Read kumam Wel 8 Bible Online

Wel 8 - kumam bible

Wel 8

¹Rwot oko waco ne Musa be,

²“Wac ne Aaron be, kame etie cibo italan kanyaare, poore ecib gi di kirieny kicaro tetu anyim.”

³Aaron da oko timo kamanono, en ecibo italan di kirieny kicaro tetu anyim me gicibo italan, bala kame oudo Rwot ociko ne Musa.

⁴Bin gicibo italan nogo oudo kocweo kaman: yai ki dude piny tuno i ature mege oudo obedo saabu kame koteto ateta kede enyondo, di lubere kede epone kame Rwot oudo onyuto ne kede Musa.

⁵Rwot oko waco ne Musa be,

⁶“Pok Jolebi tenge kikom jo me Isirael di iko lonyo gi

⁷kaman: kikiro i kom gi pii me lonyere, di iko mino gi kiliel yer dedede kikom gi kede liedi, di kiko lwoko igoen gi, di do kiko doko jo kotieko lonyere.

⁸Di do iko mino gi kikwany twon etobait kede giamia me alos kame konungo di konyonge kede mo; doko iko kwanyo twon etobait ace pi bedo giayala me kwanyo dub.

⁹Ibino coko jo dedede me Isirael di iko kelo Jolebi i nyim Eema me ariamakin keda,

¹⁰di jo dedede me Isirael ko cibo cing gi i wi Jolebi.

¹¹Aaron bino mino Jolebi buta bala giamia kowok kibut jo me Isirael, tetekeny gin kidony timo tic na.

¹²Jolebi ko bino cibo cing gi i wi twonin. Twon acel bino bedo giayala me kwanyo dub, kede ocelu ko bedo giayala awanga, pi timo pwola me lonyo Jolebi.

¹³“Di do in iko bino mino Jolebi cungo i nyim Aaron kede awobe mege, di iko mino gi buta bala giamia.

¹⁴“Epone noni en kame in ibino poko kede Jolebi kikom jo me Isirael, di gin kiko bedo mega.

¹⁵Ingei in lonyo Jolebi kede mino gi buta bala giamia, gin kibino ot cako timo tic i Eema na.

¹⁶Pien ango atieko gamo gin kidoko mega, jo kame lunyo kawang awobe kao me jo me Isirael.

¹⁷Idwe kao dedede me jo kede me leini i lobo me Isirael obedo mega, pien i ceng kame ango aneko kede idwe cuo kao i Misiri, ango ako kwero gin pi bedo mega.

¹⁸Do ango nan atieko tero Jolebi kawang idwe cuo kao dedede me Isirael,

¹⁹di ako mino gi bala giamia kikom jo me Isirael but Aaron kede awobe mege, pi timo ne jo me Isirael tic i Eema na, kede pi timo pwola i kom jo me Isirael kame bino noko Kabedo Kacil, tetekeny kur can moro pot negi.”

²⁰Aso, Musa kede Aaron kede jo dedede me Isirael oko kwero Jolebi but Rwot bala kame oudo Rwot ociko ne Musa.

²¹Jolebi olonyere ki dub gi di kiko lwoko igoen gi, di do Aaron oko kwero gi but Rwot bala giayala kame kokiarao.

²²Jo oko timo gi dedede kame Rwot oudo ociko ne Musa amakere kede Jolebi. Di do Jolebi oko cako timo tic i Eema ka Rwot, di Aaron kede awobe mege en kame loo gi.

²³Rwot oko waco ne Musa be,

²⁴“Jolebi dedede me cako ki mwaka ot are kiwie kany ot malo bino donyo timo tic i Eema me ariamakin keda,

²⁵di do dano ko bino weko tic ka mwaka mere me dongo oromo mwakini ot kany.

²⁶Ingei weko tic, gin kitwero konyo Jolebi imiegu gi timo tice gi i Eema, do likame gin kibino timo tic moro gin ken gi. Epone noni en kame ibino mino kede Jolebi tic.”