Read kumam Wel 6 Bible Online

Wel 6 - kumam bible

Wel 6

¹Rwot oko waco ne Musa

²pi waco ne jo me Isirael be, “Kame cuo amoto mon tie timo ikwong me doko jo kokwerere but Rwot,

³gin kibino weko mato bwini kede kongo ace akec. Likame gin kibino mato pige me olok, amoto camo anyakini me olok anumu amoto otuo.

⁴I kare me kuo gin lung bala jo kame kokwero but Rwot, likame gin kibino camo gimoro kowok ki kom anyakini me olok, akadi nyige mege amoto apoke me ngee.

⁵“I kare me kuo gin lung bala jo kokwongere pi kwerere but Rwot, likame gin kibino lielo wi gi. Gin kipoore lubo ikwong gi pi kare lung kame gin kitie kede bala jo kokwerere but Rwot; gin kibino weko yer wi gi likame kilielo.

⁶“Pi kare lung kame gin kikwerere kede but Rwot, likame gin kibino noko kom dano oto.

⁷Akadi bed bala papa gi, amoto toto gi, amoto omin gi, amoto amin gi moro en oto, likame gin kipoore munaun iepone nono. Yer wi gin tie gianyuto be gin kikwerere but Rwot.

⁸Pi kare lung me kwerere gi gin kibino bedo jo komire but Rwot.

⁹“Ka ngatamoro ongoole to i nget gin, manono mio yer wi gin kame kikwero but Rwot munaun; pi manono gin kibino daro pi ceng kayaare di kiko lielo wi gi, manono en ceng me lonyere gin.

¹⁰I ceng me kanyauni mere gin kibino tero amam are amoto ilukei are ne ngasaseredoti i ekeko me donyo i Eema ka Rwot,

¹¹di ngasaseredoti ko bino yalo acel bala giayala me kwanyo dub kede ocelu bala giayala awanga, di en eko timo pwola me lonyo gi, pien udo gin kitieko doko jo atie kede raco pi mulo kom dano oto. I ceng nono gin doko kiko bino medo kwero yer me wi gi but Rwot,

¹²di kiko bobo mire bute bala jo kokwerere bute. Kare me kwerere gi kokato cen likame kobino maro, pien yer wi gin oudo oko munaun. Gin kiko bino kwanyo atin oromo me mwaka acel bala giamia me timo cul.

¹³“Man en iswil amako jo kokwerere but Rwot kame kare me kwerere gi otiek. Gin kibino ot i ekeko me Eema ka Rwot

¹⁴di kiko mino Rwot giamia me romini adek kalikame tie kede peko moro i kom gi: atin oromo icuo me mwaka acel me giayala awanga, atin oromo adako me mwaka acel me giayala me kwanyo dub, kede emerekek me giayala me nywak.

¹⁵Kibino da yalo ebukit acel me mugati kame kotimo abongo arup: gin en mugati apek kame kotimo kede alos kame konungo di oko nyalo kede mo, kede mugati aperepere kame kosuto mo i kom gi, karacel kede giayala gi me alos kede giayala amata.

¹⁶“Ngasaseredoti ko bino mino giamia nogo but Rwot, di eko mino giayala me kwanyo dub kede giayala awanga.

¹⁷En ebino yalo emerekek but Rwot bala giayala me nywak, ebino yale karacel kede ebukit me mugati kame kotimo abongo arup; en ebino mino da giayala me alos kede giayala me giamata.

¹⁸Di do dano kokwerere but Rwot nono ko lielo yer wie i dogola me Eema ka Rwot, di eko kwanyo yer nogo di eko keto gi i mac kame kotie wango kede giayala me nywak.

¹⁹“Ngasaseredoti ko bino kwanyo epepet me emerekek kame kocwako, kede mugati apek acel kede acel aperepere mere ki ebukit, di eko keto gi i dier cing dano kokwerere but Rwot nono ingei lielo wie.

²⁰Di do ngasaseredoti ko bino kiarao gi i nyim Rwot pi bedo giamia bute. Gin kibedo giamia kacil kame ngasaseredoti tero, karacel kede kapumito kame kokiarao i nyim Rwot kede amuro kame koyalo. Ingei manono dano kokwerere nono twero do mato bwini.

²¹“Magonogi en iswilia amako dano kokwerere but Rwot kede ikwong. Do ka dano moro kokwerere but Rwot osikano pi mino gimoro akalamo gikame kwongere amakere kede kwerere gi mito, miero en ecob gikame esikano iye.”

²²Rwot oko waco ne Musa

²³pi waco ne Aaron kede awobe mege pi mino winyo but jo me Isirael kaman:

²⁴Akwao Rwot emi wu winyo di eko gwoko wu;

²⁵Akwao Rwot ebed kede mwolo kede kisa butu;

²⁶Akwao Rwot etim ne wu bero eko mino wu mulem.

²⁷Rwot oko waco be, “Ka gin kitio kede nyinga pi mino jo me Isirael winyo, ango abino mino gi winyo.”