loka tetuca me ecilet me Yorodan kakame pimere kede Jeriko.