Read kumam Wel 5 Bible Online

Wel 5 - kumam bible

Wel 5

¹Rwot oko waco ne Musa be,

²“Cik jo me Isirael pi poko tenge ki kimere gi jo dedede kame tie kede tuwo me delkom, arabo kame tie kede pige kame cwer ki kom gi, arabo jo komulo kom gi oto.

³Poore riamo jonogi dedede ki kimere, cuo kede mon, tetekeny kur kipwok kimere, en kakame ango abedo iye i diere me jo na.”

⁴Jo me Isirael oko timo kamanono bala kame oudo Rwot ociko ne Musa.

⁵Rwot oko waco ne Musa pi

⁶yamo ne jo me Isirael be, “Ka ngatamoro likame obedo kede genere but Rwot, di eko timo ne dano ace gikarac, dano nono bedo kede raco;

⁷en epoore tuco dub mere, di eko timo cul dedede but ngat kame en etimo ne gikarac nono, di bobo eko medo cule etango me acel i kom kany me cul nono.

⁸Do ka dano kame kopoore culo nono otieko to, doko da wad gi moro kiyapiyapi kede en kame kopoore mino cul bute likame tie, cul me gikarac nono bino ot but Rwot pi mino josaseredoti. Cul noni tie medo i wi emerekek kame en ekwanyo me ayala pi lwoko dub mere, en ngat kame etie kede raco.

⁹Giamia dedede kame jo me Isirael mio Rwot bino bedo me ka ngasaseredoti kame komio gi nono i cinge.

¹⁰Ngasaseredoti acelacel bino tero giamia kame jo tero but Rwot.”

¹¹Rwot oko waco ne Musa pi

¹²yamo ne jo me Isirael be, “Ka dako ka ngatamoro opacar di likame eko dong di etie dako agenere but cware,

¹³ka ebuto kede icuo moro me ooko di cware likame oko niang iye kiber, pien likame komake iye, doko mujura da li; arabo ka icuo moro cunye opoto i kom dako mere, do di i ateni likame dako nono obedo kede mit moro ooko;

¹⁵i kom kope are nogi dedede, icuo poore tero dako mere nono but ngasaseredoti. En epoore da tero giayala me kilo acel me alos me mawele, do likame ebino nyalo iye mo me olibeti arabo odok adunya angwe kur, piento en ebedo giayala kowok kibut icuo atie kede potocuny i kom dako mere; kotime pi nyuto gi dedede kakaler.

¹⁶“Ngasaseredoti ko bino mino dako nono cungo i nyim alutari ka Rwot,

¹⁷di ngasaseredoti ko bino onyo pi kacil i itatany kame kotimo kede elupe, di eko jobo apua mogo ki dier ot me Eema ka Rwot di eko rubo i kom pii atie i itatany nono pi mine doko kec.

¹⁸Ngasaseredoti ko bino sanyakako yer wi dako nono, di eko keto giayala me alos i cing dako nono. Di do en ngasaseredoti eko mako i cinge itatany atie kede pii akec, en pii kame kelo ilam.

¹⁹Di ngasaseredoti ko mino kwongere i kom dako nono be, ‘Ka likame icuo moro obuto kedi, ka likame in iweko cwari di iko ot pwokere tenge, kur pii akec kame kelo ilam noni tim ni gimoro.

²⁰Do ka in oudo ipacar tenge kibut cwari, ka in oudo ioto buto kede icuo apat di iko munaun,

²¹poore Rubanga mi nyingi bed gi me ilam i diere me jo ni. Poore emi auris ni jungi di yii ko pong.

²²Poore pii kame kelo ilam noni nan donyi i yii di eko mino auris ni jungi, di yi ko pong.’ Dako nono ko bino dwoko be, ‘Ango ayei, poore Rwot tim kamanono.’

²³“Di do ngasaseredoti ko bino wandiko kope me ilam noni, di en eko lwoko iwandik nono i itatany kame pii akec kame kelo ilam tie iye,

²⁴tetekeny ka dako nono omato pii akec nono, ilam nono bino donyo i kome di ko donyo rame.

²⁵Ngasaseredoti ko bino gamo giayala me alos me mawele ki cing dako nono di eko kiarao en i nyim Rwot di eko cibe i wi alutari.

²⁶Di ngasaseredoti ko juko alos nono i cinge pong, di eko wange i wi alutari di yiro mere ko duny; dul atitidi nono nyuto be akadi kodong da kotieko yalo but Rwot. Ingei manono en eko do mino dako nono mato pii noca.

²⁷Ka dako nono oudo ateteni likame obedo kede genere but cware di eko buto kede icuo apat, pii nono bino donyo ramo yie kitek, di auris mere ko jung di yie ko pong; nyinge bino doko gi me ilam i diere me jo mege.

²⁸Do ka dako nono oudo likame otimo tim moro atwero munao en i yore me buto kede icuo apat, likame tie gimoro arac kame bino timere ne, doko da en edong di etwero nywal.

²⁹Manoni en iswil amako nyeko kame icuo bedo kede ka dako mere opacar di eko pwokere i yore me mito icuo apat,

³⁰arabo ka icuo obedo kede potocuny i kom dako mere be amoto etie timo adote. Kobino mino dako nono cungo i nyim alutari di ngasaseredoti ko timo pwola noni dedede i kome.

³¹Cware likame bino bedo kede raco moro, do ka dako tie kede raco, en ebino udo can pi manono.”